1 Pedro 4 - Mam Huehuetenango New Ortography

Tu'n qajb'en ik tza'nx ju qoklen ma tzaj tq'o'n Dios

1O tzik'x tu'n Crist tuj t-ximlal ex kyim, kyja'tzun ikx kyeye tu'n tten kynab'le ik tza'n tnab'l Crist; porke aju xjal otoq tzik'x tu'n tuj t-ximlal minti'tl taj ti'j il.

2Kyja'tzun, jte' q'ijtl tu'n kytene twitz tx'otx', o'kx che ximane ti'j tu'n tb'ant tajb'il Dios kyu'ne, ex mya tu'n kyximane ti'j aju in pon kyk'u'j xjal ti'j.

3Akux aju o kyb'inchaye ojtxi, o kyb'inchaye aju in che tzalaj txqantl xjal ti'j, aqeju minti' ojtzqi'n Dios kyu'n. Ojtxi minti' kyjuk'b'il kyib'e, in pon kyk'u'je ti'j mya b'a'n, k'al q'e'n qeye, in che achine tuj ninq'ij, nno'k k'aj q'e'n kyu'ne, in che k'ulune kywitz qe tilb'ilal, ik'b'ilxix qe.

4Qe txqantl xjal in che lab'in kyi'je tu'nju mya mojl in che b'ete kyuk'il, ex mya kytzoqpin kyib'e kyuk'il ik tza'n kye minti' kyjuk'b'il kyib', kyja'tzun in che yolin mya b'a'n kyi'je.

5Pero qe xjal lu ok kyq'a' tajlal twitz Dios aju b'anin tten tu'n kyok xjal tuj xjel tu'n, tza'nx qe xjal itz' ikx qe xjal o che kyim.

6Porke tu'n tlaj jlu o pakb'anjtz tqanil kolb'il kye qeju o che kyim, tu'ntzun tanq'in kyanmi ik tza'n te Dios itz'te, maske kub' kysentens tu'n kykyim ik tza'n kykyaqil xjal.

7In laq'ex ttzaj tq'ijlalil tu'n tb'aj tkyaqil; tenxtzun kynab'le ex che xq'uqine tuj na'j Dios.

8Pero aju mas il ti'j, tu'n ttenxix kyk'ujlalile kyxolxe, ex qa at kyk'ujlalile, knajsetel nimku kyil txqantl kyu'ne.

9Kyq'onxe posad kyxolxe ex mi'n tzaj jun kyyole ti'j.

10Aju toklen teyle junjun ma tk'am tz'ajb'enxwit tu'n kye txqantl, tu'n kyok te jun b'a'n mayordom ti'j ju kyoklen junxilchaq tten ma kyk'am tu'n Dios.

11Qa at jun in pakb'an, yolin ik tza'n in tma'n tyol Dios; qa at jun in ajb'en kye txqantl, tz'ajb'enx tu'n tipumal Dios, tu'ntzun tjaw nimsa'n tb'i Dios ti'j tkyaqil noq tu'n Jesucrist. Awt Dios tu'n tjaw nimsa'n tb'i ex tu'n tkawin tuj tkyaqil tab'q'iyil te jumajx. Ikxwitju.

Tu'n tik'x yajb'il qu'n porke okslal qo'

12Erman, aqeye at nk'u'je kyi'je, mi'n che jaw sek'paje tu'n tlaj joyb'il kyi'je in tzaj ik tza'n q'aq' tu'n tel nik'b'aj kyi'je; mi'n che ximane ti'j qa o'kx kyeye in tzaj joyb'il kyi'je.

13Noq o'kx che tzalajxe tu'n tik'x kyu'ne junx tuk'il Crist, tu'ntzun kytzalaje nimxix ok tul Crist in qoptz'aj wen tuj tajwalil.

14Qa ma che ok yaso'ne tu'n tlaj okslal qeye ti'j Crist at tzalajb'il kyeye porke tkub' T-xew Dios kyib'aje, aju Xewb'aj tb'anilxix.

15Kyja'tzun qa at jun kyeye ma tzik'x tu'n, pero kuchiwt mya tu'n tlaj in b'iyun, ex mya tu'n tlaj in elq'an, ex mya tu'n tlaj in b'inchan mya b'a'n, ex mya tu'nju nno'kx tlamon tib' ti'j tyol juntl.

16Pero qa at jun ma tzik'x tu'n tu'n tlaj okslal ti'j Crist, mi'n tzaj tch'ixwi, noq o'kx tu'n t-xi tq'o'n chjonte te Dios tu'nju okslal ti'j Crist.

17Porke ma pon tq'ijlalil tu'n t-xe't castiw kyxol qe tk'wa'l Dios. Qatzun nej ma xe't castiw qxol, ¿jatumtzun che pol qeju minti' in xi kyniman tqanil kolb'il in tzaj tq'o'n Dios?

18Ex qa peni ma klet jun xjal tz'aqlxix, ¿jatumtzun kpol ju xjal mya b'a'n ex ju xjal aj il?

19Kyja'tzun, qa ma tzik'x kyu'ne ik tza'n tajb'il Dios, kyoqxe'nanx kyanmiye te Dios aju Ch'isal kyeye, aju b'a'n tu'n tqe' qk'u'j ti'j, ex kyb'inchame aju b'a'n.