Isaías 15 - Mam Huehuetenango New Ortography

Aju tqanil q'manjtz ti'j ju ktzajel kyi'j aj Moab

1Atzun yol jlu tzaj tma'n Qman kyi'j aj Moab:

Tuj junx qonik'an ma naj tnam Ar tuj kytx'otx' aj Moab, ex b'i'x ma b'aj xitj; tuj junx qonik'an ma naj tnam Kir tuj kytx'otx' aj Moab, ex b'i'x ma b'aj xitj.

2Qe xjal tuj tnam Dibón ma che jax oq'el tuj tja kydios, aju tkub' twi' tal witz. Ma che jaw oq' aj Moab tu'nju ma naj tnam Nebo, tuk'ix tnam Medeba. Kykyaqil ma tz'el k'o'ẍin ti'j kywi', ma tz'el matzo'n kyxmaltzi'.

3In che b'et xjal kyuj cay tok kyxb'alun ch'i'x twitz; in che sch'in xjal kywi ja tu'n ta'w k'ixk'oj. Nimxix in che oq' kykyaqil xjal kyuj plas.

4Qe xjal tuj tnam Hesbón ex qeju ate' tuj tnam Eleale in che sch'in wen; in b'injtz tq'ajq'ajel kywi' max tuj tnam Jahasa. Kyja'tzun in tzaj b'aj kyk'u'j qe xinaq aj Moab, aqeju elni qe twitz q'oj, ex nimxix kyxob'il in tzaj.

5In b'isun wanmiye ti'j Moab; qe xjal najl tuj in che etz oq, in che pon max tuj tnam Zoar ex max tuj tnam Eglat-selisiya. In che oq' ok kyjaw twitz jawl tuj Luhit; tuj b'e in pon tuj tnam Horonaim in che sch'in tu'n ta'w k'ixk'oj tu'nju xitb'il otoq tzaj kyib'aj.

6Ma che aj tzqij qe twi a' tuj lugar Nimrim, ma tzqij ch'im ex ma kub' motx'j cha'x k'ul, minti' jun t-xaq tze' cha'x ma kyaj ten.

7Kyja'tzun in xi kyi'n xjal kyq'inumab'l aju otoq jaw kychmo'n, xi kyi'n ti'jxi tq'ab' xaq jatum ate' qe tze' chjaj.

8Aju tq'ajq'ajel kywi xjal in che sch'in ma pon b'aj tuj tkyaqil tx'otx' Moab; aju tq'ajq'ajel kywi' te oq'el ma pon b'aj max tuj tnam Eglaim ex max tuj tnam Beer-elim.

9Maske che noj qe nima tu'n chik', aqeju ate' tuj tnam Dimón, pero ktzajel nsama'ne txqantl mya b'a'n kyib'aj aj Dimón; kxel nsama'ne jun b'alun tu'n t-xi chyo'nte kye qeju otoq che klet tuj Moab, kyuk'ix qeju otoq che kyaj anq'in tuj kytx'otx' aj Moab.