Romanos 14 - Mam Huehuetenango New Ortography

Mi'n yolina mya b'a'n ti'j termaniya

1Qa at jun erman mya kyuw tten tuj tokslab'l, kyk'mome, ex mi'n b'aj kyqanine tza'n tten t-ximb'etz.

2Tu'nju at junjun erman b'a'n tuj kywitz tu'n t-xi kychyo'n tkyaqil; atzun junjuntl mya kyuw kyten tuj kyokslab'l, minti' in xi kychyo'n chib'j, o'kx txqantl nik'b'eb'l in xi kyu'n.

3Qa at jun erman in xi tchyo'n tkyaqil, mi'n tz'el tik'un aju minti' in xi tchyo'n tkyaqil; ex qa at jun minti' in xi tchyo'n tkyaqil, mi'n yolin ti'j ju in xi tchyo'n tkyaqil; porke o k'met xjal lu tu'n Dios.

4¿Yajtzun teya, ti toklena tu'nju in yolina mya b'a'n ti'j tmajen juntl? Porke tuj tkwent tpatrón ta' qa wa'l ex qa kub'ni tz'aq; ex kb'el wab'anxix, tu'nju at tipumal Qajaw tu'n twe'xix.

5At junjun erman in ximan ti'j qa at jun q'ij mas b'a'n twitz juntl; atzun juntl in ximan ti'j qa junx kyxilen tkyaqil q'ij. Teyle junjun tu'n t-ximan ti'j alkye b'a'n tuj twitz.

6Alkye jun xjal niman jun q'ij tu'n, niman tu'n porke taj tu'n tniman te Qajaw, ex alkye jun xjal mya niman jun q'ij tu'n, mya niman tu'n porke taj tu'n tniman te Qajaw. Alkye jun xjal in xi tchyo'n tkyaqil, in xi tchyo'n porke taj tu'n tniman te Qajaw, ex in xi tq'o'n chjonte te Dios; ex alkye jun xjal minti' in xi tchyo'n tkyaqil, minti' in xi tchyo'n porke taj tu'n tniman te Qajaw, ex in xi tq'o'n chjonte te Dios.

7Ex mi a'l jun qe in anq'in tu'n tajb'en teju tex tajb'il, ex mi a'l jun in kyim tu'n tex tajb'il.

8Ex qa in qo anq'in, in qo anq'in tu'n qajb'en te Qajaw; ex qa ma qo kyim, tu'n tajb'il Qajaw qo kymel. Kyja'tzun, qa in qo anq'in ex qa ma qo kyim, te Qajaw qo'.

9Tu'ntzunju kyim Crist ex jaw anq'in, tu'n tok te Kyajaw kyimni ax ikx kye itz'.

10¿Yajtzun teya, tiqu'n in yolina qa mya b'a'n termaniya? ex ¿tiqu'n nne'l tik'una termaniya? Porke qkyaqil qo pol twitz Crist tu'n qok tuj xjel.

11Porke in tma'n tuj Tu'jil:

Aqine Dios in xi nma'ne jun nyole axix tok, che b'el ẍmeje' kykyaqil xjal nwitze, ex kykyaqil xjal ok kyma' qa aqine Dios, chi tuj Tu'jil.

12Kyja'tzun, teyle junjun qe ok tq'a' tajlal twitz Dios ti'j tb'inchb'en.

Mi'n kub' tq'o'na jun tolsab'l twitz termaniya

13Kyja'tzun, mi'n qo yolin mya b'a'n ti'j juntl qxolx, noq o'kx qo ximan ti'j tu'n mi'n tkub' qq'o'n jun tolsab'l twitz jun qerman ex tu'n mi'n tkub' tz'aq tuj il qu'n.

14Tu'nju okslal qine ti'j Qajaw Jesús, kyja'tzun b'a'n wu'ne ex ma tz'el nnik'e ti'j, minti' jun chib'j mib'anwt tchyo'njtz, ex qa at jun erman in ximan ti'j qa mya b'a'n tu'n t-xi tchyo'n noq alkyex, ex mi'n txi tchyo'n, porke mya b'a'n tuj twitz.

15Qatzun ma b'isun termaniya tu'n tlaj ju in xi tchyo'na, ex minti'tl tk'ujlalila ti'j termaniya ikju. Mi'nwt tz'el tzpet termaniya tu'n tlaj ju in xi tchyo'na, porke o kyim Crist tu'n tklet.

16Mi'n kyaq'e amb'il tu'n tyolinjtz mya b'a'n ti'j ju b'a'n nne'la tuj kywitze.

17Porke aju tkawb'il Dios myatzun a tnab'l ti'j qchi' ex qa ti'j qk'a', noq o'kx tu'n qten tz'aqlxix ex tuj qmojb'ab'l qib' qxol ex tuj tzalajb'il tu'n Xewb'aj Xjan.

18Ex alkye in ajb'en te Crist ik tza'n jlu, in tzalaj Dios ti'j, ex nnik' kywitz xjal ti'j qa b'a'n.

19Kyja'tzun, qo lpe'k ti'j ju in tzaj q'inte qmojb'ab'l qib' qxolx ex aju in ajb'en te ch'isb'il qnab'l qxolx.

20Mi'n kub' t-xituna taq'unb'en Dios tu'n tlaj ju in xi tchyo'na. Ax tok tkyaqil chib'j saq ta'; ex mya b'a'n tu'n tkub' tz'aq juntl erman tuj il tu'n tlaj ju in xi tchyo'na.

21B'a'n tu'n mi'n t-xi tchyo'na chib'j ex tu'n mi'n t-xi tk'a'na vin ex mi jun tu'n tb'inchanteya aju jaku jaw tolj termaniya tu'n, tu'ntzun mi'n tkub' tz'aq tuj il, ex tu'n mi'n tkub' numj tuj tokslab'l.

22Qa at tokslab'la, tenx tokslab'la twitz Dios. At tzalajb'il teju xjal minti' in tma'n tanmi qa at til ti'j jun ti'xti aju otoq tzik' twitz ti'j qa b'a'n.

23Atzunju xjal in jolpaje' tk'u'j ti'j ju in xi tchyo'n, atzun ilju, porke ma txi tchyo'n ex mya q'uql tk'u'j ti'j qa b'a'n; ex tkyaqilju in qb'incha'n qa mya q'uql qk'u'j ti'j qa b'a'n, atzunte ilju.