1Aqine ma tzik'x k'ixb'isab'l wu'ne, ex ma chin b'aj asyaline tej ttzaj tq'oj Qman.
2Ma chinx ti'n kyuj qe lugar puro qlolj, ex tu'n ma chinx ti'n tuj b'e jatum minti' spik'un;
3kukx in chin ok tk'ixb'isa'n tkyaqil q'ij.
4Ma tijin nchib'jale tu'n ax ikx aju ttz'umal nximlale, ma b'aj ttoqin qe nb'aqile;
5ma tz'ok tpe'nin wi'jele tu'n b'is ex tu'n k'ixk'oj;
6ma chin kyaj tq'o'n tu'n wanq'ine tuj qlolj ik tza'n qeju e kyim ojtxi.
7Pe'nin wi'je tu'n ex minti' jatum tu'n wexe; ma chin kub' tk'alo'n kyu'n caden alxix;
8maske in jaw sch'ine tu'n nqanine onb'il, pero minti' tzaj tb'i'n aju nkub'sb'ile;
9ma kub' tmaqo'n nb'eye kyu'n qe ab'j nmaqxix qe, ma b'aj t-ẍokin kyi'j qe nb'eye.
10Ma tz'ok Qman te weye ik tza'n jun txkup oso b'anin tten tu'n tok tzoqpaj wi'je, ex ik tza'n jun b'alun tewan tib'.
11Ma chin el ttzpet-sa'n ti'j nb'eye, ma chin b'aj tliẍan, ex ma tzaj tq'o'n nim xob'ajil wi'je.
12Ma tz'el t-xqinin xob'l tplech ex ma b'ant tten tu'n ttzaj t-xo'n qe tplech wi'je.
13Qe plech in che tzaj t-xo'n Qman wi'je nimxix ma che'x xu'yl tuj nchib'jale.
14In che xmayin kykyaqil nxjalile wi'je; tkyaqil or o'kx aqine in chin ajb'en te kyxmayb'il.
15Ma tzaj tq'o'n Qman nimxix k'ixk'oj wi'je, ex ma tzaj tq'o'n nk'a'ye puro k'a wen.
16Ma b'aj tb'uchin qe twitz we'ye tu'n ttxa' ab'j; ma noj wi'je tu'n tza'j tu'n.
17Minti'tl in chin tene tuj txub'txaj, ex ma tzik' tna'njtz wu'ne aju tzalajb'il.
18Ex ma kub' nximane kyja': Ma b'aj wipune ex ma naj aju in chin ayone ti'j, aju at tu'n ttzaj tq'o'n Qman weye.
19Na'ntza aju yajb'il, aju b'is, ex aju ta'w ma tzaj wi'je.
20Ok in chin kub' tene ximal ti'j jlu, b'i'x in tzaj b'aj nk'u'je.
21Ex at jun kukx tu'n nximane ti'j, ex atzun tu'n tok qe' nk'u'je ti'j jlu.
22Aju tk'ujlalil Qman minti' b'ajsb'il te, kyja'tzun noq tu'nju tq'aq'b'il tk'u'j, te jumajx na'nx qnaj tu'n.
23Tkyaqil prim ak'aj ta' tq'aq'b'il tk'u'j; tz'aqlxix te Qman, ex in japun tkyaqil tyol.
24Ex in xi nma'ne: Ate Qman wetzb'ile; kyja'tzun o'kx ti'j q'uql nk'u'je.
25B'a'n te Qman kyuk'il qeju nno'k qe' kyk'u'j ti'j ex kyuk'il qeju in che jyon ti'j.
26B'a'n tu'n qkub' txule' ex tu'n qayon ti'j ju kolb'il qe tu'n Qman.
27Mas b'a'n te te xjal tu'n tokx tq'on tib' tjaq' tkawb'il Qman atxix tuj tku'xumal.
28Qa ma tzaj yajb'il ti'j xjal tu'n Dios, b'a'n tu'n tkyaj ten tjunal ex mi'n q'ajt;
29ex b'a'n tu'n tkub' tmansin tib' twitz Qman, b'alo atx ch'intl oyb'il te;
30b'a'n tu'n t-xi tq'o'n tq'o'tx tu'n tok b'ju'n kyu'n qe xjal kyaj tu'n kyk'ixb'isante te, ex tzik'xwit tu'n aju yasb'il te kyu'n xjal.
31Ex mlay qo kyaj tkolin Qman te jumajx.
32Maske in tzaj tq'o'n Dios k'ixb'isab'l qi'j, ax ikx in tzaj q'aq'an tk'u'j qi'j, ex nimxix aju tk'ujlalil.
33Ex ax tok minti' in tzalaj Qman ti'j tu'n kyk'ixb'isanjtz qe xjal tu'n ex tu'n tik'x yajb'il kyu'n.
34Qa ma che b'aj k'ixb'isa'n qe pres tuj jun tnam,
35ex qa minti' ma txi b'incha'n kyi'j xjal tuj tumelxix twitz Dios,
36ex qa ma b'aj yajla'n xjal ok tpon xtisil, tkyaqil jlu minti' in kub' tuj twitz Dios.
37¿Jakupe b'ant jun ti'xti kyu'n xjal qa mya a Dios q'malte?
38Tza'nx ju b'is ax ikx tzalajb'il; in che tzaj jlu tu'nju in tma'n Dios aju najl tuj kya'j tu'n tb'ant ikju.
39¿Tiqu'n in che oq' xjal tzalu twitz tx'otx'? B'a'n tu'n kyjaw oq' xjal tu'n tlaj kyil.
40Qo ximan kyi'j qe qb'inchb'en ex qo aj meltz'aj juntl maj tuk'il Qman.
41Qo ximan ti'j Dios aju at tuj kya'j ex qo kub'san twitz, ex qq'manx kyja':
42Ma qo b'inchane il ex minti' ma txi qnimane tyola, ex minti' ma kub' tnajsa'na qile.
43Ma tzaj nimxix tq'oja qi'je, ma tz'ok lpe'ya qi'je tu'n qtzyete tu'na, ma qo kub' tb'yo'na ex minti' ma tzaj q'aq'an tk'u'ja qi'je.
44Ma tz'okx tewan tib'a tuj jun muj, tu'ntzun mi'n tokx qna'j Diose tuk'ila.
45Tu'na ma qo el ik'une kyu'n txqantl nasyon, ex in che xmayin qi'je.
46Kykyaqil aj q'oj qi'je ma che yolin mya b'a'n qi'je;
47ma qo naje tu'n xob'ajil, tu'n k'ob'il ex tu'n xitb'il; atzun jlu ma tzaj qi'je.
48Nimxix ta'l nwitze nne'l tu'n oq'el tu'nju ma che naj qe nxjalile.
49In chin oq'e, minti' ojlab'l kye tb'aq' nwitze, minti'x tu'n kyq'ajen,
50maxlo chin q'ajele okxi qtzaj tke'yin Qman aju at tuj kya'j.
51Ma tzaj ta'w tuj wanmiye tu'nju ma tz'ok nke'yine aju ma tzaj kyi'j qe xu'j ate' tuj ntanmiye.
52Minti' jun mya b'a'n ma nb'inchaye, noqx gan ma chin tzyete kyu'n aj q'oj wi'je ik tza'n in tzyet jun chyu'j;
53In ku'x q'o'ne kyu'n tuj jun jul tu'n nnaje, ex ku'x kyxo'n ab'j wib'aje.
54In kyaj mulq'aje tjaq' a', ex o nmaye: Ma chin najxe.
55Nman, max t-xe'pun jul o chin kub'sane twitza;
56ex o chin tzaj tb'i'na; mi'n tz'ok tmaqsi'na t-ẍkyina tu'n mi'n tb'inteya aju nkub'sb'ile.
57Tej nkub'sane twitza, ul laq'e'ya wi'je ex tzaj tma'na weye kyja': Mi'n xob'a.
58O kolina wi'je Nman, ex o chin kolpete tu'na tu'n mi'n nkyime.
59Nman, maske minti' wile, pero ma tila aju mya b'a'n ma b'inchanjtz wi'je, b'inchanxtzuna wi'je.
60Ma tila aju kyq'oj wi'je ex aju mya b'a'n in b'aj kyximan wi'je.
61Ma tb'iya qe yasb'il weye kyu'n, ex tkyaqilju kyximb'etz mya b'a'n in b'aj kyximan wi'je;
62qe aj q'oj wi'je noq in che yolin wi'je tkyaqil q'ij, ex tuj ewaj in b'aj kyximan mya b'a'n wi'je.
63Ke'yintza noq alkyexku in kyb'incha'n, o'kx in che xmayin wi'je.
64Nman, q'on kub'a kycastiw ik tza'nx kyb'inchb'en mya b'a'n.
65Maqsima kynab'l ex q'onkuya mya b'a'n kyib'aj.
66Nman, lpe'ka kyi'j tuk'il tq'oja, ex tu'n kykub' naj tu'na tzalu twitz tx'otx'.
Who We AreWhat We EelieveWhat We Do
2025 by iamachristian.org,Inc All rights reserved.
