Deuteronomio 13 - Mam Huehuetenango New Ortography

1Qa ma jaw jlet jun pakb'al ex qa witzky'al kyxole, qa ma tma tqanil ti'j jun señ ex qa jun b'inchb'en nim tipumal na'nxtoq tb'aj,

2qatzun ma japun aju señ ex qa b'inchb'en nim tipumal aju otoq yolin ti'j, ex qa ma tma kyeye: Qo'qe, qo lpex kyi'j junxitl dios minti' ojtzqi'n kyu'ne, ex qo k'ulun kywitz, qa chi,

3mi'n txi kyb'i'ne tyol aju xjal lu; ex taj Qman Dios tu'n tik' twitz kyi'je, qa in kyk'ujla'ne tu'n tkyaqil kyk'u'je ex tu'n tkyaqil kyanmiye.

4O'kx che lpe'ke ti'j Qman Dios, o'kx twitz che xob'e, japunx qe tmandamyent kyu'ne, kyb'inxe tyol, che k'ulune twitz, ex tenx kymojb'ab'l kyib'e tuk'il.

5Aju pakb'al ex qa witzky'al lu il ti'j tu'n tkub' b'yet, tu'nju otoq tz'ok ten oksalte kyk'u'je tu'n mi'n t-xi kynimane Qman Dios, aju etz kolpinte kyeye tuj Egipto, jatum ate'toqe te majen, ex tu'nju in tma'ntoq tu'n tel kypa'n kyib'e ti'j b'e tzaj tma'n Qman Dios kyeye tu'n kyb'ete tuj. Atzun tumel jlu tu'n tnaj aju mya b'a'n otoq tz'oktz kyxole.

6Qa at jun termaniya, qa tky'ajala, qa tme'jela, qa tamiwoya ex qa ax t-xu'jila aju k'ujla'n tu'na, ma q'ma'nte teya tuj ewaj kyja': Qo' k'ulul kywitz junxitl dios, qa chi, aqeju dios lu minti' ojtzqi'n kyu'ne mi kyu'n kymane,

7ik tza'n qe kydios txqantl xjal ate' kyi'jele, aqeju niqayin ate' ex qeju najchaq ate' tuj tkyaqil part twitz tx'otx',

8mi'n txi tb'i'na tyol, mi'n tzaj q'aq'an tk'u'ja ti'j, mi'n tzaj tz'e'y tk'u'ja ti'j, ex mi'n kub' tewana til xjal lu,

9noq o'kx tu'n tkub' tb'yo'na. Aya k'okel xonte tnejel ab'j ti'j xjal lu nej, ex te tib'ajxi k'okel xo'n ab'j ti'j kyu'n kykyaqil xjal.

10Xo'n oka tu'n ab'j tu'ntzun tkyim, porke o tajb'e tu'n tel pa'na tu'n ti'j Qman Dios aju etz q'inte kyeye tuj Egipto, jatum ate'toqe te majen.

11Kyja'tzun, ok kyb'inte kykyaqil aj Israel, tzul tchi kyi'j ex mlay kyb'inchatl jun il ik tza'n jlu.

12Noq tuj alkyex jun tnam ktzajel tq'o'n Qman Dios kyeye tu'n kynajane tuj, qa ma kyb'iye tqanil kyi'j

13junjun xjal minti' in che niman te Dios, in che b'aj kytzpet-sa'n qe xjal najl tuj kytanmi ex nno'k kyoksa'n kyk'u'j tu'n kyxi' k'ulul kywitz junxitl dios, qa chi,

14kb'ajel kyqanine, kb'ajel kyb'i'ne ex kb'ajel kyjyo'ne wen. Qatzun ma tz'el knet qa ax tok otoq tz'okx jun mya b'a'n ik'b'ilxix kyxole,

15kb'eltzun kyb'yo'ne tu'n spad kykyaqil xjal najl tuj tnam lu ex kykyaqil alumaj; b'i'x knajel tkyaqilju at tuj tnam.

16Kb'ajel kychmo'ne tkyaqil kyq'inumab'l tuj tmij plas, ex k'okeltzun kyqoptz'i'ne q'aq' ti'j q'inumab'l tuk'ix tnam; kb'eltzun kypatune tkyaqil ik tza'n oyaj patun in kub' te Qman Dios. Aju tnam lu jumajx kb'ajel xitj ex mlay jaw b'incha'n juntl maj.

17Mi'n kyaj kyi'ne te kyeye jun ti'xti aju b'i'x tu'n tnaj, tu'ntzun tchewix tq'oj Qman ex tu'n ttzaj q'aq'an tk'u'j kyi'je, tu'n ttzaj tz'e'y tk'u'j kyi'je ex tu'n tchmet nim kyb'aje tu'n ik tza'nx o tzaj ttziyan kye kyxe'chele.

18Kb'antel jlu tu'n Qman qa ma txi kynimane tyol, qa ma che japun kykyaqil qe mandamyent kyu'ne aqeju ma che'x nma'ne kyeye ja'lo, ex qa ma kyb'inchaye aju tz'aqlxix twitz.