Ezequiel 3 - Mam Huehuetenango New Ortography

1Tmatzun weye: Aya xjal, wa'nxa ju u'j tz'ib'an yol twitz, aju ma tzaj yek'un teya, ex txi'ya yolil kyuk'il aj Israel.

2Xitzun nk'ab'ine tuj ntzi'ye, tzaj tma'n weye tu'n t-xi nwa'ne ju u'j tz'ib'an yol twitz,

3ex tma kyja': B'alq'unxtzuna ja'lo aju u'j ma txi nq'o'ne teya, aju tz'ib'an yol twitz, ex e tnoj tk'u'ja tu'n. Xitzun nwa'ne, ex o nna'ye puro chi' wen ik tza'n ta'l kab'.

4Ex tmatl weye kyja': Txi'ya, ex q'manxa kye aj Israel aju yol kxel nma'ne kye.

5Minti' in xi nsama'na tuj jun tnam jatum junxitl yol in che yolin xjal ti'j ex kyuw tu'n tel tnik'a ti'j, ax kyxol aj Israel kxel nsama'na.

6Minti' in xi nsama'na kyuj txqantl nasyon, aqeju junxitl txkaj yol in che yolin ti'j, ex qa kyuw te teya tu'n tel tnik'a ti'j. Noqwit a xi nsama'na kyuj qe tnam lu, jaku txi b'i'n tyola kyu'n.

7Atzun kye aj Israel, baqa kxel kyb'i'n tyola, ex mi kyaj tu'n t-xi kyb'i'n aju weye nyol. Kykyaqil aj Israel kyuw kywi' ex kyuw kyanmi.

8Ax ikx teya k'okela kyuw wen wu'ne ik tza'n kye.

9K'okela kyuw wen wu'ne, ik tza'n jun tb'anil ab'j diamante tb'i mas kyuw kywitz qe txqantl ab'j. Mi'n xob'a kywitz, ex mi'n jaw sek'paja kywitz maske jumajx mib'an che b'i'n.

10Ex tmatl weye kyja': Q'ontzxix twi'ya ti'j ju yol kxel nma'ne teya, ex b'i'x q'on kyaja tuj tnab'la.

11Txi'ya ke'yil kye qe t-xjalila o che ul q'i'n tzalu, qa xi b'i'n tyola kyu'n ex qa mi'n, ex q'manxa kye kyja': Atzun jlu in tma'n Qman, chikuya, chi tzaj tma'n weye.

12In jawtzun q'i'ne tu'n tipumal Dios, ex o nb'iye jun tq'ajq'ajel ma wi'jxiye in jululun wen ex in tma'n kyja': Nimanxwit tajwalil Qman tujx tlugar.

13Aju tq'ajq'ajel o nb'iye, atzun tq'ajq'ajel kyxik' qe jil ok in pon juql te jun ti'j te juntl, ax ikx kyq'ajq'ajel qe rwed junx ate' kyuk'il; aju tq'ajq'ajel in jululun wen.

14In jawtzun q'i'ne tu'n tipumal Dios ex in etz q'i'ne tuj lugar lu, kub'tzun b'e wu'ne, tzaj ta'w tuj wanmiye, ex tzaj tlo'ch nk'u'je tu'nju tzyu'n qine kyuw wen tu'n tq'ab' Qman.

15Ex in pone tuj tnam Tel Abib ttzi nima Quebar, jatum najl qe aj Israel otoq che pon q'i'n tuj Babilonia, in kub' qe'ye kyxol, ex wuq q'ij in tene kyuk'il minti' b'a'n wu'ne alkye tu'n tb'ant, ex alkye yol tu'n t-xi nma'ne kye.

Ok q'o'n Ezequiel tu'n Dios te xq'uqil

16Tb'ajlenxi wuq q'ij lu tzaj yolin Qman wuk'ile ex tma kyja':

17Aya xjal, ma tz'ok nq'o'ne te xq'uqil kye aj Israel. Ok t-xi nma'ne jun yol teya, il ti'j tu'n t-xi tma'na kye xjal te nxele, tu'n kyb'inte alkye ktzajel kyi'j.

18Qa ma txi nma'ne tu'n tkub' t-sentens jun xjal b'inchal mya b'a'n tu'n tkyim; ex qa mi'n ma yolina tuk'il, ex qa mi'n ma txi tma'na tu'n tkyaj tkolin tmod mya b'a'n tu'ntzun kukx tanq'in, ax tok kymel xjal lu tu'n tlaj til, atzun teya ok tq'a'ya tajlal weye ti'j tkamik xjal.

19Qatzun ma txi tma'na teju xjal b'inchal mya b'a'n, ex qa ax te xjal minti' ma txi tkolin tu'n tb'inchante mya b'a'n ex minti' ma ch'expet tmod mya b'a'n, ax tok kymel te xjal lu tu'n tlaj til, atzun teya mlay kyima, porke minti' tila tu'n tlaj jlu.

20Ax ikx jun xjal tz'aqlxix, qa ma kyaj tkolin tu'n tb'inchante ju tzaq'lxix noq tu'n tb'inchante ju mya b'a'n, ex qa ma kub' nq'o'ne jun tolsab'l twitz, qa mi'n ma txi tma'na te, kymel, mlayx tzaj nna'ne aju b'a'n otoq tb'incha ex kymel tu'n tlaj tex til, atzun teya ok tq'a'ya tajlal weye ti'j tkamik xjal lu.

21Qatzun ma txi tma'na teju xjal tz'aqlxix tu'n mi'n tb'inchan il, ex qa mi'n ma b'inchan il, kukx k'anq'il tu'nju otoq txi tb'i'n aju otoq txi tma'na te, atzun teya mlay kyima, tu'nju otoq txi tma'na te.

B'i'x ok Ezequiel te men

22Ax tujx lugar lu, o nna'ye tipumal Qman, ex tma weye kyja': We'ktza ex texa tuj chq'ajlaj, ex atzun chin yolile tuk'ila.

23In jawtzun we'ye, ex in ex b'ete tuj chq'ajlaj, ex atzun o wile tajwalil Qman ik tza'nx otoq wile nej ttzi nima Quebar. In kub' ẍmeje'ye ex pon takl tib'aj nwitze max twitz tx'otx'.

24Ex o nk'ame tipumal Dios ex in jaw wab'ane tu'n. Tzajtzun yolin Qman wuk'ile ex tma kyja': Txi'ya ex lamo'n okx tib'a tuj tjaya.

25B'intza, kb'el k'alo'na tu'n saqb'aq kyu'n xjal, tu'ntzun mi'n tetza ex tu'n mi'n ttena kyxol.

26Ax ikx k'okel tlak'on tib' taq'a twitz tk'o'na wu'ne, tu'ntzun mi tb'ant tyolina. Mlayx b'ant tu'n kyok tmayo'na, porke qe xjal lu jumajx mib'an che b'in.

27Porke noq alkye q'ij waje tu'n t-xi nma'ne jun nyole teya, kb'antel tyolina juntl maj, kxe'ltzun tma'na kye kyja': Atzun jlu in tma'n Qman. Alkye jun taj tu'n tb'in, b'a'n tu'n tb'inte, ex alkye jun mi'n taj tu'n tb'in, b'a'n tu'n mi'n tb'inte, porke qe xjal lu jumajx mib'an che b'in.