Zacarías 1 - Mam Huehuetenango New Ortography

Aju txokb'il tu'n Qman kyi'j qe xjal etzan tu'n

1Tuj twajxaqin xjaw te tkab'in ab'q'i ttzyetlen tkawin rey Darío, tzaj tma'n Qman jun tqanil te t-sanjel Zacarías tb'i, aju tky'ajal Berequías ex tal tchman Ido. Tzaj tma'n Qman kyja':

2Aqine Dios aju Tajaw Tkyaqil tzaj nimxix nq'oje kyi'j qtzan kyxe'chele.

3Kyja'tzun, txi'ya te nxele ex q'manxa jlu kye xjal: Kyajtz meltz'aje wuk'ile ex jaku chin aj meltz'aje kyuk'ile, chi Dios, chikuya kye. Aqine Dios in chin q'mante jlu.

4Mi'n kyb'inchaye ik tza'n kyb'incha qtzan kyxe'chele, aqeju o q'manjtz kye kyu'n qe nsanjele ojtxi tu'n tkyaj kykolin b'e mya b'a'n ex kyb'inchb'en mya b'a'n, atzun kye minti' o kyajb'e tu'n t-xi kyb'i'n nyole ex tu'n t-xi kyniman qine. Aqine Dios in chin q'mante jlu.

5Atzun ja'lo ¿jatumtzun ate' qtzan kyxe'chele? ¿Kukxpetzun che anq'il qe nsanjele?

6O che japun qe nyole ex qe nleye xi nma'ne kye nsanjele kyi'j qtzan kyxe'chele; kyja'tzun e ajtz meltz'aj wuk'ile ex kyma kyja': Ate Qman aju Tajaw Tkyaqil ma tb'incha qi'j ik tza'nx kub' t-ximan, tu'n tkub' tq'o'n qcastiw ik tza'nx qb'inchb'en, che chi.

Aju o til Zacarías kyi'j qe xjal kyjax kyib'aj chej

7Aqine Zacarías t-sanjel Dios, tky'ajal Berequías ex tal tchman Ido, o nk'ame tqanil lu te Qman tuj 24 tajlal tjunlajin xjaw, aju xjaw tok tb'i Sebat, tuj tkab'in ab'q'i ttzyetlen tkawin rey Darío.

8At jun qonik'an at jun tzaj yek'un weye mer ik tza'n tuj witzik': O wile jun xjal tjax tib'aj jun chej kyaq ke'yin. Wa'l tkub' tuj jun chq'ajlaj kyxol txqan tze' q'atxab' ex ti'jxi attoq juntl k'loj chej, at junjun kyaq che ke'yin, junjuntl sib' kyi'j ex junjuntl saq che ke'yin.

9Atzun weye xi nqanine kyja': Tat, ¿alkyetzun qe xjal lu kyjax kyib'aj chej? Atzunte anjel aju in yolin wuk'ile tzaj ttzaq'we'n: Kxel nyek'une teya alkye qe.

10Atzunte xinaq aju wa'ltoq kyxol tqan q'atxab' tma kyja': Atzun qe jlu ma che'x t-sama'n Qman tu'n kyxi' b'etel tuj tkyaqil twitz tx'otx', chi anjel.

11Atzun kye xjal kyjax kyib'aj chej xi kyma'n te t-anjel Qman, aju wa'ltoq kyxol tqan q'atxab', che chi kyja': Ma qox aje b'etel tuj tkyaqil twitz tx'otx' ex ma qile qe xjal ate' tuj tzalajb'il ex tuj txub'txaj.

12Atzunte t-anjel Qman tma: Nman, aya Tajaw Tkyaqil, ma b'ant-xi 70 ab'q'i in q'ojina kyi'j aj Jerusalén ex kyi'j qe tnam ate' tuj Judá. ¿Jtojtzun b'an ttzaj q'aq'an tk'u'ja kyi'j juntl maj?

13Atzunte Qman tzaj tma'n yol b'a'n ex te q'uqb'ab'l k'u'jb'aj teju anjel aju in yolintoq wuk'ile,

14ex tzaj tma'n anjel weye tu'n t-xi nma'ne jlu: Atzun jlu in tma'n Qman aju Tajaw Tkyaqil: Tu'n tkyaqil wanmiye in nk'ujla'ne aju tnam Jerusalén ex aju witz Sión.

15Kyja'tzun ma tzaj nimxix nq'oje kyi'j qe nasyon lu ate' tuj txub'txaj ja'lo. Weye noq ch'in nq'oje tzaj kyi'j qe xjal etzan wu'ne, atzun kye nasyon lu e ik' tib'aj aju castiw xi nma'ne kye tu'n kyb'inchante.

16Kyja'tzun in xi nma'ne jlu: Ma chin ul meltz'aje tuj Jerusalén tuk'il tq'aq'b'il nk'u'je ex kjawil b'inchet juntl maj njaye, ax ikx ju tnam.

17Ax ikx tzaj tma'ntl anjel weye: Ax ikx q'manxa jlu: Ate Qman aju Tajaw Tkyaqil chi in tma'n kyja': Kchmetel juntl maj nimxix q'inumab'l kyuj qe tnam etzan wu'ne; kxel nq'uqb'a'ne juntl maj kyk'u'j aj Sión ex kjawil nsk'o'ne juntl maj aju tnam Jerusalén.

Aju o til Zacarías kyi'j qe cach ex qe tx'inol k'uxb'il

18At juntl tzaj tyek'un Qman weye mer ik tza'n tuj witzik', o wile kyaje cach.

19Xi nqanine te anjel aju in yolintoq wuk'ile, ¿Ti kyxilen qe cach lu? Atzun te tzaj ttzaq'we'n: Qe cach lu, atzun in tma'n kyi'j qe nasyon e b'aj sputun kye qe xjal najlqe tuj Judá, tuj Israel ex tuj Jerusalén, chi anjel.

20Te tib'ajxi tzaj tyek'un Qman weye kyaje tx'inol k'uxb'il.

21Atzun weye xi nqanine: ¿Tiqu'n ma che ul qe tx'inol k'uxb'il lu? Atzunte anjel tzaj ttzaq'we'n: Qe kyaje cach, atzun qe e b'aj kysputunte qe xjal najlqe tuj Judá ex mi a'l jun ten tipun tu'n tq'ojin kyuk'il. Atzun qe tx'inol k'uxb'il lu ma che ul xob'tzal kye ex tu'n tel kyi'n kyipumal qe nasyon e b'aj sputunte kye qe xjal najl tuj Judá, chi anjel.