Esdras 4 - Mam Huehuetenango New Ortography

Kyajb'iltoq aj q'oj tu'n tmayet aq'untl

1Tejtzun kyb'inte qe aj q'oj kyi'j aj Judá ex kyi'j aj Benjamín, qa otoq che etz tuj Babilonia ex in che aq'nantoq tu'n tjaw b'inchet juntl maj tja Dios, aju Kydios aj Israel,

2e je'x ke'yil kye Zorobabel ex Jesúa ex qe nejenel kye junjun k'loj kyiyjil aj Israel ex kyma:

—Q'ontza amb'il qeye tu'n qonine kyuk'ile tu'n tjaw b'inchet tja Dios, ex aqo'ye ex aqeye in qo k'ulun twitz Dios aju Kydiose, ex in xi qq'o'ne chojb'il te atxix tuj tq'ijlalil Esar-hadón, aju rey kye aj Asiria, aju ul q'inte qeye tzalu.

3Atzun kye Zorobabel, Jesúa ex qe nejenel kye junjun k'loj kyiyjil aj Israel xi kytzaq'we'n:

—Minti' kyoklene tu'n kyaq'nane junx quk'ile tu'n tjaw b'inchet tja Qdiose. O'kx qeye qo jawil b'inchante te juntl maj, porke o'kx qeye ma tzaj q'o'n orden tu'n rey Ciro tu'n tjaw qb'incha'ne.

4Atzun kye xjal najlqe tuj lugar lu e ok ten xob'tzal kye aj Judá tu'n t-xi kykolin aq'untl ti'j tja Dios.

5Ax ikx e ok ten qe xjal lu q'ol pwaq kye junjun xjal ma' kyoklen ttxlaj rey, tu'ntzun t-xi kykolin aj Judá aq'untl ti'j tja Dios. O kyb'incha jlu tuj tkyaqil tq'ijlalil Ciro aju rey kye aj Persia, ex max tuj tq'ijlalil tej tkawin rey Darío aju rey kye aj Persia.

6Matoq in tzyet tkawin rey Asuero, e pon qe xjal tuk'il q'malte yol mya b'a'n kyi'j aj Judá ex kyi'j aj Jerusalén.

7Ex tuj tq'ijlalil Artajerjes aju rey kye aj Persia, ate Bislam tuk'ix Mitrídates, Tabeel ex txqantl kyuk'il, kub' kytz'ib'an jun u'j ex xi kysama'n te rey Artajerjes. Aju u'j lu tz'ib'antoq tuj yol arameo.

8Ate Rehum aju gobernador tok tu'n rey, tuk'ix Simsai aju aj tz'ib'al, xi kytz'ib'an jun u'j te rey Artajerjes, jatum in yolin mya b'a'n kyi'j kykyaqil xjal najlqe tuj Jerusalén.

9-11Atzunju u'j lu xi kysama'n Rehum aju gobernador, tuk'ix Simsai aju aj tz'ib'al ex qe txqantl kyuk'il aqeju jwes qe, kyuk'ix txqantl gobernador, ex qe xjal ma' kyoklen otoq che tzaj tuj Persia, tuj Erec, tuj Babilonia ex tuj Susa ex qa tuj Elam, ex qe txqantl xjal te junjun tnam e ul q'i'n tu'n rey Asnapar aju ma' toklen, tu'n kynajan tuj tx'otx' Samaria ex kyuj txqantl tx'otx' tkub'sa'n tuj telex q'ij te nima Éufrates.

Atzun tyol u'j lu, aju xi kysama'n:

Aya Tat Rey Artajerjes, aqo'ye tmajena najlqo'ye jlajtzi nima Éufrates in xi qq'olb'e'ne:

12Qajb'ile tu'n tb'inteya Tat Rey: Qe xjal judiy ẍe tzaj tuk'ila tu'n kyul quk'ile ma che ul tuj Jerusalén, jumajx tx'u'j kywi' ex mib'an che b'in. Ma tzyet tu'n tjaw kyb'incha'n juntl maj tnam tuk'ix muro tok ti'jele, ex nib'an t-xi kyb'incha'n qe t-simyentil muro.

13Ax ikx qaje tu'n tb'inteya Tat Rey, qa ma jaw b'incha'n juntl maj tnam lu, ex qa ma jaw b'incha'ntl muro ti'jele, ex qe xjal lu mlay chjet chojenj kyu'n, ax ikx txqantl chojb'il aju il ti'j tu'n tchjet, ex tu'n jlu kb'el laq'e' tq'inumab'la.

14Ex tu'nju in qo ajb'ene teya Tat Rey, mi'n qaje tu'n ttzaj jun mya b'a'n ti'ja ik tza'n jlu. Tu'ntzunju in xi qsama'ne tqanil lu teya.

15B'a'n tu'n tku'x jyet kyuj qe libro jatum tz'ib'an tkyaqil tx'olb'ab'en kyu'n qtzan t-xe'chela, ex oktzun tknet tu'na aju tz'ib'an tuj libro, k'eleltzun tnik'a ti'j, aqeju tnam xjal lu mib'an che b'in ex jawni qe kyi'j qe rey ex kyi'j qe xjal ate' kyuj txqantl tnam. Tuj tyemp ojtxi jaw kyi'n kyib' tu'n kyq'ojin kyi'j qe rey, ex tu'ntzun jlu kub' xitun kytanmi.

16Kyja'tzun in xi qq'one tqanil lu teya Tat Rey; qa ma jaw b'incha'n juntl maj tnam lu ex qa ma jaw b'incha'n juntl maj muro ti'jele, k'elel q'i'n toklena tu'n tkawina tuj tx'otx' tuj telex q'ij te nima Éufrates, chi tuj u'j.

17Atzunte rey Artajerjes aj tq'o'n tzaq'web'l kyja':

Aya Rehum aju gobernador, tuk'ix Simsai aju aj tz'ib'al, ex qe txqantl kyuk'ile najlqe tuj Samaria ex tuj tx'otx' tuj telex q'ij te nima Éufrates: In che'x nq'olb'e'ne.

18Aju u'j tzaj kysama'ne weye ma b'aj pju'n ti'j ex ma jaw sch'i'n nwitze,

19ex ma txi nq'o'ne orden tu'n tku'x jyet qa ax tok jlu. Ax tok ma knet kypaltil tnam xjal lu. Ela' maj jaw kyi'n kyib' kyi'j qe rey ojtxi, ex b'ant ti'j kyu'n tu'n kyq'ojin kyi'j qe rey kye junjun nasyon,

20ex e ten junjun rey nimxix kyipumal tuj Jerusalén, kub' kyi'j qe tnam kyu'n, kykub'sa'n tuj tumlal telex q'ij te nima Éufrates ex aqeju tnam lu o chjet tkyaqil txkaj chojenj kyu'n kye qe rey te Jerusalén.

21Ja'lotzun kyq'onxe orden kye qe xinaq lu tu'n twe' aq'untl kyu'n, tu'n mi'n tjaw b'inchet tnam juntl maj; maxi kjawil b'inchet okxi t-xi nq'o'ne juntl ak'aj orden.

22Mi'n tzik' tna'l jlu kyu'ne, tu'ntzun mi'n ttzaj jun mya b'a'n ti'j nkawb'ile, chi tuj u'j.

23Tejtzun tpon u'j lu tu'n Artajerjes, jaw sch'i'n kywitz Rehum, Simsai aju aj tz'ib'al, ex qe txqantl kyuk'il; kykyaqiltzun qe e je'x naj tuj Jerusalén ex lajwers e ok qe xjal judiy kyu'n tu'n t-xi kykolin aq'untl.

24Tu'ntzun jlu kyaj kolin aq'untl ti'j tja Dios tu'n mi'n tjaw b'inchet tuj Jerusalén; maxi tuj tkab'in ab'q'i ttzyetlen tkawin Darío aju rey kye aj Persia, tzaj kyna'ntl juntl maj tu'n tjaw b'inchet tja Dios.