1-2Tejtzun kyb'inte xjal qa in oq'toq rey ex in b'isuntoq tu'n tlaj otoq kyim Absalón aju tky'ajal, e je'xtzun q'malte te Joab. Kyja'tzun, aju tzalajb'il tej tkub' kyi'j aj q'oj tuj q'ij lu ok te b'is.
3Tuj ewaj e okx qe soldad tuj tnam, in che ch'ixwi mer ik tza'n otoq che el oq tuj q'oj.
4Atzunte rey ok tmaqsi'n twitz ex jaw tq'ajq'ajel twi' kyuw wen: Ay nk'wa'l Absalón, ay nk'wa'l Absalón, nk'wa'l Absalón.
5Xi'tzun Joab tuj tja rey ex xi tma'n te:
—Ja'lo ma che el qe ajb'el teya tuj kych'ixwi tu'na, Tat Rey, aqeju ẍe klonte teya kyuk'ix qe tky'ajala, qe tme'jela ex qe t-xu'jila.
6Matzun tyek'uya ja'lo qa minti' taja kyi'j qe nejenel kye t-soldadiya ex qe xjal ma' kyoklen ate' ttxlaja, ex k'ujla'n tu'na qeju in che ik'un teya, ex ik'un tu'na qeju in che k'ujlan teya. Matzun tz'el nnik'e ti'j ja'lo Tat Rey, mas b'a'n te teya noqwit itz'x Absalón, ex maske qkyaqile otoq qo kyime.
7Txi naja ja'lo Tat Rey, ex q'uqb'anxa kyk'u'j qe xjal lepchqe'k ti'ja, ex qa mi'n, kxel nma'ne teya jun yol axix tok twitz Qman, tuj qonik'an ja'lo mi jun xjal kyjel ten tuk'ila. A jlu, masxix mya b'a'n k'elel te teya twitz tkyaqilju mya b'a'n o tzaj ti'ja tej atxix ku'xuna ex asta ja'lo, chi Joab.
8Jawtzun we' rey ex xi' tu'n tkub' qe' ttzi tlamel tnam. Tej t-xi q'ma'n kye kykyaqil xjal qa q'uqltoq rey ttzi tlamel tnam, e je'xtzun kykyaqil tuk'il rey.
Tej tul meltz'aj juntl maj David tuj JerusalénAtzun kye soldad aj Israel kykyaqil otoq che aj oq kyja.
9Ex kykyaqil k'loj kyiyjil aj Israel in che yolintoq ti'j ex in kyma'ntoq: Tu'n rey David o qo klet tuj kyq'ab' aj Filisteo ex tuj kyq'ab' aj q'oj qi'j, ex noq tu'n tlaj Absalón ma tz'ex oq tzalu tuj qtanmi.
10Atzunte Absalón aju otoq tz'ok qq'o'n te qrey ya ma kyim tuj q'oj. ¿Ti in b'aj qe? ¿Tiqu'n mi'n sajtz qxmoxin rey David quk'il? Che chi.
11Pon tqanil max tuj tja rey David ti'j tkyaqilju yol in che yolin aj Israel ti'j. Atzunte rey David xi t-sama'n jun xjal q'malte kye pal Sadoc ex Abiatar: Che yoline kyuk'il qe kytijil xjal tuj Judá ex kyqaninxe kye tiqu'n na'nx ttzaj kyma'n weye tu'n waj meltz'aje tuj njaye, ex kykyaqil txqantl k'loj kyiyjil aj Israel ma tzaj kyma'n weye tu'n waj meltz'aje.
12Kymanxe kye qa mya tuj tumel tu'n aqe tu'n kykyaj ten te mankb'il tu'n kymante jun yol tu'n waj meltz'aje, ex ax qerman qe qib' kyuk'il, chi David.
13Ax ikx xi tma'ntl tu'n t-xi kyma'n te Amasa kyja': Chi rey in tma'n teya: Ax wermaniya, kyja'tzun aya k'okel te nejenel kye nsoldadiye te t-xel Joab. Qatzun mi'n ma japun wu'ne ikju, kub'wit ncastiwoye kyuwxix wen tu'n Dios.
14Kyja'tzun tten kub' ti'j kynab'l kykyaqil aj Judá ex kykyaqil xjal lu ok junx kyximb'etz, xitzun kysama'n tqanil te rey tu'n tajtz meltz'aj kyuk'ix kykyaqil qe t-soldad.
15Kub'tzun b'e tu'n rey ex ajtz meltz'aj ex ul ttzi nima Jordán. Atzun kye aj Judá pon kychmon kyib' tuj Gilgal tu'n kyxi' kanul ti'j ex te onilte tu'n tik'tz tuj nima Jordán.
16Ax ikx te Simei aju tky'ajal Gera, aju tiyjil Benjamín ex aj Bahurim, tzaj naj ex kub'il kyuk'il aj Judá tu'n t-xi' kyuk'il k'molte rey David,
17uk'in jun mil xjal tiyjil Benjamín tu'n. Atzunte Siba aju kymajen qe tiyjil Saúl, tuk'ix olaj tky'ajal ex winqin tmajen uk'in tu'n, otoq pon nej tej tpon David.
18Ik'xtzun Siba tuj xajb'il a' tu'n tonin kyi'j qeju ate' tuj tja rey David, tu'n kyik'tz tuj nima ex tu'n tb'ant tu'n noq alkye ktzajel tma'n rey te. Tej kyja'toq tik'tz rey tuj nima Jordán, kub' mutze' Simei twitz,
19ex xi tma'n te:
—In chin kub'sane twitza Tat Rey tu'n mi'n ttzaj tna'na npaltile, ex tu'n mi'n ttzaj tna'na wile, aju o nb'inchaye twitza tej tetza tuj Jerusalén. Mi'n tzaj tlo'ch tk'u'ja wi'je,
20porke ma tz'el nnik'e ti'j, aqine at npaltile, ex tu'ntzun jlu aqine ma chin ul neje kanul ti'ja, kywitz kykyaqil qe tiyjil José, chi Simei.
21Atzunte Abisai aju tal Sarvia tma:
—¿Myapetzun il ti'j tu'n tkyim Simei tu'nju tzaj tqanin castiw tib'aj rey sk'o'maj tu'n Qman?
22Atzunte David xi ttzaq'we'n:
—Minti' kyoklene ti'j jlu aqeye tal Sarvia. ¿Tiqu'n in che ok meltz'aje wi'je? Ja'lo b'a'n wu'ne aqine rey kye aj Israel, kyja'tzun mi jun aj Israel knajel tuj q'ij lu.
23Te tib'ajxitzun o yolin rey tuk'il Simei, ex xi tma'n jun yol axix tok te qa minti' tu'n tkyim.
24Ax ikx te Mefi-boset aju tal tchman Saúl tzaj kanul ti'j rey. Atxix tej tetzlen rey ex tejxi tpon meltz'aj tkub'lenxi kyi'j qe aj q'oj tu'n, na'nxtoq tel ttx'jo'n Mefi-boset ti'j tqan mi ti'j t-xb'alun, ex na'nxtoq tel tmatzo'n ttxa'n t-xmatz tu'n tlaj tb'is.
25Tej tul kanul ti'j rey tuj Jerusalén xi tma'n rey te:
—Mefi-boset ¿tiqu'n minti' xi'ya wuk'ile?
26Atzunte xi ttzaq'we'n:
—Tat Rey, in kub' sb'u'ne tu'n nmajene. Tu'nju kox qine, xi nma'ne te tu'n tok tq'o'n t-siy jun bur tu'ntzun njaxe chejil tib'aj tu'ntzun nxi'ye tuk'ila,
27pero aju nmajene noq ma nik'an yol wi'je twitza. Maske ikju, pero aya Tat Rey ik ttena ik tza'n jun t-anjel Dios, ex b'inchama noq alkye b'a'n tuj twitza.
28Maske kykyaqil wermaniye iltoq ti'j tu'n qkyime tu'na Tat Rey, ex aqine tmajena in txkonjtze tu'na ax tu'n nwa'ne tuk'ila ti'j tmesa. Ya minti'tl mas tu'n t-xi nqanine teya Tat Rey, chi Mefi-boset.
29Atzunte rey xi ttzaq'we'n:
—Ti til txqantl yol tu'n qyolin ti'j. Ya ma txi nma'ne tu'n tkub' tmij ttx'otx'a tuk'il Siba.
30Atzunte Mefi-boset xi ttzaq'we'n:
—E tkyaj ten tkyaqil tx'otx' te Siba. Aju weye mas b'a'n tuj nwitze, chjonte b'a'n ma tzul meltz'aja tuj tjaya, chi Mefi-boset.
31Ax ikx te Barzilai aju aj Galaad otoq tzaj tuj Rogelim onil te rey tu'n tik'x tuj nima Jordán, ex axtzun tu'n tb'aj tq'olb'en tib' tuk'il rey.
32Ex toktoq Barzilai twi' 80 ab'q'i. Otoq tijin wen ex tuj tq'ijlalil tej tten rey tuj lugar Mahanaim otoq txi tq'o'n Barzilai tkyaqilju at tajb'en te rey, ex q'inuntoq.
33Xitzun tma'n rey te Barzilai:
—Qo' wuk'ile tuj Jerusalén ex jaku tz'ok nkwentine ma chixin.
34Atzunte Barzilai xi ttzaq'we'n:
—Tat Rey, ya noq nik'xi ab'q'i tu'n ntene twitz tx'otx', ex tza'n tten tu'n nxi'ye tuk'ila tuj Jerusalén.
35Ma chin japune twi' 80 ab'q'i, ya minti' tk'ok'jal nnik'b'eb'le ex tk'ok'jal nk'a'ye tuj ntzi'ye, ja'lo mlay txi nma'ne qa at tk'ok'jal ex qa minti' tk'ok'jal nnik'b'eb'le, ex ya minti' in nb'i'ntle tq'ajq'ajel kywi' qe b'itzal. Ex mi'n waje tu'n t-sikta wu'ne ok wok tkwentina.
36Noq o'kx ẍin ul ch'ine te tuk'ila Tat Rey ok tik'xa tuj nima Jordán, ex mi'n b'isuna ti'j tu'n ttzaj tq'o'na jun chojb'il weye.
37Noq o'kx chin kub'sale twitza tu'n ttzaj tq'o'na amb'il weye tu'n waj meltz'aje tuj ntanmiye tu'n nkyime ma chixin ex tu'n nku'x maqu'ne jatum ku'x maqu'n qtzan nmane ex qtzan ntxu'ye. Ex lu juntl ajb'el teya lu, Tat Rey: Aju nky'ajale Quimam. E t-xi' tuk'ila, b'ix tila ti k'okel tu'na ex b'inchama ti'j alkye b'a'n tuj twitza, chi Barzilai.
38Atzunte rey xi ttzaq'we'n:
—E t-xi' Quimam wuk'ile, ex ok nb'incha'ye ti'j noq alkye b'a'n tuj twitza. Ex tkyaqilju ktzajel tqanina weye, jaku txi nq'o'ne, chi rey.
39Kykyaqiltzun xjal e ik'x tuj nima Jordán. Ex tej tik'x rey, el ttz'ub'an twitz Barzilai tu'n tb'aj tq'olb'en tib' tuk'il. Ajtzun Barzilai tu'n tpon tja.
40Atzunte rey kyja' xi' tuj Gilgal, uk'in Quimam tu'n, kyuk'ix kykyaqil xjal aj Judá, ex mij aj Israel.
41Kykyaqil aj Israel e je'x ke'yilte rey ex xi kyma'n te:
—¿Tiqu'n aqe qermaniye aj Judá ma che'x q'inte teya Tat Rey, ex minti' ma kyma qeye, ex aqe ma che onin teya tej sik'tza tuj nima Jordán kyuk'ix qeju ate' tuj tjaya, kyuk'ix kykyaqil t-soldadiya? Che chi.
42Xitzun kytzaq'we'n kykyaqil aj Judá kye aj Israel:
—Tu'nju at qxilene tuk'il rey. ¿Tiqu'n in che q'ojine tu'n tlaj jlu? Baqa at jun ti'xti te rey ma txi qnik'b'e'ne, ex qa ma tz'el qi'ne tu'n tok te qeye.
43Atzun kye aj Israel xi kytzaq'we'n:
—Ex laj k'loj kyiyjil aj Israel qb'aje, kyja'tzun mas nim qeye qoklen ti'j rey kywitze. ¿Tiqu'ntzun in qo el kyik'une? ¿Baqa mya aqo'ye o kub' ximante tnejel tu'n tajtz meltz'aj qrey? Che chi.
Ex mas kyuw e yolin aj Judá ti'j jlu kywitz aj Israel.
Who We AreWhat We EelieveWhat We Do
2025 by iamachristian.org,Inc All rights reserved.
