Mateo 25 - Mam Huehuetenango New Ortography

Aju techal kyi'j laj q'apoj

1Aju kawb'il in tzaj tuj kya'j ik tten ik tza'n laj q'apoj xi kyi'n kykandil e je'x kanil ti'j ju xinaq b'anin ti'j tu'n tmoje'.

2Jwe' q'apoj at kynab'l, atzun jwe'tl minti' kynab'l.

3Aqeju q'apoj minti' kynab'l, xi kyi'n kykandil, ex minti' xi kyi'n aseyt tu'n tku'x kyq'o'n tuj kykandil ok tkub' b'aj aju tku'xsa'n tuj kandil.

4Atzun qe q'apoj at kynab'l, xi kyi'n aseyt tuj tkub'il tuk'ix kykandil.

5Ex tu'nju yaj b'ant tten xinaq, tzaj watl tuj kywitz q'apoj ex e ik' tan.

6Ex te tmij aq'b'il, jaw tq'ajq'ajel kywi xjal in kyma'n: Lu ju chmilb'aj tzul, kyetze kanil ti'j.

7Kykyaqiltzun q'apoj e jaw we', ex b'aj kyb'incha'n kykandil.

8Aqeju q'apoj minti' kynab'l xi kyma'n kye qeju q'apoj at kynab'l: Kyq'ontze ch'in aseyt qeye, aju at kyuk'ile; ex ch'ix kykub' yupj qkandile.

9Atzun kye q'apoj at kynab'l xi kytzaq'we'n: Mas b'a'n tu'n kyxi'ye kyuk'il qe k'ayil ex tu'n ttzaj kylaq'one ch'in aseyt te kyeye, tu'ntzun mi'n tkub' b'aj naj qeye ax ikx kyeye, che chi.

10Kyja'tzun otoq che'x qe jwe' q'apoj laq'ol aseyt tej tul ju chmilb'aj, atzun qe q'apoj b'anin kyten, e okx tuja tuk'il chmilb'aj tuj mejeb'le'n ex b'i'xtzun lamet ttzi ja.

11Te yajxitzun e ul qeju jwe'tl q'apoj ex kyma: Tat, tat, jaqon okxa ja qwitze.

12Atzunte xinaq etz ttzaq'we'n: Ax tok kxel nma'ne kyeye, minti' ojtzqi'n qeye wu'ne, chi xinaq.

13Kyja'tzun che xq'uqine, porke minti' b'i'n kyu'ne alkye or chin ule, aqine sk'o'maj qine tu'n Dios tu'n ntene kyuk'il xjal.

Aju techal ti'j pwaq xi tq'o'n xjal kye tmajen

14Porke aju tkawb'il Dios in tzaj tuj kya'j ik tten ik tza'n jun xjal xi' tuj jun tb'e najchaq, e tzaj ttxko'n qe tmajen, ex kyaj tq'o'n tpwaq kye.

15Xi tq'o'n jwe' mil saq pwaq te jun tmajen, atzun te juntl xi tq'o'n kab'e mil ex xi tq'o'n jun mil te juntl, teylex junjun xi q'o'n nik'pun che aq'nan. Ex xi'tzun najchaq.

16Aju majen o tk'am jwe' mil saq pwaq, ok ten negosyaril ti'j, ex o tkamb'a jwe'tl mil.

17Ax ikx aju majen o tk'am kab'e mil saq pwaq o tkamb'a kab'etl mil.

18Atzun juntl majen, aju o tk'am jun mil saq pwaq, xi' ex ku'x tlaku'n jun jul ex ku'x tmaqu'n tpwaq tpatrón.

19Tb'ajlenxi nim q'ij ul kypatrón majen, ex tzaj kyma'n tajlal kyaq'unb'en.

20Tej tpon aju otoq tk'am jwe' mil saq pwaq, pon ti'n jwe'tl mil, ex xi tma'n kyja': Tat, jwe' mil saq pwaq tzaj tq'o'na weye, lu jwe'tl mil ma nkamb'aye lu, chi majen.

21Xi tma'n tpatrón te: Ku, aya majen b'a'n ex ma japunxix tu'na; ch'in xi nq'o'ne teya, ex ma tz'aq'nanxixa ti'j; ja'lo nimxix kxel nq'o'ne teya tu'ntzun ttzalaja junx wuk'ile, chi patrón.

22Ex tej tpon juntl majen aju otoq tk'am kab'e mil saq pwaq, xi tma'n: Tat, kab'e mil saq pwaq tzaj tq'o'na weye, lu kab'etl mil ma nkamb'aye lu, chi majen.

23Xi tma'n tpatrón te: Ku, aya majen b'a'n ex ma japunxix tu'na; ch'in xi nq'o'ne teya ex ma tz'aq'nanxixa ti'j; ja'lo nimxix kxel nq'o'ne teya tu'ntzun ttzalaja junx wuk'ile, chi patrón te.

24Te mankb'il pon aju majen o tk'am jun mil saq pwaq ex tma: Tat, b'a'n wu'ne aya jun xinaq kyuwxix, in jaw tchmo'na twitz awal jatum minti' in ku'x tawa'na, ex in jaw tchmo'na twitz awal jatum minti' in xi tchituna iyaj.

25Tu'ntzunju, tzaj nxob'ile ex inxe ewalte tpwaqa tjaq' tx'otx'. Lu tpwaqa lu, chi majen.

26Xi ttzaq'we'n tpatrón: Aya majen mya b'a'na ex ky'aja, b'a'n tu'na in jaw nchmo'ne twitz awal jatum minti' wawale ex in jaw nchmo'ne twitz awal jatum minti' xi nchitune iyaj.

27Kyja'tzun, mas b'a'nwtlo noqwit okx tq'o'na npwaqe tuj banc; tejtzun ma chin ule mawtlo nk'ame npwaqe tuk'il ch'in ta'l, chi patrón te majen.

28Xitzun tma'n patrón kye txqantl: Kyi'mele ju pwaq te, ex kyq'onxe teju at laj mil saq pwaq tuk'il.

29Porke aju xjal at ch'in te, mas kxel q'o'n te, ex kchmetel te; ex alkyeju minti' te, aju ch'in at te k'elel q'i'n.

30Ex aju majen minti' tajb'en, kyq'o'mixe ti'jxi tuj qlolj; atzun tzul oq'el ex kqitx'itx'il t-xe' kye' xjal, chi patrón.

Kykyaqil nasyon che okel tuj xjel

31Oktzun wule aqine sk'o'maj qine tu'n Dios tu'n ntene kyuk'il xjal, otoq chin oke rey, ex kyuk'ix kykyaqil anjel wuk'ile, oktzun chin b'el qe'ye tuj nq'uqb'ile in qoptz'aj tu'n nkawine.

32Ex qe xjal kyuj kykyaqil nasyon che okel chmo'n nwitze, ex k'elel npa'ne jun k'loj kyxol txqantl, ik tza'n jun pastor in che el tpa'n qe ẍne'l kyxol qe chip.

33Che b'el nq'o'ne qe ẍne'l tuj nb'anq'ab'e, atzun qe chip che b'el nq'o'ne tuj nnayaje.

34Ex aqine Rey kxel nma'ne kye qeju ate' tuj nb'anq'ab'e: Kytzaje aqeye ky'iwla'n qeye tu'n Nmane, kyk'monxe aju kawb'il b'animaj te kyeye atxix tej tb'ant twitz tx'otx'.

35Porke tej ttzaj el nk'u'je, tzaj kyq'o'ne nwaye; ex tej ttzaj txqetle'n wi'je, tzaj kyq'o'ne nk'a'ye; stranjer xjal qine, ex tzaj kyq'o'ne nposadiye,

36tej minti'toq nxb'alune, tzaj kyq'o'ne nxb'alune; tej yab'toq qine, e ule ke'yil weye; tej prestoq qine e ule visitaril weye.

37Ktzajeltzun kytzaq'we'n qeju tz'aqlxix: Tat, ¿jtoje qile minti' twaya ex xi qq'o'ne twaya? ¿Jtoje qile in txqeta ex xi qq'o'ne tk'a'ya?

38¿Jtoje qile stranjer xjala ex xi qq'o'ne tposadiya? ¿Ex jtoje qile minti' t-xb'aluna ex xi qq'o'ne t-xb'aluna?

39¿Jtoje qile yab'a ex qa tokxa tuj pres ex o ule ke'yil teya?

40Ex aqine Rey kxel ntzaq'wene: Ax tok kxel nma'ne kyeye: Aju kyb'inchaye kye wermaniye tal ch'in, weye o kyb'inchaye jlu, nchiloye kye.

41Ax ikx kxel nma'ne kye qeju ate' tuj nnayaje: Kypa'mil kyib'e wi'je aqeye tkub' kysentense, kyxi'ye tuj q'aq' te jumajx, b'animaj te tajaw il ex kye t-anjel.

42Ex tzaj el nk'u'je ex minti' tzaj kyq'o'ne nwaye; tzaj txqetle'n wi'je ex minti' tzaj kyq'o'ne nk'a'ye,

43stranjer xjal qine ex minti' tzaj kyq'o'ne nposadiye; minti'toq nxb'alune ex minti' tzaj kyq'o'ne nxb'alune; yab'toq qine ex in tene tuj pres ex minti' e ule ke'yil weye, nchiloye kye.

44Ktzajeltzun kytzaq'we'n: Tat, ¿jtoje qile nne'l tk'u'ja, ex qa in txqeta, ex qa stranjer xjala, ex qa minti' t-xb'aluna, ex qa yab'a, ex qa ata tuj pres, ex minti' o qo onine teya? Che chilo.

45Oktzun kxel ntzaq'we'ne: Ax tok kxel nma'ne kyeye; aju minti' kyb'inchaye kye qeju tal ch'in lu, ax ikx minti' o kyb'inchaye weye, nchiloye kye.

46Che xe'ltzun jlu tuj castiw te jumajx, atzun qeju tz'aqlxix che xe'l tuj chwinqlal te jumajx.