Nehemías 13 - Mam Huehuetenango New Ortography

Ok tmayo'n Nehemías qe xjal ti'j ju mya b'a'n in kyb'incha'n

1Tuj tq'ijlalil lu jaw sch'i'n tu'jil tley Moisés kywitz kykyaqil xjal, ex tujtzun tu'jil tley Moisés knet jatum tz'ib'amaj kyi'j aj Amón ex aj Moab, qa jumajx minti' kyoklen tu'n kyten kyxol qe xjal etzan tu'n Dios,

2porke minti' e etz kanul kyi'j aj Israel tuk'il wab'j ex k'ab'j, noq o'kx xi kyq'o'n pwaq te Balaam tu'n t-xi tqanin mya b'a'n kyib'aj. Maske ikju, pero tzaj tq'o'n Qman Dios ky'iwb'il kyib'aj te t-xel mya b'a'n.

3Tejtzun kyb'inte aju ley lu, e ex kylajo'n aj Israel qe stranjer xjal najlqetoq kyxol.

4Otoq tz'el q'ij tuj tkwenttoq pal Eliasib ta' qe ja tuj tja Dios jatum k'u'n qe oyaj, ex tu'nju otoq tz'ok tamiwin tib' Eliasib tuk'il Tobías,

5kyja'tzun otoq txi tq'o'n jun cuart matij te, jatum nno'kx k'u't tkyaqil oyaj nej, ex atzun qe jlu: Storac, qe makb'il, aju tlaji'n nne'l q'i'n ti'j twitz triw, ti'j ta'l twitz uva ex ti'j aseyt, aju q'ma'maj tu'n t-xi q'ot kye aj Leví, kye b'itzal ex kye qe xq'uqil ttzi tja Dios, ax ikx jatum in xi k'u't aju onb'il in xi q'ot kye qe pal.

6Mi a'ltoq qine tuj Jerusalén tej tb'aj jlu, ex tej otoq b'ant 32 ab'q'i ttzyetlen tkawin Artajerjes aju rey te Babilonia, in aj meltz'aje tuk'il tuj Babilonia ex tb'ajlenxi ela' q'ij, xi nqanine amb'il te,

7ex in ajtztzune juntl maj tu'n wule tuj Jerusalén. Atzun el nnik'e ti'j aju mya b'a'n otoq tb'incha Eliasib, tu'nju otoq txi tq'o'n jun cuart matij te Tobías, aju cuart tkub' twitz tja Dios.

8A jlu mya b'a'n ela tuj nwitze, kyja'tzun e je'tz wi'ne tkyaqil ti'xti te Tobías tokxsa'n tuj cuart lu,

9ex xi nq'o'ne orden tu'n t-saqset cuart, ex tu'n tokx kyq'o'n juntl maj tuj cuart lu, qe makb'il in che ajb'en tuj tja Dios, qe oyaj ex storak.

10Ax ikx o nb'iye qa minti' otoq txi kyq'o'n xjal kyoyaj, aju b'animaj ti'j tu'n t-xi q'ot kye aj Leví; ex tu'n jlu, qe aj Leví ex qe b'itzal, aqeju at kyoklen tu'n kyq'o'n k'ulb'il, teyle junjun otoq tz'aj oq tuj tex ttx'otx'.

11E oktzun wik'le'ne qe kawil, tu'nju otoq kyaj kykolin tja Dios. Te tib'ajxi e ok nchmo'ne qe pal ex qe aj Leví, ex kyaj b'ant kyten wu'ne juntl maj tuj kyaq'un.

12Ex kykyaqil xjal aj Judá ul kyi'n juntl maj tlaji'n ti'j twitz triw, ti'j ta'l twitz uva ex ti'j aseyt, tuj ja te k'ub'l oyaj.

13E kyajtzun nq'o'ne qe ja k'ub'l twitz awal tuj tkwent pal Selemías, tuk'ix Sadoc aju aj tz'ib'al, ex tuk'ix jun aj Leví Pedaías tb'i, ex ok nq'o'ne Hanán te onil kye, aju tky'ajal Zacur ex tal tchman Matanías, ex kykyaqil jlu q'uqlxix nk'u'je kyi'j. Atzun qe at kyoklen tu'n tkub' kysipan qe oyaj kyxol qe kyuk'il.

14Nman Dios: Chin tna'ntza ti'j ju ma b'ant wu'ne ex mi'n tzik' tna'l tu'na ju b'a'n ma nb'inchaye ti'j tjaya ex kyi'j qe k'ulb'il.

15Tuj tq'ijlalil lu, o wile tuj Judá at junjun xjal in che wab'in twitz uva tuj jun chok tu'n tb'ant vin tuj q'ij te ojlab'l, ex at in che iqan triw tuj che'lin tten, ax ikx at nno'k kyq'o'n qe bur iqal ta'l twitz uva, ex qe rasim twitz uva tuk'ix twitz higo ex tkyaqil txkaj iqtz tu'n t-xi kyk'ayin tuj Jerusalén, ax tuj q'ij te ojlab'l. E oktzun wik'le'ne tu'nju in che k'ayin tuj q'ij lu.

16Ax ikx at junjun xjal aj Tiro, aqeju ax najlqe tuj Jerusalén, in pon kyi'n kyiẍ ex tkyaqil txkaj k'aẍjel, in che k'ayin ti'j kye xjal Judiy tuj Jerusalén tuj q'ij te ojlab'l.

17E oktzun wik'le'ne qe nejenel kye xjal aj Judá ex xi nma'ne kye kyja':

—¿Tiqu'n ma kyb'inchaye mya b'a'n, tu'nju ma tz'ok kyq'o'ne q'ij te ojlab'l te minti' tajb'en?

18Atzun jlu kyb'incha qe kyxe'chele, ex tu'ntzun jlu ma tzaj ti'n Qman nimku mya b'a'n qib'aj ex tib'aj tnam lu. ¿Myapetzun tu'n ttzaj mas tq'oj Dios kyi'j aj Israel tu'nju ma tz'ok kyq'o'ne q'ij te ojlab'l te minti' tajb'en?

19Xi nma'ne kye tu'n kylamet naj qe tlamel tnam Jerusalén, o'kx ok tok qax tuj viernes ex max tu'n kyjaqet okxi tex q'ij sábado. E kub' nq'o'ne junjun xjal ajb'el weye ttzi tlamel tnam, tu'n mi'n toktz mi jun iqtz tuj q'ij te ojlab'l.

20Qe comersyant ex qe k'ayil, ex jun qonik'an kyu'n jun maj, ex qa kab' maj, ti'jxi tnam Jerusalén.

21Ex in yoline kyuk'il ti'j jlu, ex e ok wik'le'ne tu'nju e kyaj tan twitz muro te tnam, ax ikx xi ma'ne kye: Qa ma kyb'inchaye juntl maj ikju, che okex nq'o'ne pres, nchiye. Atxixtzun ya minti'tl e ul tuj q'ij te ojlab'l.

22Te tib'ajxi xi nq'o'ne orden kye aj Leví tu'n tb'aj kyxjansan kyib' ex tu'n kyxi' xq'uqil kye tlamel tnam, tu'ntzun mi'n tb'ant jun mya b'a'n tuj q'ij te ojlab'l. Nman Dios: Chin tna'ntza ti'j jlu ex q'aq'antz tk'u'ja wi'je, ik tza'n tk'ujlalila nimxix.

23Ax ikx tuj tq'ijlalil lu o wile attoq junjun xjal Judiy otoq che moje' kyuk'il qe xu'j aj Asdod, aj Amón ex aj Moab;

24ex mij kyk'wa'l in che yolin tuj kyyol aj Asdod ex qa tuj kyyol txqantl nasyon, ex minti' b'a'n kyyol xjal Judiy kyu'n.

25In yoline kyuk'il ti'j jlu ex tzaj nqanine mya b'a'n kyib'aj; at junjun e b'aj nk'ixb'isa'ne ex jatz nb'aqo'ne ttzmal kywi', ex e ok nlajwersine tu'n t-xi kytziyan jun yol axix tok twitz Dios, tu'n mi'n txi kyq'o'n amb'il kye kyme'jel tu'n kymoje' kyuk'il kyky'ajal stranjer xjal, ex tu'n mi'n ttzaj kyi'n kyme'jel stranjer xjal te t-xu'jil kyky'ajal, ex tu'n mi'n kyok qe xu'j stranjer xjal te kyex kyxu'jil. Ax ikx xi nma'ne kye:

26Atzun il jlu tb'incha Salomón aju rey kye aj Israel. Mi jun rey kyuj txqantl nasyon pon ik tza'n te, o k'ujlanjtz tu'n Dios ex ok q'o'n te rey kyib'aj kykyaqil aj Israel. Maske ikju, pero noq tu'n kylaj qe xu'j stranjer xjal, b'inchan rey Salomón il.

27Kyja'tzun mi'n wajtle tu'n nb'inteye ti'j matij il in kyb'incha'ne twitz Qman Dios, tu'nju in che moje'ye kyuk'il qe xu'j stranjer xjal, nchiye kye.

28At jun tky'ajal Joiada ex tal tchman tnejel pal Eliasib, otoq tz'ok te tji' Sanbalat aju aj Bet-horón; b'i'x ex nlajo'ne q'a lu tu'n mi'n ttentl nwitze.

29Nman Dios, na'ntza kyil qe pal ma b'aj kytz'ilsa'n kyoklen ex ma che ik' tib'aj yol kyaj b'ant ti'j tu'na kyuk'il qe pal ex qe aj Leví.

30Kyja'tzun, xi nq'o'ne orden kye tu'n tel kypa'n kyib' ti'j tkyaqil mya b'a'n in kyb'incha'n stranjer xjal, ex b'anttzun kyu'n ikju. B'anttzun kyten qe pal ex qe aj Leví wu'ne tuj kyturn, teyle junjun alkye tu'n tb'ant tu'n.

31Ax ikx kyaj b'ant ti'j wu'ne alkye tu'n ttzaj q'inte si' tuj q'ij b'anin ti'j ex tu'n ttzaj kyi'n xjal tnejel twitz kyawal. Nman Dios: Chin tna'ntza ex q'ontza t-xtalb'ila wib'aje.