Apocalipsis 3 - Mam Huehuetenango New Ortography

Aju tyol Crist kye okslal ate' tuj tnam Sardis

1Ex tz'ib'anxa teju anjel at kyxol okslal tuj tnam Sardis: Atzun jlu in tma'n aju at kywuqil T-xew Dios tuk'il ex kyuk'ix qe wuq che'w: Ojtzqi'n kyb'inchb'ene wu'ne, ex b'a'n wu'ne in q'manjtz kyi'je qa itz' qeye, pero kyimni qeye.

2Kyna'ntztzun kyib'e, ex kykyuwsame aju atx kyuk'ile aju ch'ix tnaj; porke ma wile qe kyb'inchb'ene mya tz'aqlxix twitz Dios.

3Kyja'tzun, kyna'ntze aju xnaq'tzb'il ma kyk'ame ex ma kyb'iye; kyk'u'nxe ex tajtz ti'j kyanmiye. Qa minti' ma che xq'uqine, chin ule ik tza'n eleq', ex mlayx kyb'iye alkye or tu'n wule kyuk'ile.

4Pero at junjun kyxole tuj tnam Sardis minti' ma tz'ilix ti'j kyxb'alun; atzun qeju che b'etel wuk'ile tok kyxb'alun saq, tuj tumelxix jlu porke b'a'n qe.

5Alkye ma kub' ti'j mya b'a'n tu'n, atzunju k'okel t-xb'alun saq; ex mlay jatz nq'uchine tb'i tuj libro te chwinqlal, ex kxel nchik'b'a'ne twitz Nmane ex kywitz qe t-anjel qa ax tok okslal wi'je.

6Alkye at t-ẍkyin, b'inx aju in tma'n Xewb'aj Xjan kye kykyaqil okslal tuj junjun tnam.

Aju tyol Crist kye okslal ate' tuj tnam Filadelfia

7Ex tz'ib'anxa teju anjel at kyxol okslal tuj tnam Filadelfia: Atzun jlu in tma'n aju xjan, ex aju ax tok tyol, ex q'i'n tal ja te rey David tu'n, in jaqet tlamel ja tu'n ex mi jun xjal jaku b'ant tu'n tlamet tu'n, ex in lamet tlamel ja tu'n ex mi jun xjal jaku b'ant tu'n tjaqet tu'n.

8Ojtzqi'n kyb'inchb'ene wu'ne. Lu ma jaqet wu'ne jun ttzi ja kywitze, ex mi jun xjal jaku b'ant tu'n tlamet tu'n; b'a'n wu'ne noq ch'in kyipumale at, ex ma japun nyole kyu'ne ex minti' ma kub' kyewane kywitz xjal qa ojtzqi'n qine kyu'ne.

9Ex qeju kyq'on kyib' te Satanás, qeju in kyma'n qa judiy xjal qe ex mya judiy xjal qe, noq o'kx in che nik'an yol, che tzajel wi'ne tu'n kykub' ẍmeje' kywitze, ex tu'n tel kynik' ti'j, aqine ẍin k'ujlan kyeye.

10Tu'nju ma japun nyole kyu'ne ex ma tzik'x yajb'il kyu'ne, kyja'tzun che kletele wu'ne ok tul kanun tq'ijlalil ok kyok kykyaqil xjal tuj joyb'il kyi'j, aqeju najl qe twitz tx'otx'.

11Jurat chin ul naje; aju at kyuk'ile kytzyumxixe wen, tu'ntzun mi'n tel q'i'n ju oyaj kyeye tu'n juntl.

12Alkye ma kub' ti'j mya b'a'n tu'n, k'okel nq'o'ne te tqan ja tuj tja Dios, mlayx tz'etz, axtzun kyjel ten; ex k'okel ntz'ib'ane tb'i Dios ti'j ex tb'i jun tnam aju etzan tu'n Dios, aju ak'aj Jerusalén tb'i, aju kb'eletz tuj kya'j jatum ta' Dios, ax ikx k'okel ntz'ib'ane ti'j aju nb'iye ak'aj.

13Alkye at t-ẍkyin, b'inx aju in tma'n Xewb'aj Xjan kye kykyaqil okslal tuj junjun tnam.

Aju tyol Crist kye okslal ate' tuj tnam Laodicea

14Ex tz'ib'anxa teju anjel at kyxol okslal tuj tnam Laodicea: Tkyaqilju o b'ant tu'n Dios t-xe tnejel, ti'j Jesucrist tzaj xe't; ate Jesucrist junx ti'j tyol, ex atzun jun testiw in japunxix tu'n ex axix tok tyol. Atzun jlu in tma'n Jesucrist:

15Ojtzqi'n kyb'inchb'ene wu'ne. B'a'n wu'ne mya che'w ate'ye ex mya kyaq ate'ye. Mas b'a'nwtlo noqwit che'w ate'ye ex qa kyaq.

16Pero tu'nju mya che'w ate'ye ex mya kyaq, noq o'kx q'ulq'aj ate'ye, kyja'tzun che eletz ntzub'ane tuj ntziye.

17Porke in kyma'ne kyja': q'inun qo'ye, nimxix at qeye, ex minti' ch'in atx taj qeye, che chiye, pero minti' nne'l kynik'e ti'j qa puro tuj b'is ate'ye, ex minti' jun b'a'n at kyeye, meb'a qeye, moẍ qeye, ex minti' kyxb'alune.

18Kyja'tzun kxel nq'o'ne jun kyconseje: Kylaq'onxe q'an pwaq wuk'ile, saqsa'maj tu'n q'aq', tu'ntzun kyoke q'inun; ex kylaq'onxe saq xb'alun wuk'ile tu'n tok kyi'je tu'ntzun mi'n kych'ixwiye tu'nju minti' kyxb'alune tok; ex kylaq'onxe tq'anb'il kywitze wuk'ile tu'n tokx kyq'o'ne tuj kywitze tu'ntzun tb'anix kywitze.

19Aqeju k'ujla'n wu'ne in che'x nkawine ex in che kub' tuj castiw wu'ne. Kyja'tzun tz'ok tililx kyu'ne ex tajtz ti'j kyanmiye.

20Lu qine atine ttzi ja ex in chin q'ajtzane; qa at jun ma b'inte tq'ajq'ajel nwi'ye ex ma tz'okx tjaqo'n tlamel ja, chin okexe tuk'il, ex chin wa'le tuk'il, ax ikx te kwa'l wuk'ile.

21Alkye ma kub' ti'j mya b'a'n tu'n, kxel nma'ne te tu'n tkub' qe' wuk'ile tuj nq'uqb'ile jatum in chin kawine, ik tza'n weye ma kub' ti'j mya b'a'n wu'ne, ex ma chin kub' qe'ye tuk'il Nmane tuj tq'uqb'il.

22Alkye at t-ẍkyin, b'inx aju in tma'n Xewb'aj Xjan kye kykyaqil okslal tuj junjun tnam.