2 Corinto 7 - Mam Huehuetenango New Ortography

1Aqeye erman at nk'u'je kyi'je, atzunju yol lu tzaj ttziyan Dios qe. Kyja'tzun qtx'jo'mel tkyaqilju in tz'ilsante qchib'jal ex in tz'ilsante qanmi; ex atwit tchi Dios tuj qwitz ex tu'n t-xi qq'on qib' te Dios tu'n qajb'en o'kx te te jumajx.

Ajtz ti'j kyanmi aj Corinto

2Kyb'inchame xtalb'il, kyq'ontze amb'il qeye tu'n qyoline kyuk'ile. Mi jun xjal ma qb'inchaye mya b'a'n ti'j, mi jun xjal ma tz'el txalpuj qu'ne, mi jun xjal ma kub' qsb'u'ne.

3Minti' ma txi nma'ne jlu kyeye tu'n wok tene ilil kyi'je; porke ojtxi o txi nma'ne kyeye, nim nk'ujlalile kyi'je, qa tu'n qkyim, junx tu'n qkyim, ex qa tu'n qanq'in, junx tu'n qanq'in.

4Nimxix in qe' nk'u'je kyi'je, ex nim in chin tzalaje kyi'je; ma q'uqb'anjtzxix nk'u'je; ex mas nim in chin tzalaje tuj tkyaqil yajb'il qeye.

5Ex tej qtene tuj Macedonia minti' o qo ojlan ch'ine, noq o'kx tichaq yajb'il qeye tzaj; jun, in che q'ojin xjal qi'je, ex juntl, tzaj qxob'ile tuj qanmiye.

6Ex ate Dios in q'uqb'ante kyk'u'j qeju in che b'isun, ex o q'uqb'anjtz qk'u'je tu'n, tu'nju ul Tito.

7Mya noq o'kx q'uqb'anjtz qk'u'je tu'nju ul Tito, ax ikx tu'nju otoq q'uqb'anjtz tk'u'j Tito kyu'ne. Tzaj tma'n Tito qeye nim kyganiye qi'je ex tza'n tten tzaj kyb'ise tu'n tlaj ju mya b'a'n tzaj kyxole, ex at kyk'u'je wi'je; kyja'tzun mas in chin tzalaje.

8Ex maske tzaj kyb'ise wu'ne tu'nju u'j xi nsama'ne kyeye, pero minti' in chin b'isune ja'lo tu'n jlu; b'alo tzaj ch'in nb'ise ti'j nej, porke ma wile tzaj kyb'ise tu'nju u'j xi nsama'ne kyeye, maske noq te kab' q'ij e b'isune.

9Ex ja'lo in chin tzalaje; myatzun ti'j ju kyb'ise tzaj in chin tzalaje, noq o'kx in chin tzalaje tu'nju tzaj kyb'ise tu'n tajtz ti'j kyanmiye; ex tzaj kyb'ise ik tza'nx tajb'il Dios, kyja'tzun minti' jun mya b'a'n ma qb'inchaye kyeye.

10Porke aju qb'is in tzaj ik tza'nx tajb'il Dios in ajtz ti'j qanmi tu'n tu'n qklet, ex mlay tzajtl qb'is ti'j; atzun kye xjal kyb'is, in tzaj kamik tu'n.

11Che ximane ti'j, aju kyb'ise tzaj ik tza'nx tajb'il Dios nim ma tz'ajb'en; porke tu'n jlu ma tz'ok tilil kyu'ne tu'n tb'ant ti'j ju mya b'a'n tzaj kyxole, ex kyja'tzun ma che kyaj tene minti' kyile, tzaj kyq'oje ti'j ju o b'aj kyxole, tzaj kyxob'ile, tzaj nim kyganiye tu'n kylonteye nwitze, at kyk'u'je qi'je, ex kub' kyq'o'ne tcastiw ju xjal o b'inchan il. Tkyaqil jlu b'ant ti'j kyu'ne minti'tl kyile ti'j.

12Kyja'tzun, aju u'j xi ntz'ib'ane, mya tu'n tlaj ju xjal b'inchante ju mya b'a'n, ex mya tu'n tlaj ju xjal o b'inchanjtz mya b'a'n ti'j, noq o'kx xi ntz'ib'ane tu'n tel kynik'e ti'j qa nim kyganiye qi'je twitz Dios.

13Kyja'tzun ma qe' qk'u'je tu'nju ma q'uqb'anjtz kyk'u'je.

Ex mas nimxix in qo tzalaje tu'nju in tzalaj Tito; porke ma q'uqb'anjtz tk'u'j Tito kyu'ne kykyaqile.

14Aju o txi nma'ne te Tito qa mejor okslal qeye, ax tok, minti' ma tzaj nch'ixwiye tu'n, tkyaqilju ma txi qma'ne kyeye ax tok; ax ikx ju yol xi qma'ne te Tito qa mejor okslal qeye, ma tz'el ax tok.

15Ex mas in tenxix tk'ujlalil Tito kyi'je ok in tzaj tna'n tza'n tten xi kynimane tyol kykyaqile, ex ok in tzaj tna'n tza'n tten k'met kyu'ne at tchiylal tuj kywitze.

16In chin tzalaje, porke tuj tkyaqil ma qe' nk'u'je kyi'je.