1Aqe rey kye aj Heteo, kye aj Amorreo, kye aj Canaán, kye aj Ferezeo, kye aj Heveo ex kye aj Jebuseo o kyb'i aju otoq b'aj. (Aqeju rey lu, atzun najlqe tumlal telex q'ij te nima Jordán, kywi' qe witz, tuj chq'ajlaj, tuj tkyaqil mlaj tx'otx' te Nintz mar ex max ponin b'aj kytx'otx' t-xe witz Líbano.)
2O moje' kyyol kykyaqil tu'n kyxi' q'ojlel ti'j Josué ex kyi'j aj Israel.
3Atzun kye aj Heveo aqeju najlqe tuj tnam Gabaón, tej kyb'inte aju otoq tb'incha Josué ti'j tnam Jericó ex ti'j tnam Hai,
4kub' kyximan tu'n kyok ten sb'ul ti'j Josué. Tzyettzun b'e kyu'n; ok kyq'o'n ttx'aqan sak kyi'j qe kybur ex qe tz'u'm tkub'il ta'l twitz uva ttx'aqan qe ex xb'uqamaj qe;
5ax ikx ok kyq'o'n kyxb'alun ex kyxajab' ttx'aqan wen ex xb'uqamaj qe, ex aju kywa xi kyi'n tuj kyb'e tx'i'l wen ex otoq jlet lan kyi'j.
6Tejtzun kypon tuj kycampament xjal tuj lugar Gilgal, xi kyma'n te Josué ex kye aj Israel:
—Tzajni qo'ye tuj jun tx'otx' najchaq. Kyb'inchame ti'j jun kyyole quk'ile.
7Xitzun kytzaq'we'n qe aj Israel kye aj Heveo:
—Yajtzun qa ax najl qeye niqayin qi'je, ¿tza'ntzun tten tu'n tb'ant ti'j jun yol qu'ne kyuk'ile?
8Atzun kye tzaj kyma'n te Josué:
—Jaku qo oke te tmajena.
Ex xi tqanin Josué kye:
—¿Alkyetzun qeye ex jatum tzajni qeye?
9Atzun kye tzaj kytzaq'we'n:
—Najchaq tzajni qo'ye wen noq tu'nju b'a'nxix tb'inx tqanil o qb'iye ti'j Dios aju Tdiosa. O qb'iye tkyaqilju o tb'incha tuj Egipto,
10ex aju o tb'incha kyi'j qe kab'e rey kye aj Amorreo, aqeju ate'toq jlajxi nima Jordán; ti'j Sehón aju rey te Hesbón, tuk'ix Og aju rey tuj tx'otx' Basán, aju najltoq tuj tnam Astarot.
11Kyja'tzun, aqeju nejenel qeye ex qeju najl tuj qtx'otx'e tzaj kyma'n qeye: Kyi'nx kywaye tuj kyb'eye ex kyxi'ye jatum ate' qe aj Israel, ex kymanxe kye: Qaje qo oke te kymajene, ex qaje tu'n tkyaj b'ant ti'j jun kyyole quk'ile, che chi tzaj kyma'n.
12Tej qetze jyolte kyeye, aju qwaye lu meq'mojxtoq ta' tej ttzaj qi'ne, atzun ja'lo ma jlet lan ti'j ex puro tx'i'l ma tz'ok wen.
13Ax ikx qe tz'u'm lu, ak'ajx qe tej kyku'x qnojsa'ne tu'n ta'l twitz uva, atzun ja'lo ttx'aqan qe. Ax ikx ma che tenb'a qe qxb'alune ex qe qxajb'iye, ma che b'aj tu'n tlaj najchaq ma qo tzaje, che chi xjal aj Gabaón.
14Atzun kye aj Israel xi kynik'b'e'n kywa aj Gabaón, ex minti' xi kyqanin te Qman alkye tu'n kyb'inchante.
15B'anttzun ti'j jun yol tu'n Josué kyuk'il, tu'n mi'n tten q'oj kyxol, ex xi ttziyan tu'n mi'n kykub' tb'yo'n; ax ikx qe txqantl nejenel kyxol aj Israel xi kytziyan tu'n tb'ant ikju.
16Tb'ajlenxi ox q'ij o kyb'i aj Israel qa aqe aj Gabaón ax najlqe niqayin kytxlaj.
17E je'xtzun qe aj Israel jyolte kye aj Gabaón, ex tujxi toxin q'ij e pon kyuj qe tnam jatum ate' qe, ex atzun qe tnam jlu: Gabaón, Cafira, Beerot ex Quiriat-jearim.
18Ex minti' e kub' b'yo'n qe kyu'n aj Israel, porke aqeju nejenel kyxol otoq txi kytziyan jun yol twitz Qman Dios tu'n mi'n tkub' kyb'yo'n qe.
Tu'ntzun jlu tzaj kyyol tnam xjal kyi'j qe nejenel ate' kyxol.
19Atzun kye nejenel xi kyma'n kye:
—Ma txi qtziyane jun yol twitz Qman Dios tu'n mi'n kykub' qb'yo'ne. Kyja'tzun ja'lo mlay qb'inchaye jun ti'xti mya b'a'n kyi'j.
20B'a'n tu'n kykyaj anq'in qu'n, ex qa mi'n ma japun qu'n aju yol ma txi qtziyane, jakulo tzaj tq'oj Dios qi'j.
21Xi kyma'n qe nejenel kye aj Israel tu'n mi'n kykub' b'yo'n, noq o'kx e ok q'o'n te iqal si' ex te iqal a' tu'n tajb'en kye kykyaqil tnam xjal. Kyja'tzun o japun aju yol xi kytziyan qe nejenel.
22E tzajtzun ttxko'n Josué qe xjal aj Gabaón ex xi tqanin kye:
—¿Tiqu'n o qo kub' kysb'u'ne tu'nju o kymaye qeye qa najchaq otoq che tzaje, ex axtoq najl qeye tzalu?
23Tu'ntzun jlu kb'el kycastiwoye ex che okele te majen te jumajx. Che tx'emile si' ex che iqale a' tu'n tajb'en tuj tja Ndiose.
24Atzun kye xi kytzaq'we'n te Josué:
—O qb'inchaye ikju ex tzaj nimxix qxob'ile kywitze; jakulo b'ant qkub' kyb'yo'ne, qo chiye, porke o qb'iye tqanil yol xi tma'n Qman aju Kydiose te Moisés aju tmajen, xi tma'n tu'n t-xi tq'o'n tkyaqil tx'otx' lu te kyeye ex tu'n tkub' kyb'yo'ne kykyaqil xjal najl tzalu.
25Lu qo'ye ato'ye tuj kyq'ab'e; kyb'inchame qi'je noq alkye b'a'n tuj kywitze, che chi.
26Kyja'tzun minti' xi tq'o'n Josué amb'il kye aj Israel tu'n kynaj aj Gabaón kyu'n,
27ex e ok tq'o'n tu'n kytx'emin si' ex tu'n kyiqan a' tu'n tajb'en kye tnam xjal, ex tu'n tajb'en ti'j aq'untl ttxlaj altar te Qman tuj lugar kjawil t-sk'o'n. Ex axtzun kyaq'un aj Gabaón in b'ant ja'lo.
Who We AreWhat We EelieveWhat We Do
2025 by iamachristian.org,Inc All rights reserved.
