Deuteronomio 11 - Mam Huehuetenango New Ortography

Ma'xix toklen Qman Dios

1Kyk'ujlame Qman Dios ex che japunx qe t-xnaq'tzb'il kyu'ne, kyuk'ix qe tley, qe tkawb'il ex qe tmandamyent.

2Tz'elx kynik'e ti'j ja'lo tza'n tten e kub' kawine tu'n Qman Dios. Mya kyuk'il kyk'wa'le in chin yoline, aqeju minti' b'a'n kyu'n ex minti' o kyil tajwalil Qman ex tipumal ma'xix,

3qe señ, qe b'inchb'en nim kyipumal e b'ant tu'n tuj Egipto ti'j Faraón ex kyi'j qe t-xjalil,

4aju tb'incha kyi'j qe soldad aj Egipto, kyi'j qe kychej ex qe kycarwaj in che ajb'en tuj q'oj, ex tza'n tten e aj mulq'aj tu'n tuj mar Kyaq Ke'yin tej kytzaj lpe' kyi'je. Ate Qman o kub' xitunte kye te jumajx.

5Ax ikx kyna'ntze tkyaqilju o tb'incha kyi'je tuj tzqij tx'otx' tejxi kyule tzalu;

6aju tb'incha kyi'j Datán ex Abiram aqeju tky'ajal Eliab ex tiyjil Rubén, tej tel k'ab'chaj tx'otx' ex e ku'x tz'aq junx kyuk'il kykyaqil ate' tuj kyja, kyuk'ix qe kyja xb'alun ex kykyaqil kyalun, ex kywitz kykyaqil aj Israel o b'ant jlu.

7Ax qeye testiw kyi'j qe b'inchb'en nim kyipumal o b'ant tu'n Qman.

Ju tky'iwb'il Dios ti'j tx'otx' tzaj ttziyan

8Japunx kyu'ne kykyaqil qe mandamyent ma che'x nma'ne kyeye ja'lo, tu'ntzun tten kyipune ok kyokxe k'molte aju tx'otx' ktzyetel kyu'ne,

9ex tu'n kyanq'ine nim ab'q'i tuj tx'otx' lu, aju o tzaj ttziyan Qman tu'n ttzaj tq'o'n kye kyxe'chele ex kye kyiyjil che ul itz'j te tib'ajxi; aju tx'otx' lu q'inunxix ex tb'anilxix.

10Aju tx'otx' ktzyetel kyu'ne mya junx ta' ik tza'n tx'otx' Egipto jatum o che etze; jatum in ku'x kyawa'ntoqe iyaj ex a'lin nno'k kyu'ne tu'n toma, ik tza'n nno'k a'lit txqan itzaj.

11Atzunju tx'otx' che okele te tajwil, at tiwitz tx'otx', at chq'ajlaj ttzi a', ex in a'linjtz tu'n jb'al in tzaj twitz kya'j.

12Aju tx'otx' lu, twitzelku Qman in kwentin ti'j, ex ax tok twitz ti'j tuj tkyaqil ab'q'i.

13Qa ma che japun qe mandamyent kyu'ne, aqeju ma che'x nma'ne kyeye ja'lo, qa ma kyk'ujlaye Qman Dios, ex qa ma che ajb'ene te tu'n tkyaqil kyanmiye ex tu'n tkyaqil kyk'u'je,

14ktzajeltzun tq'o'n Dios jb'al tib'aj kytx'otx'e tujxix tq'ijlalil, aju jb'al in tzaj ttzi jb'alil ex aju jb'al in tzaj ok tjaw jb'alil, tu'ntzun tjaw kychmo'ne triw, ex tu'n tten ta'l twitz uva kyuk'ile, tuk'ix chib'j aseyt.

15Ax ikx ktzajel ch'iy k'ul tu'n tuj kojb'il, tu'n kywa'n qe kywakẍe. Che wa'ltzune ex knojel kyk'u'je.

16Ex ten kykwente kyi'je tu'n mi'n kykub' sb'u'ne; mi'n tz'el kypa'n kyib'e ti'j Qman, mi'n che ajb'ene kye junxitl dios, ex mi'n che kub' ẍmeje'ye kywitz,

17ex qa ma kyb'inchaye jlu, ktzajel tq'oj Qman kyi'je ex mi'n tzaj t-sama'ntl jb'al kyib'aje, mlay tzaj tq'o'ntl tx'otx' twitz kyawale, ex jurat che najele tuj tb'anil tx'otx' aju ktzajel tq'o'n Qman kyeye.

18Kyja'tzun, kyk'unxe qe yol lu tuj kyanmiye; kyk'alonke kyi'j kyq'ab'e ex tib'aj kywitze te jun techal;

19kyxnaq'tzanxe kye kyk'wa'le, ex kyna'ntze qe yol lu tuj kyjaye ex tuj kyb'eye, ax ikx ok kyxi'ye tal ex ok kyjaw we'ye.

20Ax ikx kytz'ib'an oke kyi'j tlamel kyjaye ex kyi'j tmarkil,

21tu'ntzun ttzaj tq'o'n txqantl kyanq'ib'le ex kyanq'ib'l kyk'wa'le tuj tx'otx' tzaj ttziyan Qman kye kyxe'chele; ex kukx tu'n tten kyanq'ib'le, ik tza'n kya'j kukx tten te jumajx tib'aj tx'otx'.

22Qatzun ma txi kynimane ex qa ma japun kykyaqil qe mandamyent kyu'ne, aqeju ma che'x nma'ne kyeye, qa ma kyk'ujlaye Qman Dios, qa ma che ok lpe'ye ti'j ex qa ma che b'ete tuj tumelxix tuj twitz,

23che elextzun tlajo'n Qman kykyaqil qe nasyon lu kywitze, atzun kyeye kb'el kyi'j kyu'ne qe nasyon mas nim kyb'et ex at mas kyipun kywitze.

24Kykyaqil lugar jatum kb'el aj kyqane k'okel te kyeye. Aju tmojonil kytx'otx'e kxel qe' tuj tzqij tx'otx' ex kpol b'aj max jatum ta' witz Líbano, kxel qe'tl ttzi nima Éufrates ex kpol b'aj max ttzi Nintz Mar.

25Mi a'l jun jaku kub' twab'an tib' kywitze. Tu'n Dios ktzajel kyxob'il xjal kywitze, ex ktzajel kychiye kyi'j tuj tkyaqil twitz tx'otx' aju kb'ajel kyb'etine, ik tza'nx o tzaj ttziyan.

26Ja'lo, b'a'n tu'n tjaw kysk'o'ne alkye kyajb'ile; qa tu'n kykub' ky'iwla'ne ex qa tu'n ttzaj castiw kyib'aje.

27Qa ma che'x kynimane qe tmandamyent Qman Dios, aqeju ma che'x nma'ne kyeye ja'lo, ok kyk'ma'ye ky'iwb'il.

28Qatzun ma che'x lpe'ye kyi'j qe dios minti' ojtzqi'n kyu'ne, qa minti' ma che'x kynimane qe tmandamyent Qman Dios, ex qa ma tz'el kypa'n kyib'e ti'j tb'e aju ma txi nma'ne kyeye ja'lo, ktzajeltzun castiw kyib'aje.

29Oktzun kyokx q'o'ne tu'n Qman Dios tuj tx'otx' ktzyetel kyu'ne, kxel kyma'ne qe yol te ky'iwb'il twi witz Gerizim, atzun twi witz Ebal kxel kyma'ne qe yol tu'n ttzaj castiw.

30Aqeju witz lu ate' qe max jlajxi nima Jordán, ti'jxi b'e in xi' tuj telex q'ij tuj kytx'otx' aj Canaán aqeju najl qe tuj chq'ajlaj, ex kykub' tumlal twitz tnam Gilgal, niqayin jatum ate' qe tze' k'ol tuj lugar More.

31Atzun kyeye ch'ix kyik'xe tuj nima Jordán, tu'n ttzyet tx'otx' kyu'ne aju ktzajel q'o'n kyeye tu'n Qman Dios. Oktzun ttzyet tx'otx' kyu'ne ex ok kynajane tuj,

32ten kykwente kyi'je tu'n kyjapun kykyaqil qe ley ex qe xnaq'tzb'il kyu'ne, aqeju ma che'x nma'ne kyeye ja'lo.