1 Corinto 12 - Mam Huehuetenango New Ortography

Aju oklenj in tzaj tq'o'n Xewb'aj Xjan te teyle junjun

1Erman, waje tu'n kyb'inteye ti'j ju qoklen in tzaj tq'o'n Xewb'aj Xjan te teyle junjun qe.

2B'i'n kyu'ne, na'nxtoq t-xi kyoksla'ne, xi kyq'on kyib'e tu'n kyok lpe'ye kyi'j qe tilb'ilal men qe.

3Kyja'tzun kxel nma'ne kyeye tu'n kyb'inteye, qa at jun xjal at T-xew Dios tuk'il, mlayx tma tu'n t-xi' Jesús tuj najen; ex mlayx tma jun xjal: Ate Jesús Wajawe, qa minti' Xewb'aj Xjan tuk'il.

4Ja'lotzun, teyle junjun qe at junxilchaq qoklen ex axte Xewb'aj Xjan in tzaj q'onte.

5Ex at junxilchaq tumel tu'n qajb'en, ex o'kx jun Qajaw tu'n qajb'en te.

6Ex at junxilchaq tumel tu'n qaq'nan, ex axte Dios in aq'nan quk'il qkyaqil tu'n tb'ant tkyaqil.

7Ex teyle junjun in tzaj q'o'n toklen tu'n Xewb'aj Xjan tu'n tajb'en kye kykyaqil.

8Tu'nju at junjun in tzaj tq'o'n Xewb'aj Xjan kyoklen tu'n kyyolin tuk'il nab'l; atzun kye junjuntl in tzaj q'o'n nim kyojtzqib'l tu'n kyyolin, axju Xewb'aj Xjan in tzaj q'onte.

9Ex te junjuntl in tzaj q'o'n toklen tu'n tqe'xix tk'u'j ti'j Dios, tu'nx ju Xewb'aj Xjan; ex kye junjuntl in tzaj q'o'n kyoklen tu'nx ju Xewb'aj Xjan tu'n kyb'anix qe yab' kyu'n.

10Ex kye junjuntl in tzaj q'o'n kyoklen tu'n kyb'inchanjtz qe b'inchb'en nim tipumal; ex kye junjuntl in tzaj q'o'n kyoklen tu'n t-xi kychik'b'a'n aju in tma'n Dios kye; ex kye junjuntl in tzaj q'o'n kyoklen tu'n tel kynik' ti'j kyyol qe xjal pakb'al qa ax tok ex qa mi'n; ex kye junjuntl in tzaj q'o'n kyoklen tu'n kyyolin ti'j junxilchaq yol; atzun kye junjuntl in tzaj q'o'n kyoklen tu'n tel pjet junxilchaq yol.

11Ex tkyaqil jlu axte Xewb'aj Xjan in b'inchante junx te, in xi t-sipan toklen teyle junjun ik tza'nx tajb'il.

Qkyaqil qoksa'n ti'j junx qximlal

12Porke ik tza'n tten qximlal noq junx ex nimku tok ti'j, ex kykyaqil qeju ate'k ti'j qximlal maske nimku kyb'et pero noq junx qximlal, ikxtzun tten Cristju.

13Porke noq tu'n jun Xewb'aj Xjan ma qo b'yan qkyaqil tu'n qok te junx qximlal, maske judiy xjal qo' ex qa griego xjal, maske tzyu'n qo' te majen ex qa tzoqpi'n qo', ex junx Xewb'aj Xjan ma qk'am qkyaqil.

14Aju qximlal mya junx tten, nimku tok ti'j.

15Qa ma tma qqan: Mya q'ab'aj qine kyja'tzun mya ti'j t-ximlal xjal atine, chiwt, ¿tu'npetzun jlu minti' toklen ti'j qximlal?

16Ex qa ma tma qẍkyin: Mya tb'aq' witzb'aj qine kyja'tzun mya ti'j t-ximlal xjal atine, chiwt, ¿tu'npetzun jlu minti' toklen ti'j qximlal?

17Noqwit o'kx tb'aq' qwitz tok ti'j tkyaqil qximlal, ¿tza'ntzun tten tu'n qb'in? Noqwit o'kx qẍkyin tok ti'j tkyaqil qximlal, ¿tza'ntzun tten tu'n tb'ant qsqonte?

18Atzun ja'lo tkyaqilju tok ti'j qximlal, ate Dios ok q'onte teyle junjun ik tza'nx tajb'il.

19Aqeju ate'k ti'j qximlal noqwit junx kyten, ¿tza'nwtlo tten qximlal?

20Atzun ja'lo nimku tok qi'j, ex junx qximlal.

21Mlay b'ant tmante tb'aq' qwitz te qq'ab': Minti' tajb'ena weye, chiwt. Ex mlay b'ant tmante qwi' te qqan: Minti' kyajb'ene weye, chiwt.

22Aqeju ate'k ti'j qximlal ch'in kyipun, alpe qeju at-xix kyajb'en.

23Aqeju noq ch'in kyoklen tuj qnab'l tok ti'j qximlal, mas xb'alumi'nxix qu'n; ex aqeju mya b'a'nxix che ke'yin, mas kwentinxix qe qu'n.

24Porke aqeju b'a'nxix che ke'yin tok qi'j, minti' txqantl at tajb'en kye. B'i'x kyaj b'ant tten tu'n Dios tkyaqilju tok ti'j qximlal, ex aju ch'in toklen tok ti'j qximlal xi tq'o'n Dios mas toklen,

25tu'ntzun mi'n tel kyik'un kyib' qeju ate'k ti'j qximlal, o'kx tu'n tok kykwentin kyib' kyxolx.

26Qa at jun tok ti'j qximlal ma k'ixb'i, kykyaqil qeju ate'k ti'j qximlal nnik'x kyu'n junx tuk'il; ex qa at jun tok ti'j qximlal in tk'mo'n jun nimb'il, kykyaqil qeju ate'k ti'j qximlal in che tzalaj junx tuk'il.

27Kyja'tzun kytene, t-ximlal Crist qeye, ex teyle junjun kyeye tok ti'j t-ximlal Crist.

28Ex ok tq'o'n Dios kyoklen junjun kyxol kykyaqil okslal: Tnejelxix qe apostol, tkab'in qe t-sanjel Dios, toxin qe xnaq'tzal, ax ikx qeju in b'ant b'inchb'en nim tipumal kyu'n, ex qeju in che b'anix qe yab' kyu'n, ex qeju in che onin, ex qeju in che kawin, ex qeju in che yolin ti'j junxilchaq yol.

29¿Kykyaqilpe apostol qe? ¿Kykyaqilpe t-sanjel Dios qe? ¿Kykyaqilpe xnaq'tzal qe? ¿Kykyaqilpe in che b'inchan b'inchb'en nim kyipumal?

30¿Kykyaqilpe at kyoklen tu'n kyb'anix qe yab' kyu'n? ¿Kykyaqilpe in che yolin ti'j junxilchaq yol? ¿Kykyaqilpe in pjet yol kyu'n?

31Kyja'tzun kyq'o'nke tilil tu'n tten kyoklene mas b'a'nxix. Ex kxel nyek'une kyeye jun tumel mas b'a'nxix.