Ezequiel 11 - Mam Huehuetenango New Ortography

Tej tkub' kycastiw aj Jerusalén

1Aju T-xew Qman jaw q'inte weye, ex inx q'i'ne tu'n max ttzi tja, aju xi'yni twitz tumlal tjawitz q'ij. Ttzi' ju ja lu ate'toq 25 xinaq. Kyxol qe jlu el nnik'e ti'j Jaazanías aju tky'ajal Azur, ex Pelatías aju tky'ajal Benaías; aqe jlu nejenel qe tuj tnam.

2Ex tzaj tma'n Qman weye kyja': Atzun qe jlu in b'aj kyximan tu'n kyb'inchante mya b'a'n, ex in kyq'o'n consej mya b'a'n tuj tnam lu.

3In kyma'n kyja': Mya b'a'n tu'n tjaw qb'incha'n qja tuj tq'ijlalil ja'lo. Ik qten tuj tnam ik tza'n chib'j tuj jun k'il, che chi.

4Kyja'tzun, q'manxa kye aju kxel nma'ne teya ti'j kycastiw tu'n tkub', chi Qman weye.

5Kub' ten T-xew Qman wib'aje ex tzaj tma'n weye tu'n t-xi nma'ne kye kyja': Atzun jlu in tma'n Qman: Atzun jlu in che ximane ti'j, aqeye aj Israel. B'a'n wu'ne alkye kyximb'etze.

6Nimku xjal ma kub' kyb'yo'ne tuj tnam lu ex ma noj kyuj cay kyu'ne kyu'n kyximlal kyimni.

7Kyja'tzun, aqine Dios kxel nkyuwsa'ne jlu kyeye: Aju tnam Jerusalén k'okel ik tza'n jun k'il, ex mya aqeye che okel te chib'j, noq o'kx che okel te chib'j kyximlal kyimni aqeju ma che kub' kyb'yo'ne, atzun kyeye che eletz wi'ne tuj tnam.

8¿Tzinpe in che xob'e te q'oj? Ktzajel q'oj kyi'je wu'ne. Aqine Dios ma chin q'mante ju yol lu.

9Kb'el kycastiwoye wu'ne: Che elex wi'ne tzalu, ex che xel nq'o'ne tu'n kytene tjaq' kykawb'il qe stranjer xjal.

10Che kymele tu'n spad. Kb'el kysentense wu'ne tuj tmojonil kytanmiye, k'eleltzun kynik'e ti'j, aqine Dios.

11Aju tnam mlay tz'ajb'en kyeye ik tza'n jun k'il, ex mi aqeye che okel ik tza'n chib'j, wu'ne kb'el kysentense tuj tmojonil kytanmiye, aqeye aj Israel.

12K'eleltzun kynik'e ti'j, aqine Dios. Minti' in che b'ete ik tza'nx o txi nma'ne kyeye, ex minti' in che japun qe nleye kyu'ne. Noq o'kx ma che'x lpe'ye ti'j kyb'inchb'en qe nasyon ate' kyi'jeleye, chikuya kye, chi Qman weye.

13Tej matoq in xi nma'ne kye aju otoq tzaj tma'n Qman, b'i'x kyim Pelatías aju tky'ajal Benaías. In kub'tzun mok'e'ye tejxi tpon takl tib'aj nwitze twitz tx'otx', ex in jaw sch'ine kyuwxix wen, ex xi nma'ne kyja': Ay Nman. ¿Maj che b'ajel naj tu'na qe ch'intl aj Israel ate'x?

Jun ak'aj yol xi' ttziyan Dios kye aj Israel

14Tzaj yolin Qman wuk'ile ex tma kyja':

15Qe xjal ma che kyaj ten tuj Jerusalén in che yolin kyi'j qe aj Israel ate' tuk'ila, aqeju t-xjalila ex termaniya, ex in kyma'n kyja': Qe aj Israel o che'x q'i'n tuj Babilonia najchaq ate' ti'j Qman. Mya ik tza'n qe ma tzaj tq'o'n Qman ju tx'otx' te qe tu'n qok te tajwil, che chi.

16Kyja'tzun q'manxa kye: Atzun jlu in tma'n Qman: Aqine inx samante kye tuj juntl tx'otx' najchaq ex e b'aj nsputune kyxol qe nasyon, kyxol qe tnam minti' ojtzqi'n kyu'n, ex noq te nik'xi q'ij. Atzun ja'lo ax qine chin tele kyuk'il kyuj qe tnam jatum o che pon q'i'n.

17Ax ikx q'manxa kye kyja': Atzun jlu in tma'n Qman. Aqine chin ajetz q'inte kye kyuj qe tx'otx' ex kyuj qe nasyon jatum o che b'aj nsputune, che okel nchmo'ne ex kxel nq'o'ne kytx'otx' juntl maj tu'n kyok te tajwil.

18Che pol meltz'aj juntl maj tuj kytx'otx', ex kxel kykolin tu'n kyk'ulun kywitz qe tilb'ilal, ex mi'n kyb'inchatl tkyaqil aju ik'b'ilxix in b'ant kyu'n nej.

19K'elel wi'ne aju kyanmi kyuwxix ik tza'n ab'j, ex kxel nq'o'ne jun kyanmi ak'aj ex b'a'n niman, ex jun kyximb'etz ak'aj.

20Che anq'il ik tza'nx in kyma'n qe nleye ex che japunel qe nmandamyente kyu'n; che okel te jun tnam etzan wu'ne, atzun weye chin okele te Kydios.

21Atzun qeju in che k'ulun kywitz qe tilb'ilal ex kukx in kyb'incha'n mya b'a'n aju ik'b'ilxix, kb'el kycastiw wu'ne tu'n tlaj kyb'inchb'en mya b'a'n. Aqine Dios in chin q'mante jlu.

El tpa'n tib' tajwalil Qman ti'j tnam Jerusalén

22E jaw lipan qe querubín twitz kya'j, ax ikx qe rwed e jaw junx kyuk'il. Ex tkub'toq tajwalil Kydios aj Israel kyib'aj.

23Jawtzun tajwalil Dios twitz kya'j ex el tpa'n tib' ti'j tnam Jerusalén, ex kub' ten twi witz ttxlaj tnam tuj tjawitz q'ij.

24In jaw q'i'ne tu'n tipumal Qman, ex in aj meltz'aje tu'n tuj Babilonia jatum otoq che pon q'i'n qe aj Israel. A jlu o wile ik tza'n tuj jun witzik', aju tzaj tyek'un T-xew Dios weye. Tb'ajlenxi jlu kub' naj ju witzik',

25ex tkyaqil aju otoq tzaj tyek'un Qman weye xi nchik'b'a'ne kye aj Israel, aqeju otoq che pon q'i'n tuj Babilonia.