Isaías 13 - Mam Huehuetenango New Ortography

Aju tqanil q'manjtz ti'j ju attoq ttzajel ti'j Babilonia

1Aju yol lu tzaj tma'n Qman te Isaías aju tky'ajal Amoz, in yolin ti'j ju at ttzajel ti'j Babilonia.

2Kyq'on jawe jun bander twi' jun witz tz'la'j ti'j, te jun techal ti'j q'oj. Kyq'onxe orden kye soldad tu'n kyok tzoqpaj q'ojlel. Kyq'o'n jaw kyq'ab'e twitz kya'j tu'n kyokx ttzi kyja qe xjal ma' kyoklen.

3Ma che tzaj ntxko'ne qe soldad sk'o'maj wu'ne, ma txi nq'o'ne orden kye qe xinaq elni qe twitz q'oj, aqeju in che tzalaj ti'j kamb'ab'l wu'ne, tu'ntzun tkub' kyq'o'n kyib'aj xjal aju castiw b'animaj ti'j wu'ne, chi Dios.

4In b'injtz jun tq'ajq'ajel kywi'yile witz mer ik tza'n ok in che jaw sch'in nim xjal. In b'injtz tq'ajq'ajel nimku nasyon ex qe tnam, aqeju otoq tz'ok kychmon kyib'. Ate Qman aju Tajaw Tkyaqil nnik' twitz kyi'j qe t-soldad kyq'on kyib' tu'n kyxi' tuj q'oj.

5Che tzajel tuj tx'otx' najchaq, max jatum ponin b'aj t-xe kya'j. Tzul Qman kyuk'ix qe soldad che ajb'el tu'n, tu'n tkub' kycastiw xjal, tzul tu'n tnaj tkyaqil twitz tx'otx'.

6Che wu'yine tuk'il b'is, porke aju tq'ijlalil tu'n tul Qman niqa ta', tzul tuk'il jun xitb'il, tu'nju at tipumal tu'n tb'ant tkyaqil tu'n.

7K'elel b'aqchaj kyq'ab' kykyaqil xjal, kykyaqil k'elel b'aj kyipun.

8Ktzajel nim t-xob'il kyi'j. Ktzajel jun b'is kyib'aj ex jun k'ixk'oj ma'xix, kjawil kyẍokin kyi'j ik tza'n jun xu'j ok nnu'l itz'j tal. Teyle junjun kb'ajel kyke'yin tuj kywitz najni kynab'l ex kjapunel tkyaqal kywitz tu'n kych'ixwi.

9Ma pon tq'ijlalil tu'n tul Qman, xob'ajilxix aju q'ij lu, tzul tq'oj Qman ex ma'xix ttx'u'jil, k'okel ju tx'otx' tu'n te tzqij tx'otx' ex qe aj il ate' twitz tx'otx' che najel tu'n.

10Qe che'w, kyuk'ix txqantl k'loj che'w ate' twitz kya'j, mlay che k'anttl; ok tjawil yek'un, b'i'x k'okel qlolj twitz ex mi'n k'anttl xjaw.

11Chi Qman in tma'n kyja': Kb'el nq'o'ne kycastiw xjal tu'n tlaj ju mya b'a'n in kyb'incha'n, ax ikx kye qeju b'inchal mya b'a'n tu'n tlaj kyil. Kykyaqil qeju in jaw kyniman kyib' che najel wu'ne tu'nju nno'k kyq'on kyib' te ma' kyoklen; te jumajx k'elel wi'ne kyoklen qeju in jaw kyniman kyib' ex jawni qe.

12Nik'xi xinaq che kyjel anq'in wu'ne; ik kyb'et kyjel ik tza'n q'an pwaq tb'anilxix at tuj tx'otx' Ofir, mya nim at.

13Ktzajel lu'lun kya'j wu'ne ex k'ik'el laq'e' tx'otx' tuj tlugaril tu'n nq'oje ktzajel tuj q'ij tzul, tu'nju ntx'u'jile ma'xix wen.

14Ik che okel qe xjal ik tza'n jun masat lajo'n kyu'n xjal, ex qa ik tza'n txqan ẍne'l in che el sputj ex mi a'l jun k'okel chmonte kye. Teyle junjun k'ajel meltz'aj kyxol t-xjalil, teyle junjun kxel oq tuj ttanmi.

15Kykyaqil qeju che knetel, xayu'n che okel tu'n kchil, kykyaqil qeju che tzyetel, che b'el b'yo'n.

16Ax kywitz che b'ajel pach'u'n qeju tal kyk'wa'l twitz tx'otx'; k'elex q'i'n tkyaqil aju at tuj kyja, ex che b'el xo'n qe kyxu'jil kyu'n xjal tu'n kyok ten kyi'j.

17Che tzajel wi'ne qe xjal aj Media tu'n kyok tzoqpaj kyi'j; qe xjal lu minti' kyajb'il ti'j saq pwaq ex minti' in pon kyk'u'j ti'j q'an pwaq.

18Qe ku'xun che najel tu'n kyplech. Mlay tzaj q'aq'an kyk'u'j kyi'j qe tal ne' ex mlay tzaj tz'e'y kyk'u'j kyi'j qe tal k'wa'l.

19Atzunte Babilonia, aju tnam tb'anilxix kyxol qe nasyon, mer ik tza'n jun adorn kye aj Caldeo ex nim in che tzalaj ti'j, ex ik kyjel ik tza'n kyaj tnam Sodoma ex Gomorra tej kynaj wu'ne.

20Te jumajx mlay che najantl xjal tuj. Mlay che pon aj Arabia najal tuj, mi qe pastor mlay txi kyi'n kyalun tu'n kykub' ten wa'l ma chixin.

21Atzun che najal ma chixin qe jil tzajni tuj tzqij tx'otx', knojel kyuj qe ja kyu'n xitx' ex che najal qe chyu'j avestrúz tuj ttx'aqan tnam, ax ikx qe chip te tjaq' k'ul che t'ikjeb'il tuj.

22Che wujwu'yil qe xo'j ex qe wech kyuj qe ja ma' kywa'l te kykolb'il kyib' xjal ex kyuj qe ja tb'anilxix b'inchb'en kye. Ch'ix tpon or tu'n tnaj Babilonia; noq nik'xi q'ij taj.