Romanos 11 - Mam Huehuetenango New Ortography

Alkye qeju che kletel kyxol aj Israel

1Kyja'tzun in xi nma'ne: ¿Maj o tz'el tik'un Dios aju tnam Israel etzan tu'n? Mi'n. Porke ikx weye aj Israel qine, tiyjil Abraham qine, tiyjil Benjamín qine.

2Minti' o tz'el tik'un Dios tnam Israel aju etzan tu'n ex jaw t-sk'o'n atxix ojtxi. ¿Minti'petzun b'a'n kyu'ne aju in tma'n tuj Tu'jil ti'j Elías aju t-sanjel Dios, tza'n tten o yolin tuk'il Dios kyi'j aj Israel qa mya b'a'n qe? Ex tma:

3Nman, ma che kub' kyb'yo'n qe t-sanjela, ex ma kub' kyxitun qe t-altara; ex njunalxe ma chin kyaj tene, ex nno'k tilil kyu'n tu'n nkub' kyb'yo'n, chi Elías.

4Ex, ¿titzun tzaj ttzaq'we'n Dios? Atx wuq mil xinaq k'u'nx wu'ne te weye, na'nx kykub' ẍmeje' twitz tilb'ilal Baal, chi Dios.

5Ax ikxtzun tuj tq'ijlalil ja'lo atx junjun sk'o'maj qe tu'n t-xtalb'il Dios.

6Qatzun tu'n t-xtalb'il Dios, myatzun tu'n kyaq'unb'en; ex noqwit tu'n kyaq'unb'en, tu'n jlu aju t-xtalb'il Dios myawtlo jun xtalb'il.

7¿Tza'ntzun tten jlu? Minti' e kanun aj Israel ti'j ju in kyjyo'n; atzun qeju sk'o'maj qe kyxol, ma che kanun ti'j, ex txqantl kyuwix kyanmi;

8ik tza'n in tma'n tuj Tu'jil: Ax Dios jpunte kynab'l tu'n mi'n kylonte tu'n kywitz ex tu'n mi'n kyb'inte tu'n kyẍkyin, ex kukx kyten ja'lo, chi tuj Tu'jil.

9Ax ikx in tma'n David:

Aju nintz wa'n nno'k kyu'n kyuk'il kyamiw, tz'okwit te k'ob'il kye ex te tzuyb'il kye, tu'ntzun kyjaw tolj ex tu'n tkub' kycastiw.

10Tz'okwit sjumj ti'j kywitz tu'n mi'n tb'ant kyke'yin, ex kub'xwit tze'jix ttzal kyi'j te jumajx, chi David tuj Tu'jil.

Aju kolb'il kye xjal mya judiy qe

11Kyja'tzun in xi nma'ne: ¿Ope che jaw tolj aj Israel tu'n kykub' tz'aq te jumajx? Mi'n. Ex tu'nju otoq che kub' tz'aq aj Israel, ul kolb'il kye xjal mya judiy qe, tu'ntzun ttzaj kyna'n kyib' aj Israel ex tu'n kyok lpe' kyi'j txqantl xjal.

12Qatzun ma tzaj q'o'n xtalb'il kye kykyaqil xjal noq tu'nju kykub'len tz'aq aj Israel, ex qa tu'nju e el txalpuj aj Israel, qe xjal mya judiy qe ma kyk'am xtalb'il, yajtzun ok kyjaw we' juntl maj kykyaqil aj Israel, ¿myapelo mas nim xtalb'il ok kyk'ma' qe xjal?

13Ex at jun nyole kyeye, aqeye xjal mya judiy qeye. Noq tu'nju apostol qine kye xjal mya judiy, kyja'tzun aju waq'une tzaj q'o'n ma'xix toklen tuj nwitze,

14nno'k tilil wu'ne tu'n ttzaj kyna'n kyib' qe nxjalile ex tu'n kyok lpe' kyi'je, tu'ntzun kyklet junjun kye.

15Qatzun ma b'ant kyten txqantl xjal tuk'il Dios noq tu'nju e el ik'un aj Israel tu'n, yajtzun ok kyk'met juntl maj aj Israel tu'n Dios, ¿myapelo jun anq'ib'l jlu kye qeju ik tza'n kyimni qe ja'lo?

16Ex qa xjansa'maj aju tnejel pan in xi q'ot te Dios, ax ikx tkyaqil tq'otjil pan xjansa'maj. Ex qa xjansa'maj tlok' tze', ax ikx qe tq'ab' xjansa'maj.

17Ex at junjun aj Israel ik kyten ik tza'n tq'ab' tze' olivo ma che el tx'emin, ex aqeye ik kytene ik tza'n tq'ab' tze' olivo tuj k'ul, ma che ok tx'apo'ne te kyxel. Kyja'tzun ma kyk'ame kyipumale ti'j tlok' olivo ex ti'j tlechil.

18Ex mi'n jaw kyniman kyib'e kywitz qeju mer tq'ab' tze'; qatzun ma jaw kyniman kyib'e, kyna'ntze mya aqeye k'a'chalte tlok' tze', ate tlok' tze k'a'chal kyeye.

19Oklo kyma'ye: Ikloju, ex ma che el tx'emin qe tq'ab' tze' tu'n qok tx'apo'ne te kyxel, che chiloye.

20Ax tok; ex ma che el tx'emin tu'nju minti' kyokslab'l, atzun kyeye noq tu'n kyokslab'le ma che ok tx'apo'ne te kyxel. Mi'ntzun jaw kyniman kyib'e, o'kx che xob'e twitz Dios.

21Ex qa minti' kyaj tklo'n Dios aju tekuxix tze' tq'ab', ax ikx kyeye mlay che kyaj klo'ne tu'n.

22Ex tz'elx kynik'e ti'j, ate Dios b'a'n, ax ikx kyuw te Dios; ax tok kyuw tyol kye qeju e kub' tz'aq, ex tb'anilxix tyol kyeye, qa kukx ma qe' kyk'u'je ti'j qa b'a'n te Dios; qatzun mi'n, ax ikx kyeye ok che elel tx'emine tu'n.

23Ax ikx qe aj Israel, qa ma tz'ajtz ti'j kyanmi ex qa ma che okslan, ok che okel tx'apo'n juntl maj, porke ate Dios at tipumal tu'n kyok tx'apo'n juntl maj.

24Ex qa ma che el tx'emine ti'j jun tze' olivo tajx in tzaj ch'iy tuj k'ul, ex qa ma che ok tx'apo'ne ti'j jun tze' olivo awa'n in ku'x ex tb'anil, myatzun ẍe el ch'iye ti'j, yajtzunlo kye qeju mer tq'ab' olivo tb'anil, ¿mlaypelo che ok tx'apo'n juntl maj ti'j kyximlalx?

Ok che k'metel juntl maj aj Israel tu'n Dios

25Erman, waje tu'n kyb'inteye aju yol lu ewantoq nej tu'n Dios, tu'ntzun mi'n tkub' kyximane qa mas at kynab'le: ax tok ma kyuwix kyanmi aj Israel, pero mya te jumajx, ma kyuwix ch'in akutzun in tz'aqet kyajlal txqantl xjal mya aj Israel qe, aqeju che kletel.

26Ex kyja'xtzun che kletel kykyaqil aj Israel, ik tza'n in tma'n tuj Tu'jil:

Tuj tnam Sión ktzajel aju tzoqpil kye, k'elel ti'n ju mya b'a'n kyxol tiyjil Jacob.

27Atzunwe nyol jlu kyjel b'ant ti'j wu'ne kyuk'il ok tel wi'ne kyil, chi Dios.

28Tuj jun tumel, aj q'oj qe aj Israel ti'j Dios tu'n tlaj minti' xi kyoksla'n tqanil kolb'il; kyja'tzun ma tzaj q'o'n amb'il kyeye tu'n kyokslane, aqeye xjal mya judiy; ex tuj juntl tumel, k'ujla'n qe aj Israel tu'n Dios tu'n kylaj qe kyxe'chel sk'o'maj qe tu'n Dios.

29Ex mlay tz'el ti'n Dios aju t-xtalb'il o tzaj tq'o'n kye, ex mlay ch'expet aju tyol ti'j ju txokb'il kye.

30Ik tza'n kyeye, ojtxi minti' xi kynimane Dios, atzun ja'lo ma tzaj q'aq'an tk'u'j Dios kyi'je tu'nju minti' xi kyniman aj Israel,

31ax ikxtzun kye jlu minti' ma txi kyniman ja'lo, ex tzul q'aq'an tk'u'j Dios kyi'j, ik tza'n kyeye ma tzaj q'aq'an tk'u'j kyi'je.

32Ex kykyaqil xjal mib'an che niman, tza'nx qe xjal judiy ex qe xjal mya judiy, junx ma che ok tq'o'n Dios mer ik tza'n kyokx qe tuj pres, tu'ntzun ttzaj q'aq'an tk'u'j kyi'j kykyaqil.

33Ma'xix t-xilen tnab'l Dios ex ju tojtzqib'l. Mlay tz'el qnik' ti'j t-ximb'etz ex mlay knet tumel tb'e qu'n.

34Ex ¿atpe jun xjal o tz'el tnik' ti'j t-ximb'etz Qman? Ex ¿atpe jun xjal o q'onte tnab'l?

35Ex ¿atpe jun xjal o txi q'onte jun ti'xti nej te Dios tu'n tajtz t-xel tu'n? Minti'.

36Porke tuk'il Dios in tzaj tkyaqil, ex tu'n Dios o b'ant tkyaqil, ex tete Dios tkyaqil. Nimanxwit ju tb'i te jumajx. Ikxwitju.