1At jul tjaq' tx'otx' jatum in jatz saq pwaq, ex at lugar jatum in b'aj saqset q'an pwaq.
2Aju ttx'otx'il k'uxb'il, a in jatz tuj tx'otx' ex ok tokx q'o'n ab'j tuj q'aq' in kub' ulj ex nno'k te q'an k'uxb'il.
3Kyu'n xjal knet tumlal tza'n tten tu'n tten spik'un tuj qlolj, in che ku'x max t-xe'pun tx'otx' tuj qlolj ex atzun ma chixin in che ok ten jyolte qe ab'j.
4In che ku'x ti'j jun saqb'aq tuj jul ex in ku'x kylaku'n toy' jul kyuj qe lugar jatum minti' jun xjal najl, jatum minti' jun xjal nnik' b'et ex puro najchaq ti'j tnam.
5Tib'aj tx'otx' in tzaj ch'iy triw, atzun tujxi, mer ik tza'n nojni tu'n q'aq'.
6Atzun in che knet qe tal ab'j zafiro kyb'i, tuk'ix q'an pwaq, t-smon tib' tuk'il tx'otx'.
7Mi qe q'anjan, mi qe k'utz, b'ajx kyil qa at jun b'e tjaq' tx'otx'.
8Qe txkup ate' tjaq' k'ul minti' in che ik' b'et tuj, ax ikx qe b'alun.
9Nne'tz kyi'n xjal qe ab'j kyuwxix tu'n kyq'ab', ex in b'aj kylaku'n tuj kyk'u'j witz.
10In che jaqet qe toy' pik kyu'n, ex tkyaqil txkaj q'inumab'l in knet kyu'n.
11In che maqet qe nima kyu'n jatum in che tzaj jlet, ex nne'tz kyi'n tuj spik'un qe ti'xti ate' tuj ewaj.
12Pero ¿Jatum in tzaj aju nab'l? ¿Alkye lugar ta' aju ojtzqib'l?
13Minti' b'a'n kyu'n xjal jte' twi' ju nab'l, ex mlay knet kyu'n tzalu twitz tx'otx'.
14Aju nintz mar in tma'n: Minti' at tzalu, ax ikx in tma'n mar: Minti' at wuk'ile.
15Mlay chjet tu'n q'an pwaq ex mlay laq'et tu'n saq pwaq.
16Mlay b'ant tchjet tu'n q'an pwaq tb'anilxix, ex mi kyu'n qe tal ab'j tb'anilxix, qe cornalina ex qe zafiro kyb'i.
17Mas wi'yilxix twitz q'an pwaq ex twitz ju ab'j cristal tb'i; mlay b'ant tch'expunjtz kyuk'il qe makb'il q'an pwaq kytx'otx'il.
18Aju nab'l mas tb'anilxix twitz ab'j coral tb'i, twitz ab'j cristal tb'i ex kywitz qe tal ab'j perla kyb'i.
19Aju ab'j at tuj Etiopía, topacio tb'i, mlay pon ik tza'n nab'l, ex mlay b'ant tchjet tu'n q'an pwaq tb'anilxix.
20¿Jatumtzun in tzaj aju nab'l? ¿Alkye lugar ta' ju ojtzqib'l?
21Ewan kywitz qe txkup ate' tjaq' k'ul ex kywitz qe chyu'j in che lipan twitz kya'j.
22Ax ikx in kyma'n aju kynajb'il kyimni ex ju kamik: Noq ch'in tqanil o qb'iye ti'j jlu.
23Pero ate Dios tzqilte b'e jatum ta' nab'l, o'kx te b'a'n tu'n jatum in knet,
24porke in til Dios max jatum ponin b'aj ttxa'n tx'otx' ex in til tkyaqilju at tjaq'xi kya'j.
25Tej t-xi tq'o'n Dios talil kyq'iq' ex tej tkub' tq'o'n kymojonil qe nintz mar,
26tej tkyaj b'ant tu'n tza'n tten tu'n ttzaj jb'al, ex tej tkyaj tq'o'n tb'e q'ankyoq,
27ax ikx o til Dios tz'aqlxix te nab'l tu'n tajb'en, b'aj tke'yin ex tma: B'a'n aju nab'l.
28Xi tma'n Dios kye xjal: Aju tu'n kynimane weye, atzun nab'lju; aju tu'n tel kypa'n kyib'e ti'j ju mya b'a'n, atzun ojtzqib'lju.
Who We AreWhat We EelieveWhat We Do
2025 by iamachristian.org,Inc All rights reserved.
