1E tzaj ttxko'n Belsasar aju rey te Babilonia jun mil xinaq ma'xix kyoklen tuj tnam, tu'n kywa'n tuk'il tuj jun nintz wa'n, ex tej in che wa'ntoq, xi kyk'a'n nim vin.
2-3Tu'nju otoq chyo'n twi' Belsasar tu'n vin, xi tma'n tu'n kytzaj q'i'n qe copa q'an pwaq ex saq pwaq kytx'otx'il, aqeju otoq che tzaj ti'n Nabucodonosor aju qtzan tchman tuj tja Dios tuj Jerusalén. E ultzun q'i'n qe copa, ex atzun qe e ajb'en te tk'ab'l rey ex te kyk'ab'l qe t-xu'jil ex qe t-xu'jil mas ch'in kyoklen, ex qeju otoq che pon tuj nintz wa'n.
4Kykyaqil in che k'antoq vin ex in che nimsantoq kyb'i kydios, aqeju tilb'ilal q'an pwaq, saq pwaq, q'an k'uxb'il, k'uxb'il, tze' ex ab'j kytx'otx'il.
5Tujxtzun or lu jaw jlet jun q'ab'aj kytxlaj kandil, ex ok ten tz'ib'al tu'nx twi q'ab'aj twitz ja. Tejtzun tke'yinte rey aju q'ab'aj in tz'ib'an,
6puro spelin ok tu'n t-xob'il, b'i'x naj tnab'l, b'i'x el b'aj tipun, ex qe tqan e ok ten lu'lul.
7Jawtzun sch'in ex e tzaj ttxko'n qe aj q'ij ate' tuj Babilonia, kyuk'ix qe aj nab'l ex qeju in che xnaq'tzan kyi'j che'w twitz kya'j, ex xi tma'n kye:
—Alkye jun ma jaw sch'inte aju tz'ib'an tzalu ex qa ma tzaj tchik'b'a'n ti t-xilen, k'okel q'o'n jun t-xb'alun tb'anilxix ẍjulin ke'yin, kb'el q'o'n jun uwj tqul, q'an pwaq ttx'otx'il, ex k'okel q'o'n toklen tu'n tok te toxin kawil tuj nkawb'ile.
8Kykyaqil aj nab'l in che ajb'entoq te rey e okx tuja, ex mi jun el tnik' ti'j yol tz'ib'an twitz ja ex mi jun b'ant tchik'b'ante te rey ti t-xilen.
9Atzunte rey Belsasar tzaj nimxix t-xob'il ex jumajx spelin ok ke'yin. Qe xjal at kyoklen ttxlaj minti' el kynik' ti'j alkye tu'n tb'ant kyu'n.
10Atzunte ttxu rey, tej tb'inte tq'ajq'ajel twi' rey ex tq'ajq'ajel kywi' qe xjal ma' kyoklen otoq che tzaj ttxko'n, okx tuja jatum otoq tz'ok nintz wa'n, ex tma:
—Tat Rey, b'a'nwt tz'el tq'ija te jumajx. Mi'n tzaj b'aj tk'u'ja ex mi'n tz'ok twitza te spelin,
11porke tuj tkawb'ila at jun xinaq at kyxew qe dios xjan tuk'il. Tuj tq'ijlalil ojtxi, tej toktoq tchmana te rey, el tnik' ti'j, aju xinaq lu at tnab'l ex at nim tojtzqib'l ik tza'n kye qe dios. Tu'ntzun jlu, ate rey Nabucodonosor aju qtzan tchmana ok q'onte xinaq lu te nejenel kyxol kykyaqil qe chman, qe aj q'ij, qe aj nab'l ex qeju in che xnaq'tzan kyi'j qe che'w,
12porke ate Daniel, aju Beltsasar tb'i ok tq'o'n qtzan rey, at mastl tnab'l kywitz txqantl xjal, at tojtzqib'l ex at nim tnab'l tu'n tpjet witzik' tu'n ex tu'n t-xi tchik'b'a'n alkye t-xilen junjun yol b'ajx tz'el nik'b'aj ti'j ex tu'n ttzaq'wet junjun yol kyuw ttx'olb'anjtz. Txkontza Daniel ja'lo, ex atzun ktzajel chik'b'ante teya ti t-xilen aju ma tz'ok tz'ib'an twitz ja, chi ttxu rey.
13Xitzun q'i'n Daniel twitz rey, atzunte rey xi tqanin te:
—¿Apeya Daniel, aju tzaj q'i'n pres tuj Judea junx kyuk'il txqantl xjal Judiy tu'n qtzan nchmane aju rey Nabucodonosor?
14Ma nb'iye at T-xew Dios tuk'ila, at nim tnab'la, at tojtzqib'la ex nne'l tnik'a ti'j tkyaqil.
15Qe xinaq at kynab'l ex qe aj q'ij ma che ul wuk'ile tu'n tjaw kysch'i'n aju tz'ib'an twitz ja ex tu'n ttzaj kychik'b'a'n weye ti t-xilen, ex minti' ma tz'el kynik' ti'j.
16Ex ma nb'iye qa jaku pjet tu'na qe yol minti' nne'l nik'b'aj kyi'j ex jaku tzaq'wet tu'na junjun yol mas kyuw. Qa ma jaw t-sch'i'na qe yol lu ex qa ma tzaj tchik'b'a'na weye ti t-xilen, jaku tz'ok nq'o'ne t-xb'aluna tb'anilxix ẍjulin ke'yin, kb'el nq'o'ne jun uwj tqula, q'an pwaq ttx'otx'il, ex k'okel nq'o'ne toklena tu'n toka te toxin kawil tuj nkawb'ile, chi rey.
17Atzunte Daniel xi ttzaq'we'n te rey:
—E tten toyaja te teya ex b'a'n tu'n t-xi tq'o'na oklenj lu te juntl. Maske mi jun ktzajel nk'mo'ne, pero jaku txi ntx'olb'a'ne aju in tma'n yol ma tz'ok tz'ib'an twitz ja.
18A Dios aju ma' toklen, xi q'onte kawb'il te tchmana Nabucodonosor, ax ikx ok tq'o'n toklen te ma'xix, ex xi tq'o'n tajwalil ex nimb'il te.
19Tu'nju toklen xi q'o'n, qe xjal najl kyuj kykyaqil tnam ex nasyon ex kykyaqil k'loj yol o ten tchiylal kye ex e lu'lun twitz. E kub' tb'yo'n junjun xjal, atzun junjuntl minti'; o tb'incha noq alkye tajb'il, xi tq'o'n kyoklen junjun, atzun junjuntl el ti'n kyoklen.
20Ex tej tjaw tniman tib' ex tej tok jawni twitz, el q'i'n toklen te rey ex tajwalil.
21Ex lajo'n kyxol xjal ex ok tnab'l ik tza'n tnab'l jun txkup, ax o kyaj ten kyxol chej te tjaq' k'ul. K'ul xi twa'n ik tza'n kye wakẍ, ex o tz'ak' t-ximlal tu'n tq'ab' che'w, ex maxitzun ul tnab'l tejxi tel tnik' ti'j qa ate Dios ma'xix toklen kyib'aj kykyaqil kawb'il ex in che ok tq'o'n qe kawil noq alkye taj tu'n kyok tq'o'n.
22Atzun teya, aya Belsasar, maske b'i'n tu'na ti o b'aj ti'j qtzan tchmana, pero minti'x ma kub' tmansin tib'a,
23noqpe ma tz'ok tena xmayil ti'j Qman aju at tuj kya'j, ex ma txi tma'na tu'n kytzaj q'i'n qe copa aqeju e tzaj q'i'n tuj tja Dios tuj Jerusalén; ma k'ana vin kyuj qe copa lu junx kyuk'il qe xjal ma che tzaj ttxko'na, ex ma jaw tnimsa'na kyb'i qe dios q'an pwaq, saq pwaq, q'an k'uxb'il, k'uxb'il, tze', ex ab'j kytx'otx'il. Aqeju dios lu mib'an che ke'yin, mib'an che b'in ex minti' ch'in b'a'n kyu'n. Atzunte Dios, aju in tq'o'n tchwinqlala ex Tajaw tkyaqilju in tb'incha'na, na'nx tjaw tnimsa'na tb'i.
24Kyja'tzun ma tzaj t-sama'n ju q'ab'aj lu, aju ma kub' tz'ib'ante yol lu.
25Aju yol tz'ib'an twitz ja, atzun jlu: MENE, MENE, TEKEL, UPARSIN,
26ex atzun kyxilen jlu: MENE: Atzun in tma'n: Ate Dios ma q'mante jte' q'ij tu'n tkawina ex ja'lo ma pon b'aj;
27TEKEL: atzun in tma'n: Ma malonjtza tuj balans ex mya cabal ma tz'el talila;
28PERES: Atzun in tma'n: Aju tkawb'ila k'elel q'i'n teya ex kxel q'ot kye aj Media ex kye aj Persia, chi Daniel te rey.
29Tb'ajlenxitzun jlu, xi tma'n rey Belsasar tu'n tok q'o'n t-xb'alun Daniel tb'anilxix ẍjulin ke'yin, ex tu'n tkub' kotb'a'n jun tu' q'an pwaq ttx'otx'il ex xi tma'n kye kykyaqil xjal qa ate Daniel otoq tz'ok toklen te toxin kawil tuj tkawb'il rey.
30Tujxtzun aq'b'il lu kub' b'yo'n Belsasar aju rey kye aj Babilonia,
31atzunte Darío aju aj Media o tkamb'a ju kawb'il, tej toktoq twi' 62 ab'q'i.
Who We AreWhat We EelieveWhat We Do
2025 by iamachristian.org,Inc All rights reserved.
