Mateo 6 - Mam Huehuetenango New Ortography

In qo t-xnaq'tza'n Jesús tu'n qonin kyi'j meb'a

1Ten kykwente ti'j tza'n tten tu'n kyb'inchanteye aju in tma'n kyokslab'le, mya noq o'kx tu'n kyok ke'yine kyu'n xjal; qatzun ma kyb'inchaye noq tu'n kyok ke'yine kyu'n xjal, mlaylo tzaj q'o'n jun oyaj kyeye tu'n Kymane aju at tuj kya'j.

2Kyja'tzun ok t-xi kyq'o'ne kotzb'aj, mi'n b'aj kyyoline kye xjal ik tza'n in kyb'incha'n qe xmletz' kyuj qe ja te k'ulb'il ex tuj cay, tu'ntzun kyjaw nimsa'n kyu'n xjal. Ax tok kxel nma'ne kyeye, o'kxtzun ch'in chojb'il kyeju.

3Atzun kyeye ok t-xi kyq'o'ne kotzb'aj, minti' tu'n kyb'inte mastl ok t-xi kyq'o'ne.

4Kyja'tzun tuj ewaj kxel kyq'o'ne kotzb'aj; porke in ke'yin Kymane ti'j aju in xi kyq'o'ne tuj ewaj, ex ktzajel tq'o'n t-xel kyeye.

In qo t-xnaq'tza'n Jesús tza'n tten tu'n qna'n Dios Lucas 11.2-4

5Ex ok kyna'ne Dios, mi'n kyb'inchaye ik tza'n qe xmletz', tu'nju at-xix kygan tu'n kyna'n Dios wa'l qe kyuj ja te k'ulb'il ex jatum in che moje' cay, tu'ntzun kyok ke'yin kyu'n xjal. Ax tok kxel nma'ne kyeye, o'kxtzun ch'in chojb'il kyeju.

6Atzun kyeye, ok kyna'ne Dios kyokxe tuj kyjaye, ex kylmo'metze tlamel ja, ex che yoline tuk'il Kymane aju at tuj ewaj, ex aju Kymane in ke'yin tuj ewaj, ktzajel tq'o'n t-xel kyeye.

7Atzun kyeye ok kyna'ne Dios, mi'n txi kyma'ne ela' maj axju yol ik tza'n in kyb'incha'n qe txqantl xjal minti' nne'l kynik' ti'j Dios; porke tuj kynab'l qa tu'nju nimku kyyol che tzajel b'i'n.

8Mi'ntzun kyb'inchaye ik tza'n kye; porke ate Kymane ojtzqi'majtl tu'n alkyeju at tajb'enxix kyeye, na'nxtoq t-xi kyqanine te.

9Kyja'tzun che na'ne Dios kyja':

A Qman ata tuj kya'j, tenwt tchiylal tb'iya qeye.

10E ttzaj ju tkawb'ila.

B'ant-xwit ju tajb'ila twitz tx'otx' ik tza'n in b'ant tuj kya'j.

11Q'ontza qwaye ja'lo, aju in ajb'en tkyaqil q'ij.

12Ex najsama aju mya b'a'n in qb'incha'ne twitza, ik tza'n qeye in kub' qnajsa'ne kypaltil qeju in kyb'incha'n mya b'a'n qi'je.

13Ex mi'n taq'a amb'il tu'n qoke tuj joyb'il qi'je, noq o'kx qo tkloma teju mya b'a'n.

Porke teya ju kawb'il, ex ipumalj, ex ajwalil te jumajx. Ikxwitju.

14Ex qa ma kub' kynajsa'ne aju mya b'a'n in kyb'incha'n xjal kyi'je; ax ikx kb'el najsa'n kyile tu'n Kymane aju at tuj kya'j.

15Ex qa minti' xkub' kynajsa'ne aju mya b'a'n in kyb'incha'n xjal kyi'je, ax ikx te Kymane mlay kub' najsa'n kyile tu'n.

In qo t-xnaq'tza'n Jesús tza'n tten tu'n tkub' qyo'n we'yaj

16Ex ok tkub' kyyo'ne we'yaj, mi'n txi kyyek'une kywitze miyalnix qa in che b'isune ik tza'n qe xmletz'; ex miyalnix nno'k kywitz tu'n kyyek'unte kyib' kywitz xjal qa in kub' kyyo'n we'yaj. Ax tok kxel nma'ne kyeye, o'kxtzun ch'in chojb'il kyeju.

17Atzun kyeye, ok tkub' kyyo'ne we'yaj, kyxeb'anku kywi'ye ex kytx'jo'mel kywitze,

18tu'ntzun mi'n t-xi kyyek'une kye xjal qa in kub' kyyo'ne we'yaj, noq o'kx te Kymane aju at tuj ewaj; ex aju Kymane in ke'yin tuj ewaj, ktzajel tq'o'n t-xel kyeye.

Aju q'inumab'l tuj kya'j Lucas 12.33-34

19Mi'n b'aj kychmo'ne kyq'inumab'le twitz tx'otx' jatum in naj tu'n pok' ex tu'n akom, ex nno'kx kylaku'n eleq' t-xe ja tu'n tetz kyelq'a'n.

20Noq o'kx kychmome kyq'inumab'le tuj kya'j jatum minti' in naj tu'n pok' ex tu'n akom, ex minti' nno'kx kylaku'n eleq' t-xe ja tu'n tetz kyelq'an.

21Porke jatum ta' kyq'inumab'le, atzun tok kyanmiye ti'j.

Aju spik'un te qximlal Lucas 11.34-36

22Aju spik'un te qximlal, atzunju tb'aq' qwitz; kyja'tzun qa b'a'n ta' tb'aq' kywitze, tkyaqiltzun kyximlale at tuj spik'un.

23Qatzun mya b'a'n ta' tb'aq' kywitze, tkyaqil kyximlale at tuj qlolj. Qatzun ma tz'ok te qlolj aju spik'un at kyuje, mas nimxix kchmetel ju qlolj.

Dios ex ju q'inumab'l Lucas 16.3

24Mi jun xjal jaku b'ant tu'n tajb'en te kab'e patrón: porke k'elel tik'un jun, atzun juntl ok tk'ujla', ex qa o'kx ok k'ajb'el te jun patrón, atzun juntl minti' taj ti'j. Mlayx b'ant tu'n kyajb'ene te Dios ex te q'inumab'l.

Qe tk'wa'l Dios kwentin qe tu'n Lucas 12.22-31

25Kyja'tzun kxel nma'ne kyeye: Mi'n b'aj kyk'u'je ti'j kychwinqlale, ti kxel kywa'ne ex qa ti kxel kyk'a'ne; ex mi'n b'aj kyk'u'je ti'j kyximlale, ti k'okel kyq'o'ne kyi'je. ¿Myapetzun mas ma' t-xilen kychwinqlale twitz wab'j? ¿Ex myapetzun mas ma' t-xilen kyximlale twitz xb'alun?

26Kyke'yinxe qe chyu'j; minti' in che awan ex minti' in che chmon twitz awal, ex minti' kytx'utx' te chmob'l kywa; ex ate Kymane aju at tuj kya'j nno'k k'a'chante kye. ¿Myapetzun mas ma' kyxilene kywitz qe chyu'j?

27¿Ex alkye jun kyxole jaku b'ant tu'n tu'n tok tq'o'n kab'e xk'achub'tl twa'l tu'nju nimxix in b'aj tk'u'j ti'j?

28¿Ex tiqu'n in b'aj kyk'u'je ti'j kyxb'alune? Che ximane kyi'j b'ech tuj k'ul tza'n tten in che ch'iy; minti' in che aq'nan, ex minti' in che chqon.

29Ex kxel nma'ne kyeye ti'j rey Salomón, maske tb'anilxix t-xb'alun ok tq'o'n, pero minti' pon jun t-xb'alun ik tza'n kye tal b'ech lu.

30Qatzun qa ik in t-xb'alumi'n Dios tal k'ul tuj kojb'il at ja'lo ex nchi'j tz'okx q'o'n tuj q'aq', ¿yajtzun kyeye, mlaypelo che xb'aluminjtze tu'n, aqeye xinaq ch'in kyokslab'le?

31Kyja'tzun mi'n b'aj kyk'u'je, ex mi'n kymaye: ¿Ti kxel qwa'ne? ex qa ¿ti kxel qk'a'ne? ex qa ¿jatum ktzajel qxb'alune?

32Porke qe txqantl xjal in che jyon ti'j tkyaqil jlu; pero at jun Kymane aju at tuj kya'j ojtzqi'n tu'n qa at tajb'en tkyaqil jlu kyeye.

33Kynimanxe tnejelxix aju tkawb'il Dios ex tu'n kyb'inchanteye aju tz'aqlxix twitz; tkyaqiltzun jlu ktzajel q'o'n kyeye.

34Kyja'tzun, mi'n b'aj kyk'u'je ti'j ju te nchi'j, porke aju te nchi'j texte tb'is ktzajel. Aju nnik'x qu'n tuj jun q'ij, akuxju.