Éxodo 36 - Mam Huehuetenango New Ortography

1Kyja'tzun, ate Bezaleel ex Aholiab, kyuk'ix kykyaqil qeju at kynab'l tu'n kyb'inchante aq'untl tb'anilxix, aqeju o tzaj tq'o'n Qman kynab'l ex kyojtzqib'l tu'n kyb'inchante tkyaqilju at tajb'en tuj tja Dios, kb'antel kyu'n aju o tzaj tma'n Qman, chi Moisés.

Tzaj kyi'n aj Israel nimxix oyaj

2Tzaj txko'n Bezaleel tu'n Moisés, tuk'ix Aholiab ex kykyaqil qeju attoq kynab'l tu'n kyb'inchante aq'untl tb'anilxix, aqeju otoq tzaj tq'o'n Qman kynab'l ex otoq txi kyq'on kyib' tu'n kyex kygan tu'n kyonin ti'j aq'untl lu.

3Xi kyk'mo'n te Moisés qe oyaj otoq che ul kyi'n aj Israel tu'n kyajb'en tuj tja Dios.

Atzun kye aj Israel, teyle junjun prim kukxtoq tul kyi'n kyoyaj tu'n kyex kygan.

4Kykyaqil qeju attoq kynab'l ex in che aq'nantoq ti'j ju attoq tajb'en ti'j tja Dios, we' ch'in aq'untl kyu'n,

5ex e je'x q'malte te Moisés kyja': Ma tzul kyi'n xjal mas nim twitzju at tajb'en ti'j aq'untl o tzaj tma'n Qman tu'n tb'ant, che chi.

6Xitzun t-sama'n Moisés tqanil kyxol kykyaqil xjal tuj campament, chi kyja': Mi jun xinaq, mi jun xu'j ktzajel ti'ntl toyaj ti'j tja Dios. Kyja'tzun tten o we' tu'n tul kyi'n xjal kyoyaj.

7Mya noq o'kx otoq chmet aju attoq tajb'en tu'n tb'ant aq'untl, ax ikx otoq pon txqantl tib'aj.

B'ant tja Dios, xb'alun ja Éxodo 26.1-37

8Aqeju mas attoq kynab'l tu'n kyb'inchante aq'untl tb'anilxix, b'aj kyb'incha'n ja xb'alun kyi'j laj xb'alun b'inchamaj ti'j noq' lino ex ti'j noq' ẍq'ilun ke'yin, ẍjulin ke'yin ex kyaq ke'yin; tkyaqil noq' chub'emajtoq ex tb'anil b'inchb'en kye, ex b'i'x xi kychmo'n kyilb'ilal querubín kywitz.

9Kykyaqil xb'alun lu junx ta' echb'il kye: Kyajlaj var kynuqb'il ex kab' var kywitz.

10Ok t-slapun Bezaleel jwe' xb'alun jun ttxlaj juntl, ax ikx e tenb'a jwe'tl.

11E ok tq'o'n taq'al ẍq'ilun che ke'yin te t-ẍkyin ttxlaj mankb'il xb'alun kyi'j qe jwe' otoq che ok slapit. Ax ikx e ok tq'o'n taq'al ttxlaj jun xb'alun kyi'j qe jwe'tl.

12E ok tq'o'n 50 taq'al te t-ẍkyin ttxlaj tnejel xb'alun ex 50 ttxlaj juntl, tu'n tkyaj ten jun twitz juntl.

13Ax ikx b'aj tb'incha'n 50 ganch q'an pwaq kytx'otx'il. Kyu'ntzun qe jlu e ok tmojb'a'n qe ttxlaj xb'alun jun tuk'il juntl. Oktzun ja xb'alun te junx tten.

14Ax ikx b'aj tb'incha'n junlaj xb'alun ti'j kytzmal chip, tu'n t-xi lik'et tib'aj ja xb'alun.

15Kykyaqil qe xb'alun lu junx ta' echb'il kye: Olaj var kynuqb'il ex kab' var kywitz.

16E ok t-slapun jwe' xb'alun jun ttxlaj juntl, ax ikx e ok t-slapun qaqtl xb'alun jun ttxlaj juntl.

17E ok tq'o'n 50 taq'al te t-ẍkyin ttxlaj tnejel xb'alun ex 50 ttxlaj juntl.

18Ax ikx tb'incha 50 ganch q'an k'uxb'il kytx'otx'il tu'n kyok moje' kytxa'n xb'alun, tu'ntzun tok te junx tten.

19Tb'incha jun maqsib'l te ja xb'alun ti'j ttz'umal ẍne'l tok tk'a' kyaq ke'yin, ex tib'ajxi jlu tb'incha juntl maqsib'l ti'j tz'u'm tb'anilxix.

20E b'aj tb'incha'n txqan tz'lom ti'j tze' ch'i'x acacia, aqeju wa'l kyten tu'n kyajb'en ti'j ja xb'alun.

21Teyle junjun tz'lom, jwe' var tnuqb'il ex ox xk'achub' twitz.

22Teyle junjun tz'lom at kab'e t-ẍkyin tu'n tku'x qe' jun ttxlaj juntl. Iklex e tenb'a kykyaqil qe tz'lom tu'n ti'j ja xb'alun.

23E b'aj tb'incha'n winqin tz'lom tu'n kyok ten tuj tumlal tnayaj q'ij te ja xb'alun.

24Ax ikx e kub' tb'incha'n 40 kyq'uqb'il tz'lom saq pwaq kytx'otx'il. Kab'e tq'uqb'il tjaq' teyle junjun tz'lom, tu'n kyku'x qe' kykab'il kyẍkyin kyuj.

25Ax ikx tuj juntl pak' ja xb'alun, tuj tumlal tb'anq'ab' q'ij tb'incha winqin tz'lom,

26ex 40 kyq'uqb'il saq pwaq kytx'otx'il, tu'n kyten kab'e tjaq' teyle junjun tz'lom.

27Atzun ti'jxi ja xb'alun, tuj telex q'ij, e b'aj tb'incha'n qaq tz'lom

28ex kab'etl tz'lom tu'n kyok kyi'j qe kab'e tb'utx' te ti'jxi,

29aqeju tu'n kymojb'et xi'ynix t-xe', atzun twi' tu'n kyok mojb'et tu'n jun argoy. Atzun jlu tb'incha kyi'j kykab'il tz'lom kyi'j kykab'il tb'utx' te ti'jxi.

30E b'anttzun wajxaq tz'lom ex qaqlaj kyq'uqb'il saq pwaq kytx'otx'il, kab'e tjaq' teyle junjun tz'lom.

31Ax ikx b'aj tb'incha'n jwe' tze' ti'j tze' ch'i'x acacia, te tq'e'lil, tu'n kyok ten qe tz'lom kyi'j tuj jun pak' ja xb'alun,

32jwe'tl tze' tu'n kyok ten qe tz'lom kyi'j tuj juntl pak' ex jwe'tl tu'n kyok ten qe tz'lom kyi'j ti'jxi ja xb'alun tuj telex q'ij.

33B'aj tb'incha'n aju tze' te tuj tmij, tu'n tik'x kymij qe tz'lom, tu'n t-xi qe' ti'j jun ttxa'n ex tu'n tpon b'aj ti'j juntl.

34Ok tlo'tzin q'an pwaq kyi'j qe tz'lom ex e b'aj tb'incha'n qe argoy q'an pwaq kytx'otx'il jatum tu'n kyex qe tze'. Ax ikx ok tlo'tzin q'an pwaq kyi'j qe tze' lu.

35B'aj tb'incha'n jun xb'alun te maqb'il, ti'j noq' lino chub'emaj ttze'yil, ex ti'j noq' ẍq'ilun ke'yin, ẍjulin ke'yin, kyaq ke'yin, tb'anil b'inchb'en te, ex b'i'x xi tchmo'n kyilb'ilal querubín twitz.

36B'aj tb'incha'n kyaje tqan ti'j tze' ch'i'x acacia, ex ok tlo'tzin q'an pwaq kyi'j. Ax ikx tb'incha qe tganchil q'an pwaq kytx'otx'il, ex kyaje kyq'uqb'il tqan saq pwaq kytx'otx'il.

37Ax ikx tb'incha jun xb'alun te maqb'il ttzi ja xb'alun. B'aj tb'incha'n ti'j noq' ẍq'ilun ke'yin, ẍjulin ke'yin ex kyaq ke'yin ex ti'j noq' lino chub'emaj ttze'yil, ex b'i'x xi tchmo'n qe tilb'ilal twitz.

38E b'aj tb'incha'n jwe' tqan tuk'ix adorn tjax tuj kywi', ex ok tlo'tzin q'an pwaq kyi'j. Ax ikx tb'incha qe tganchil q'an pwaq kytx'otx'il, ex tb'incha jwe' kyq'uqb'il tqan q'an k'uxb'il kytx'otx'il.