1 Samuel 22 - Mam Huehuetenango New Ortography

1Ik'tzun David tuj lugar ma chixin ex max pon oq tuj toy' pik Adulam tb'i. Tejtzun kyb'inte qe terman ex kykyaqil xjal at kyxilen tuk'il, e je'x tu'n kypon tuk'il.

2Ax ikx e pon qe xjal in che yajlanjtz, kykyaqil qeju attoq kyk'as, kyuk'ix kykyaqil qeju minti' in che tzalaj, ex a David ok te nejenel kye. Tu'n tkyaqil japun kyaje syent kyajlal qe xinaq e pon tuk'il.

3Xi'tzun David tuj lugar Mizpa tb'i tuj kytx'otx' aj Moab, ex xi tma'n te kyrey aj Moab kyja':

—In chin kub'sane teya tu'n tkyaj ten nmane ex ntxu'ye tzalu kyuk'ile max okxi nb'inteye aju kb'antel tu'n Dios wi'je.

4Kyja'tzun tten xi ti'n David qe tman tuk'il rey tuj Moab, ex ax e kyaj ten tuk'il tuj tkyaqil tyemp tej tten David tuj lugar te tkolb'il tib'.

5Xitzun tma'n Gad aju t-sanjel Dios, te David:

—Mi'n ax kyaj tena tuj lugar te tkolb'il tib'a. Q'onkuya b'e ex txi'ya tuj kytx'otx' aj Judá.

Xi'tzun David ex pon tuj chk'ul Haret tb'i.

Tej kykub' qe pal tu'n Saúl tuj tnam Nob

6Atzunte Saúl attoq tuj tnam Gabaa, ex q'uqltoq twi witz, t-xe' jun wi' tze' tamarisco tb'i, tzyu'n tlans tu'n ex txolin ti'jele kyu'n qeju at kyoklen ttxlaj. Tejtzun tb'inte Saúl qa otoq ilwaj David kyu'n xjal, kyuk'ix qeju xinaq ate' tuk'il,

7xi tma'n kye qeju at kyoklen ttxlaj ate' ti'jele:

—Aqeye aj Benjamín chin kyb'intze: ¿Tzulpetzun tq'o'n tky'ajal Isaí kytx'otx'e ex tqan ky-uvaye? ¿Che okelpetzun q'o'ne tu'n te nejenel kyxol qe t-soldad?

8Kykyaqil qeye ma che ok meltz'aje wi'je, ex mi jun kyeye ma tzaj q'mante weye qa o kyaj b'ant ti'j jun tyol nky'ajale tuk'il tky'ajal Isaí; mi jun kyeye in b'aj tk'u'j wi'je, ex mi jun kyeye o tzaj q'mante weye qa tuk'ix nky'ajale in onin te nmajene David tu'n tok te aj q'oj wi'je, ex tu'n tb'aj tchmo'n qe xinaq tuj ewaj tu'n kyok tzoqpaj wi'je, ik tza'n in tb'incha'n ja'lo.

9Atzunte Doeg aju aj Edom ex nejenel kye qe tmajen Saúl, xi ttzaq'we'n:

—O Wile aju tky'ajal Isaí tej t-xi' aj tuj tnam Nob tu'n tyolin tuk'il Ahimelec aju tky'ajal Ahitob.

10Atzunte Ahimelec ok ten qanil te Qman alkye tu'n tb'ant tu'n David, ex xi tq'o'n twa tuk'ix t-spad Goliat aju aj Filisteo, chi Doeg.

11Xi'tzun txokb'il ti'j pal Ahimelec tu'n rey, ex kyi'j kykyaqil qe pal tuj tnam Nob aqeju at kyxilen tuk'il Ahimelec. Tejtzun kypon kykyaqil twitz rey,

12xi tma'n Saúl te Ahimelec:

—Chin tb'intza aya tky'ajal Ahitob.

—Lu qine lu ajb'el teya Tat Rey, chi Ahimelec xi ttzaq'we'n.

13Xitzun tqanin Saúl te:

—¿Tiqu'n ma tz'ok meltz'aja wi'je tuk'ix tky'ajal Isaí? Aya xi q'onte pan te twa David tuk'ix spad, ex ok tena qanil te Dios ti'j tu'n tok te aj q'oj wi'je, ex tu'n tb'aj tchmo'n qe xinaq tuj ewaj tu'n kyok tzoqpaj wi'je, ik tza'n in tb'incha'n ja'lo, chi Saúl.

14Atzunte Ahimelec xi ttzaq'we'n te rey:

—¿Alkye jun kyxol qeju at kyoklen ttxlaja tz'aqlxix ik tza'n te David, ex tji'ya jlu Tat Rey, ax ikx nejenel kye qe soldad kwentil teya ex in jaw nimsa'n tuj tjaya?

15Baqa ma ja'lo in xi nqanine te Dios ti'j David alkye tu'n tb'ant tu'n. Mya ikju. Kyja'tzun mi'n chin ok tq'o'na tuj xtis noq tu'n tlaj jlu, Tat Rey, mi qeju at nxilene kyuk'il, porke minti' ch'in b'i'n wu'ne ti'j jlu, chi Ahimelec.

16Atzunte rey tma:

—Ax tok, aya Ahimelec knajela kyuk'ix txqantl xjal at t-xilena kyuk'il.

17Xitzun tma'n rey kye soldad kwentil te:

—Kyb'yonkuya qe pal te Qman ex kyuk'ix qe jlu onil te David, ex minti' tzaj kyma'n weye tej kyja'toq tel oq David, chi Saúl.

Ex aqeju soldad kwentil te rey minti' ok kyq'o'n kyq'ab' kyi'j qe pal te Qman.

18Kyja'tzun xi tma'n rey te Doeg aju aj Edom:

—Che tb'yonkuya.

Oktzun tzoqpaj Doeg kyi'j qe pal ex e kub' tb'yo'n 85 pal tok kykapiẍay tb'anilxix.

19Te tib'ajxi okx tuj tnam Nob aju kytanmi qe pal, ex e kub' tb'yo'n tu'n t-spad kykyaqil qe xinaq, qe xu'j, ex kykyaqil qe k'wa'l kyuk'ix qeju kukx kych'u'n. Ax ikx e kub' tb'yo'n qe wakẍ, qe bur ex qe ẍne'l.

20Ex attoq jun tky'ajal Ahimelec aju tky'ajal Ahitob, Abiatar tb'i, o kolpaj ex minti' kub', kyja'tzun xi oq max jatum ta'toq David.

21Xitzun tma'n te David qa otoq che kub' tb'yo'n Saúl qe pal te Qman.

22Atzunte David xi ttzaq'we'n:

—Tej twile Doeg aju aj Edom tuj tnam Nob, b'i'x in pone ti'j qa tu'n t-xi tma'n Doeg te Saúl qa atzun atintoqe tuj tnam Nob. Aqine at wile tu'nju ma che kyim kykyaqil qeju at t-xilen tmana kyuk'il.

23Ex ax tenkja wuk'ile ex mi'n xob'a, ex axju xjal taj tu'n tkub' b'yo'na tu'n, ax tajb'il tu'n nkub' b'yo'ne tu'n, kyja'tzun minti' xob'ajil ok ttena wuk'ile, chi David.