1Nman, aya q'ol wipumale; at nk'u'je ti'ja.
2Aya kolol wi'je, aya jun lugar te kolb'il wib'e ex tzoqpilte weye. Aya Ndiose ik ttena te weye ik tza'n jun pik in chin klete tu'n, ex ik tza'n jun maqb'il in ajb'en tuj q'oj, ex tu'nju nim tipumala in chin klete, ik ttena ik tza'n jun ewb'il wib'e ma' tjax.
3Aya Nman, b'a'n tu'n tjaw nimset tb'iya; ok in chin txokone ti'ja in chin klete tu'na kywitz aj q'oj wi'je.
4Tuj nwitze mer ik tza'n otoq b'aj nskun wib'e tuj jun saqb'aq tu'n kamik; o nna'ye t-xob'il tej kyja'toq nnaje tu'n tipumal txqan a'.
5Mer ik tza'n otoq chin kub' xwakune tu'n saqb'aq tu'n nkyime; ex mer ik tza'n otoq chin tzyete tu'n tk'ob'il kamik.
6Tej in chin b'isuntoqe in ok tene txkolte Qman, xi nqanine onb'il te Ndiose, ex in tzaj b'i'ne tu'n max tuj tja; pon tq'ajq'ajel nwi'ye tuj t-ẍkyin.
7Tzajtzun jun nintz kyaqnajnab' ex e tzaj yukch kyq'uqb'il qe witz; b'i'x e b'aj yukch tu'n ttx'u'jil Qman.
8Etz sib' tuj ttxa'n, atzun tuj ttzi' etz jun q'aq' in tz'e'y nimku tu'n; ax ikx nne'tz xq'a'l tuj ttzi' in k'ant wen.
9Jaqet twitz kya'j tu'n ex ku'tztzun. Attoq txqan q'eq muj tjaq' tqan.
10Jax ten tib'aj jun querubín ex tzaj lipan; tib'aj kyq'iq' tzaj lipan.
11Kub' tq'o'n q'eq muj nojni tu'n a' ex qloljxix ke'yin; ik tenb'a tu'n ik tza'n jun xb'alun te maqb'il, ex atzun okx tewan tib' tuj.
12Etz jun spik'un twitz in qoptz'aj wen; tuj muj tzaj chitj saqb'aqun ex xq'a'l in k'ant.
13Ate Qman aju ma'xix toklen, max tuj kya'j o b'injtz tq'ajq'ajel twi' in julin wen tuk'il saqb'aqun ex xq'a'l in k'ant.
14E tzaj t-xo'n qe tplech tuk'ix tqan q'ankyoq, atzun qe aj q'oj ti'j b'i'x e je'l oq ex b'i'x b'aj kysputun kyib'.
15B'i'x q'ancha'lin aju t-xe'pun mar, ikx qe tq'uqb'il tx'otx' tu'nju tq'ajq'ajel twi' Qman puro kyuw wen, ex tu'nju kyuwxix tzaj t-xupin.
16Max tuj kya'j tzaj tnuqpi'n tq'ab' Dios wi'je, ex tu'n tq'ab' in jatze tuj nintz mar.
17O chin klete tu'n tuj kyq'ab' aj q'oj wi'je, aqeju in el ik'une kyu'n ex at mas kyipun nwitze.
18E ok tzoqpaj wi'je tej otoq tzaj jun yajb'il wi'je, ex ate Qman tzaj oninte weye:
19In tzoqpete tu'n tu'n ntene tuj jun chq'ajlaj ma' twitz; in klete tu'n tu'nju at tk'ujlalil wi'je.
20Ma tzaj q'o'n chojb'il weye tu'n Qman, tu'nju b'a'n nb'inchb'ene twitz,
21ex tu'nju kukx in b'ete tuj tb'e ex mi jun maj ma tz'el npa'n wib'e ti'j Dios.
22Kukx in chin ximane kyi'j qe tmandamyent; mi jun maj ma tz'el wik'une qe tley.
23Ma chin tene twitz minti' npaltile; ma tz'el npa'n wib'e ti'j mya b'a'n.
24Ma tzaj tq'o'n Qman chojb'il weye tu'nju minti' npaltile twitz.
25Aya Nman, tz'aqlxixa tuk'il ju xjal tz'aqlxix, ex puro b'a'na tuk'il ju xjal b'a'n tmod,
26puro b'a'na tuk'il ju xjal saq tuj tanmi, ex ax kyuwa ti'j ju xjal elni twitz tu'n t-sb'un.
27In che tklo'na qe xjal mans, atzun qeju in jaw kyniman kyib', in che ok tq'o'na te minti' kyajb'en.
28Aya Nman in tzaj q'onte spik'un weye, aya Ndiose, tu'na in tzaj tq'o'na spik'un tuj qlolj jatum atine.
29Tu'nju onin qine tu'na, chin okel tzoqpaje kyi'j qe aj q'oj wi'je, ex chin okexe twi muro tok ti'jele kytanmi.
30Aju tb'e Dios puro tz'aqlxix; aju yol in tzaj ttziyan b'a'n tu'n tqe' qk'u'j ti'j; ate Dios kolol kye kykyaqil qeju in qe' kyk'u'j ti'j.
31¿Atpe juntl Dios? Minti'. O'kx a Dios jaku qo klet tu'n.
32Ate Dios in tzaj q'onte wipune, a onil weye tu'n ntene minti' npaltile,
33a in tzaj q'onte tipumal nqane tu'n tb'ant nqelane ik tza'n jun masat, ex a in jax q'inte weye twi' jun lugar ma'xix tjaw, jatum tu'n ntene segurxix,
34a in tzaj q'onte xnaq'tzb'il weye tza'n tten tu'n tb'ant nq'ojine, ex a in tzaj q'onte wipune tu'n tli'pj ti'j xob'l plech wu'ne, aju q'an k'uxb'il ttx'otx'il.
35Aya kolol wi'je ex in chin klete tu'na, tzyu'n qine tu'n tb'anq'ab'a; tu'nju t-xtalb'ila puro b'a'n ma tz'el weye.
36Mya kyuw ma tz'e'la nb'eye tu'na, ex b'ajx che ex jilj qe nqane.
37Inx lpe'ye kyi'j aj q'oj wi'je, ex e pon knet qe wu'ne, maxi in ajtze tejxi kykub' b'aj wu'ne.
38Kub' kyi'j wu'ne ex e kub' tz'aq twitz tx'otx'. Minti'tl e jaw we'. E kub' tz'aq qe t-xe nqane.
39Aya tzaj q'onte wipumale tuj q'oj; o tb'inchaya tu'n kykub' mok'e' qe xjal nwitze, aqeju aj q'oj wi'je,
40ex nwitze e je'l oq qe aj q'oj wi'je; kyja'tzun e naj wu'ne aqeju in che el ik'un weye.
41E qanin onb'il, ex minti' jun onin kyi'j; e kub'san twitz Qman, ex minti' e tzaj ttzaq'we'n.
42B'i'x e naj wu'ne mer ik tza'n quq in xi ti'n kyq'iq'. E b'aj nwab'ane mer ik tza'n tx'otx' tuj cay.
43Ma chin klete tu'na te jun tnam mib'an b'in, ma chin ok tq'o'na te nejenel kyib'aj qe nasyon, qe xjal minti' ojtzqi'n wu'ne in che ajb'en weye.
44Ok in chin yoline kye in chinx kyniman, ex in chin kub' b'i'ne kyu'n qe stranjer xjal.
45Qe stranjer xjal in tzaj tchi kyi'j, ex in che lu'lun ok kyetz tuj lugar te kykolb'il kyib'.
46Itz' te Qman. Nimanxwit aju kolol wi'je. Jawxwit nimsa'n Dios aju klol weye.
47Atzunju Dios ma q'onte t-xel kyi'j qe aj q'oj wi'je, ex ma che kyaj tq'o'n qe tnam tjaq' nkawb'ile.
48Ate Qman ma klon weye kye qe aj q'oj wi'je, aqeju jaw kyi'n kyib' tu'n kyq'ojin wi'je. Aya Nman, ma chin klete tu'na tuj kyq'ab' qe xjal jawni kywitz tu'n kyq'ojin.
49Kyja'tzun kjawil nnimsa'ne tb'iya kyxol qe nasyon, ex chin b'itzale tu'n tjaw nimset tb'iya.
50In tq'o'na tipumal ju rey sk'o'maj tu'na tu'n tkub' kyi'j qe aj q'oj tu'n; kukx in tb'incha'na xtalb'il te David ex kye qe tiyjil.
Who We AreWhat We EelieveWhat We Do
2025 by iamachristian.org,Inc All rights reserved.