Éxodo 21 - Mam Huehuetenango New Ortography

Qe ley kyi'j majen Deuteronomio 15.12-18

1Atzun qe ley lu kxel tma'na kye aj Israel:

2Qa at jun kyxole ma laq'et jun aj Hebreo tu'n te tmajen, qaq ab'q'i k'ajb'el te; atzun tuj twuqin ab'q'i k'elex tzoqpet noq kukx.

3Qa ma laq'et tjunal te, ax tjunal te k'elex. Qa attoq t-xu'jil tej tlaq'et, tuk'ix t-xu'jil k'elex tuk'il.

4Qatzun ma txi q'o'n t-xu'jil tu'n tpatrón, ex otoq tzaj tky'ajal ex qa tme'jel ti'j xu'j lu, tetzun tpatrón aju xu'j lu kyuk'ix qe tal; atzunte majen tjunal te k'elex.

5Qatzun ma tma majen kyja': At nk'ujlalile ti'j npatrone, ti'j nxu'jile ex kyi'j qe nk'wa'le, mlay chin exe qa chi,

6kxe'ltzun q'i'n majen tu'n tpatrón kywitz jwes, ex kpol ti'n ttzi tlamel tja ex qa ti'j tqan tja. Atzun k'elex tq'o'n toy' t-ẍkyin majen tu'n jun tal k'uxb'il tz'u'p twi', ex k'okeltzun te tmajen te jumajx.

7Qa at jun ma txi tk'a'yin tme'jel tu'n tok te majen, mlay tz'ex tzoqpet ik tza'n in che ex tzoqpet qe majen xinaq.

8Qa mya b'a'n xu'j lu tuj twitz tpatrón aju otoq jaw sk'o'nte te, kxel tq'o'n patrón amb'il tu'n tchjet tzoqpib'l te. Ok tel tik'un, minti' tumel tu'n t-xi tk'a'yin te jun stranjer xjal.

9Qa ma txi tq'o'n te t-xu'jil tky'ajal, il ti'j tu'n tb'ant ti'j ik tza'n in b'ant kyi'j qe tme'jel.

10Qa ma moje' jun xinaq tuk'il juntl xu'j, mi'n tz'ajtz ti'n ti'j twa tnejel t-xu'jil, mi ti'j t-xb'alun, ex mi ti'j toklen tuj mejeb'le'n.

11Qatzun mi'n ma japun qeju ox jlu tu'n, k'elextzun majen xu'j lu noq kukx, ex mi'n kyaj tchjo'n tzoqpib'lte.

Qe ley kyi'j b'yol xjal

12Qa at jun ma tz'ok tb'yo'n jun tuk'il, ex qa ma kyim tu'n, ax ikx te kb'el b'yet.

13Atzun teju mya ximantoq tu'n tu'n tkub' tb'yo'n tuk'il, noq o'kx ax Dios otoq tzaj q'o'nte amb'il te tu'n tkyim tuk'il tu'n, kxe'ltzun nyek'une kyeye jatum kpol oq.

14Qatzun at jun tuj ewaj ma tz'ok tzoqpaj ti'j tuk'il, ex qa ma kyim tu'n, maske otoq pon oq twitz n-altare, ex k'eletz kyi'ne tu'n tkyim.

15Qa at jun ma tz'ok b'yonte tman ex qa ttxu', il ti'j kb'el b'yet.

16Ax ikx qa at jun ma txi elq'ante jun xjal, qa ma txi tk'ayin, ex qa ma tz'el knet tuj tq'ab', il ti'j kb'el b'yet.

17Ax ikx qa at jun ma yasun ti'j tman ex qa ti'j ttxu', il ti'j kb'el b'yet.

18Ax ikx qa ma che jaw q'ojl xinaq, ex qa ma tza'w jun tu'n tuk'il, qa tu'n ab'j ex qa tu'n tq'ab', ex qa minti' ma kyim, noq o'kx otoq kub' twitz watb'il tu'n ta'w k'ixb'len,

19qa ma b'anix, ex qa ma tz'etz b'etel tok tky'aqo'ch, ktzoqpeteltzun aju otoq tz'ok b'yonte te. O'kx il ti'j tu'n t-xi tchjo'n tq'ij, jte' q'ij minti' otoq tz'aq'nan, ex k'okel tq'anan.

20Qa at jun ma tz'ok b'yonte tmajen tu'n tze', qa xinaq ex qa xu'j, ex ma kyim tu'n, kb'el tcastiw.

21Qatzun itz'x ok tex jun q'ij ex qa kab'e, mlaytzun kub' tcastiw patrón, tu'nju tetoq.

22Qa ma che jaw q'ojl xinaq, ex tk'ulb'aku ma tza'w jun xu'j kyu'n, aju otoq tz'ok ten tal, ex qa tu'n jlu ma tz'el tal, ex qa minti' ma kyim xu'j, k'elel tmult xjal otoq tza'w xu'j tu'n, ik tza'n tajlal ok ttzaj tqanin chmilb'aj ex ik tza'n ok kyma' jwes.

23Qatzun ma k'ixb'i xu'j, il ti'j kchjetel tu'nju xinaq otoq k'ixb'isante te. Qa ma kyim xu'j tu'n, ax ikx te il ti'j tu'n tkyim.

24Qa ma naj tb'aq' twitz xu'j tu'n, ax ikx te il ti'j tu'n tnaj tb'aq' twitz; qa ma tz'etz twitz te' xu'j tu'n, ax ikx te il ti'j tu'n tnaj twitz te'; qa ma naj tq'ab' xu'j tu'n, ax ikx te il ti'j tu'n tnaj tq'ab'; qa ma naj tqan xu'j tu'n, ax ikx te il ti'j tu'n tnaj tqan.

25Qa ma tz'e'y xu'j tu'n xinaq, ax ikx te il ti'j tu'n ttz'e'y; qa ma tz'ok ẍil ti'j xu'j tu'n xinaq, ax ikx te il ti'j tu'n tok ẍil ti'j; qa ma k'ixb'i xu'j tu'n xinaq, ax ikx te il ti'j tu'n tk'ixb'i.

26Qa at jun ma tz'ok tk'ixb'isa'n tb'aq' twitz tmajen, qa xinaq ex qa xu'j, ex qa tu'n jlu ma kyaj moẍix tu'n, k'elextzun ttzoqpi'n tu'n tlaj otoq naj tb'aq' twitz.

27Qa ma tz'etz jun twitz te' tmajen tu'n, qa xinaq ex qa xu'j, k'elextzun ttzoqpi'n tu'n tlaj otoq naj twitz te'.

Qe ley kyi'j kyajwil alumaj

28Qa ma jaw ẍu'yin jun xinaq ex qa jun xu'j tu'n jun wakẍ, ex qa tu'n jlu ma kyim, k'okeltzun xo't wakẍ lu tu'n ab'j tu'n tkyim, ex mi'n txi chyo't tchib'jal; atzunte tajwil minti' til.

29Qatzun otoq tz'el q'ij jawni ẍu'yin wakẍ ex otoq tb'i tajwil ex minti' otoq tz'ok tq'o'n tkwent ti'j; qa ma kub' tb'yo'n wakẍ jun xinaq ex jun xu'j, k'okeltzun xo't wakẍ lu tu'n ab'j tu'n tkyim; ax ikx te tajwil kb'el b'yet.

30Qatzun ma tzaj qanin tu'n tchjet twi kyimni, kxe'ltzun tchjo'n noq jte' ktzajel qanin te te kolpib'lte, tu'n mi'n tkyim.

31Qa ma jaw ẍu'yin jun tal q'a ex qa jun tal txin tu'n jun wakẍ, ax ley lu k'ajb'el ti'j.

32Qa ma jaw ẍu'yin jun majen xinaq ex qa jun majen xu'j tu'n jun wakẍ, kxe'ltzun tchjo'n tajwil wakẍ 30 saq pwaq te tajwil majen; atzunte wakẍ k'okel xo't tu'n ab'j tu'n tkyim.

33Qa at jun xjal ma kyaj tkatb'a'n jun xoch ex qa ma ku'x tlaku'n jun jul tu'n tjatz a' tuj, qa minti' ma kyaj tmaqsi'n ttzi', ex qa ma ku'x tz'aq jun wakẍ tuj ex qa jun chej,

34kxe'ltzun tchjo'n tajwil jul aju twi alumaj, ex aju alumaj otoq kyim k'okel te te.

35Qa ma jaw ẍu'yin twakẍ jun tu'n twakẍ juntl, ex qa tu'n jlu ma kyim wakẍ, kxe'ltzun k'ayit aju wakẍ itz'x, kb'el kyi'n tmij pwaq otoq tz'oktz twi', ex kb'el kyi'n tmij aju wakẍ otoq kyim.

36Qatzun otoq tz'el q'ij jawnix ẍu'yin wakẍ ti'j tuk'il ex otoq tb'i tajwil ex minti' otoq tz'ok tq'o'n tkwent ti'j, kxe'ltzun tq'o'n twakẍ te t-xel wakẍ, ex aju wakẍ otoq kyim k'okel te te.