Hechos 23 - Mam Huehuetenango New Ortography

1Atzunte Pablo ok tke'yinxix kyi'j Aj Sanjelal ex tma:

—Aqeye erman, weye ntzajlenxi ojtxi ax ikx ja'lo, in chin anq'ine b'a'n twitz Dios ik tza'nx in tma'n wanmiye.

2Atzunte Ananías aju nejenel kye pal tzaj tma'n kye qeju ate'toq ttxlaj Pablo tu'n tok kytz'ajan ttzi'.

3Atzunte Pablo xi tma'n te:

—Ate Dios k'okel tz'ajana tu'n, tu'nju xmletz'a. Qa q'uqla tu'n woke tuj xjel tu'na ik tza'nx in tma'n ley, ¿tiqu'ntzun in tzaj tma'na tu'n wok tz'ajane, aju minti' in tma'n ley?

4Atzun kye qeju wa'l qe ttxlaj Pablo kyma:

—¿Tiqu'n nno'k tilina aju nejenel kye pal aju tok tu'n Dios?

5Tmatzun Pablo:

—Minti' b'a'n wu'ne erman qa nejenel kye pal jlu; tu'nju at jun yol in tma'n tuj Tu'jil kyja': Mi'n tz'ok tilina aju tok te kawil tuj ttanmiya, chi tuj Tu'jil.

6Eltzun tnik' Pablo ti'j qa saduceo jun k'loj, atzun juntl k'loj fariseo; jawtzun tq'ajq'ajel twi' kyxol Aj Sanjelal, ex tma:

—Aqeye erman, fariseo we qin, ax fariseo nmane; ma chin oke tuj xjel ti'j ju yol xi nma'ne, ok che jawitz anq'in qe kyimni.

7Tej t-xi tma'n Pablo jlu, jaw jun yol kyxol qe fariseo kyuk'ix qe saduceo, ex kub' kypa'n kyib'.

8Porke qe saduceo in kyma'n qa mlay che jaw anq'intl kyimni, ex minti' anjel, ex minti' xlen'x; atzun kye fariseo in kyma'n qa at.

9Jawtzun jun tq'ajq'ajel nimxix kyxol; e jawtzun we' junjun xnaq'tzal ti'j ley fariseo qe, in che q'ojin:

—Minti' jun til xinaq lu ma knet qu'ne; qa jun xlen'x ma yolin tuk'il ex qa jun anjel, che chi.

10Xi' ju q'oj tuj tnimal, tzajtzun t-xob'il coronel mya yajku kub' paẍu'n Pablo kyu'n, kyja'tzun xi tma'n kye soldad tu'n kyku'tz q'ilte Pablo kyxol xjal, ex tu'n tjax kyi'n tuj cuartel.

11Te juntl aq'b'il kub' tyek'un tib' Qajaw twitz Pablo, ex xi tma'n te:

—Qe' tk'u'ja Pablo, ik tza'n ma tz'oka te testiw wi'je tuj Jerusalén, kyja'xtzun ilxix ti'j tu'n toka te testiw wi'je tuj tnam Roma, chi Qajaw.

B'ant ti'j kyu'n xjal judiy tu'n tkub' Pablo

12Tejtzun qsqix, at junjun xjal judiy b'ant ti'j kyu'n tuj ewaj tu'n tkub' Pablo kyu'n, b'aj kyjuramentin kyib' kyxolx, kyu'nx xi kyqanin tu'n ttzaj q'o'n kycastiw tu'n Dios qa mi xjapun kyu'n aju otoq b'ant ti'j kyu'n.

—Mlayx qo wa'n ex mlayx qo k'an qa na'nxtoq tkub' Pablo qu'n, che chi.

13Maslo 40 xjal aqeju b'ant ti'j jlu kyu'n tuj ewaj.

14E je'xtzun qe xinaq lu kyuk'il qe nejenel kye pal ex kyuk'il kytijil xjal judiy ex kyma:

—Ma b'aj qjuramentin qib'e qxolxe tu'n mi'n t-xi qnik'b'e'ne jun ti'xti qa na'nxtoq tkub' Pablo qu'ne, ex mlay tzik'x ti'j.

15Ja'lotzun, aqeye kyuk'ix qe Aj Sanjelal, kyqaninxe te coronel tu'n ttzaj q'i'n Pablo kywitze nchi'j, cheb'a tu'n qyoline ti'j alkye til, che chikuye; atzun qeye list qo b'el tene tu'n tkub' qb'yo'ne na'nxtoq tkanun kyuk'ile, che chi.

16Atzunte tal tanb' Pablo o tb'i in che yolin ti'j tu'n tkub' Pablo kyu'n, xi'tzun ex okx tuj cuartel, ex xi tq'o'n tqanil te Pablo.

17Tzajtzun ttxko'n Pablo jun capitán, ex xi tma'n te:

—Q'inxa ju ku'xun lu twitz coronel, tu'nju at jun tqanil kxel tma'n te, chi Pablo.

18Xitzun ti'n capitán ju ku'xun, pon ti'n twitz coronel ex tma:

—Aju pres Pablo ẍinx txko'ne tu'n ex ma kub'san nwitze tu'n ttzaj wi'ne ju ku'xun lu twitza, tu'nju at jun tyol teya.

19Xitzun tuk'in coronel ju ku'xun, el laq'e' ch'intl, xitzun tqanin te:

—¿Alkye ktzajel tma'na weye?

20Xitzun tma'n ju ku'xun te:

—Qe xjal judiy ma b'ant ti'j kyu'n tu'n kyul kub'sal twitza tu'n t-xi ti'na Pablo kywitz Aj Sanjelal kye xjal judiy nchi'j, cheb'a tu'n t-xi kyxjelin te alkye til, che chi, ex noq tten kyu'n.

21Kyja'tzun, mi'n txi tnimana kyyol; ex maslo 40 xinaq kyxol in che xq'uqin ti'j Pablo, ma b'aj kyjuramentin kyib' kyxolx tu'n mi'n kywa'n ex tu'n mi'n kyk'an qa na'nxtoq tkub' Pablo kyu'n, ex mlay tzik'x ti'j che chi; ja'lotzun b'anin kyten in che ayon ti'j ju tzaq'web'l tu'na, chi ku'xun.

22Xitzun tma'n coronel te ku'xun tu'n tetz ex tu'n mi'n t-xi tma'n kye xjal qa otoq pon tqanil jlu tu'n te coronel.

Tej t-xi sama'n Pablo tu'n tpon twitz Félix aju gobernador

23E tzajtzun ttxko'n coronel kab'e capitán, ex xi tma'n kye:

—Kyb'inchame kyten kab' syent soldad, kyuk'ix 70 tu'n kyxi' kyib'aj chej, ex kab' syenttl q'il lans, tu'n kyxi' te las nueve te qonik'an tu'n kypon tuj Cesarea.

24Ex kyb'inchame kyten kab'e chej tu'n tjax Pablo tib'aj, tu'ntzun t-xi kyi'ne minti' jun palt ti'j tu'ntzun tpon tuk'il gobernador Félix.

25Ex xi ttz'ib'an coronel jun u'j in tma'n kyja':

26Aqine Claudio Lisias in xi nq'olb'e'ne, aya gobernador Félix nimxix toklena.

27Aju xjal lu o tzyet kyu'n xjal judiy, ex ch'ixtoq tkub' kyb'yo'n, in pontzun kanune kyuk'ix soldad klol te, tej nb'inteye qa aj Roma xjal lu.

28Ex o wajb'eye tu'n nb'inteye alkye til tuj kywitz xjal judiy, xitzun wi'ne kywitz Aj Sanjelal kye xjal judiy;

29eltzun nnik'e ti'j aju til tuj kywitz noq tu'n tlaj kyley, ex minti' knet jun til qa tu'n tkyim ex qa tu'n tokx tuj pres.

30Ex tej tpon tqanil wuk'ile qa otoq b'ant ti'j kyu'n xjal judiy tu'n tkub' kyb'yo'n ju xjal lu, jurat naj ma txi nsama'ne tuk'ila; ax ikx ma txi nma'ne kye aj q'oj ti'j tu'n kypon tx'olb'alte twitza alkye til xjal lu tuj kywitz, chi coronel tuj u'j.

31Xitzun q'i'n Pablo kyu'n soldad ik tza'nx ju orden tzaj q'o'n kye, pon kyi'n te qonik'an tuj tnam Antípatris.

32Ex te juntl q'ij e ajtztzun jun k'loj soldad e ul tuj cuartel, o'kx qeju kyjax kyib'aj chej e kyaj ten tu'n kyxi' tuk'il Pablo.

33Tejtzun kypon tuj Cesarea, xi kyq'o'n ju u'j te gobernador, tuk'ix Pablo pon kyi'n twitz.

34Tb'ajlenxitzun t-sch'i'n gobernador ju u'j lu, xi tqanin te Pablo alkye lugar itz'j; tejtzun tb'inte qa tuj Cilicia itz'j,

35xi tma'n te:

—Maxitzun kxel nb'i'ne tyola okxi kyul qe aj q'oj ti'ja.

Xitzun tq'o'n orden tu'n t-xq'uqinjtz Pablo tuj palacio te Herodes.