Josué 17 - Mam Huehuetenango New Ortography

Aju kytx'otx' qe tiyjil Manasés

1Aju tx'otx' ok te kye tiyjil Manasés aju nej tky'ajal José, ik tza'n swert jaw: Te Maquir xi q'o'n tx'otx' Galaad ex Basán aju ta' tuj tjawitz q'ij te nima Jordán. Ate Maquir nej tky'ajal Manasés ex tman Galaad, ex at tnab'l tuj q'oj.

2Ax ikx jaw swert ti'j tx'otx' aju tu'n tok te kye txqantl tky'ajal Manasés ik tza'nx junjun k'loj kyiyjil, ex atzun qe jlu: Abiezer, Helec, Asriel, Siquem, Hefer ex Semida; tky'ajal Manasés qe ex tal tchman José qe.

3Atzunte Zelofehad aju tky'ajal Hefer, tal tchman Galaad ex ttxk'a tchman Maquir aju tky'ajal Manasés, minti' jun tky'ajal o tzaj, noq o'kx tme'jel e tzaj, ex atzun kyb'i jlu: Maala, Noa, Hogla, Milca ex Tirsa.

4E pontzun qe xu'j lu tuk'il pal Eleazar, tuk'il Josué ex kyuk'il qe nejenel te tnam, ex xi kyma'n kye kyja': O tzaj tma'n Qman te Moisés tu'n ttzaj q'o'n qtx'otx'e ik tza'nx in xi q'o'n kye qe xinaq at kyxilen quk'ile. Xitzun tq'o'n Josué kytx'otx' ik tza'nx otoq txi tq'o'n kye qe terman kyman, ik tza'nx otoq tzaj tma'n Qman.

5Kyja'tzun, aqeju tiyjil Manasés o kyk'am laj piẍ tx'otx', ex part aju tx'otx' Galaad ex Basán, aju tkub'sa'n tuj tjawitz q'ij te nima Jordán,

6ex xi q'o'n kytx'otx' qe xu'j lu, aqeju tiyjil Manasés, ik tza'nx kye xinaq. Aju tx'otx' Galaad xi q'o'n kye juntl k'loj tiyjil Manasés.

7Aju kytx'otx' qe tiyjil Manasés tuj telex q'ij te nima Jordán, xi'ynix tmojonil kytx'otx' aj Aser ex ponin tuj Micmetat, aju tkub'sa'n tumlal twitz Siquem, xi'yintl tuj tnayaj q'ij ex ponin max jatum njatz jlet twi a' te tnam Tapúa.

8Maske aju tx'otx' te tnam Tapúa kyetoq qe tiyjil Manasés, atzunju tnam Tapúa, aju tkub' tuj tmojonil kytx'otx' aj Manasés, kyetoq qe tiyjil Efraín.

9Aju tmojonil tx'otx' in ku'tz tu'n tkub'il kub'ni max tuj tnayaj q'ij ttzi tq'ab' xaq Caná, kyja'tzun at junjun tnam kye tiyjil Efraín ate' kyxol qe tnam kye tiyjil Manasés. Aju tmojonil elnix twi tq'ab' xaq Caná, aju kyetoq tiyjil Manasés, ex in pon b'aj ttzi Nintz mar.

10Aju tx'otx' tuj tnayaj q'ij te tq'ab' xaq, atzun kye tiyjil Efraín, ex aju tx'otx' tuj tb'anq'ab' q'ij te tq'ab' xaq, atzun kye tiyjil Manasés, ex aju tmojonil kytx'otx', atzunju Nintz mar. Aju tmojonil kytx'otx' tiyjil Manasés tuj tb'anq'ab' q'ij, atzun kytx'otx' qe tiyjil Aser, ex atzunju tmojonil kytx'otx' tuj tjawitz q'ij, atzun kytx'otx' qe tiyjil Isacar.

11Ax ikx e ok te kye qe tiyjil Manasés junjun tnam ate' tuj kytx'otx' tiyjil Isacar ex Aser, ex atzun qe tnam lu kyuk'ix qe aldey ate' kyi'jele: Bet-seán, Ibleam, Dor, Endor, Taanac ex Meguido. Aju toxin tnam, atzun, Nafot-dor.

12Ex qe tiyjil Manasés minti' e xkye' tu'n kyex kylajo'n qe xjal najlqe kyuj qe tnam lu, porke o ten kyipun qe aj Canaán kywitz, ex axtzun e kyaj ten kyuj qe tnam.

13Te tib'ajxi, tej tok txqantl kyipun aj Israel, ok kyq'o'n il kyi'j aj Canaán tu'n tchjet chojenj kyu'n, ex minti' e je'x kylajo'n qe.

E tzyet qe chk'ul kyu'n qe tiyjil José

14Atzun qe tiyjil José xi kyma'n te Josué:

—¿Tiqu'n ma tzaj tq'o'na noq jun piẍ tx'otx' qeye ik tza'nx swert ma jaw, ex qeye nim qb'aje ex ma qo kub' ky'iwla'ne tu'n Qman?

15Xitzun ttzaq'we'n Josué:

—Yake nim kyeye kyb'aj ex minti' ma kanun kytx'otx'e tuj tiwitz tx'otx' te Efraín, kyjaxe tjaq' chk'ul ex kytx'emin jawe qe tze' tuj kytx'otx' aj Ferezeo ex tuj kytx'otx' aj Refaita.

16Ex atzun kye o kyma:

—Ax tok, aqeju tiwitz tx'otx' lu minti' in kanun te qeye. Ex qe aj Canaán aqeju najlqe tuj chq'ajlaj, ax ikx aqeju najl tuj tnam Bet-seán ex kyuj qe aldey ate' ti'jele, ex qeju najl tuj chq'ajlaj Jezreel, at kycarwaj in che ajb'en tuj q'oj, puro k'uxb'il qe.

17Xitzun ttzaq'we'n Josué kye tiyjil José, aqeju tiyjil Efraín ex Manasés:

—At nim kyb'aje ex at nim kyipune, kyja'tzun mya noq jun piẍ tx'otx' k'okel te kyeye,

18ax ikx k'okel te kyeye aju chk'ul at tuj tiwitz tx'otx'; kytx'emin jawe qe tze' tuj ex kytzyume tu'n tok te kyeye. Atzun qe aj Canaán, b'a'n tu'n kyex kylajo'ne, maske at nim kyipun ex at kycarwaj puro k'uxb'il.