Mateo 15 - Mam Huehuetenango New Ortography

Aju in tz'ilix xjal tu'n Marcos 7.1-23

1E pontzun junjun xnaq'tzal ti'j ley tuk'il Jesús, kyuk'ix junjun fariseo e tzaj tuj tnam Jerusalén, ex xi kyqanin te:

2—¿Tiqu'n in che ik' t-xnaq'tzb'ena tib'aj ju yol kyaj b'ant ti'j kyu'n kytijil xjal ojtxi? ¿Tiqu'n minti' nne'l kytx'jo'n kyq'ab' ok in che ok ten wa'l? Che chi.

3Xitzun ttzaq'we'n Jesús:

—Ax ikx kyeye, ¿tiqu'n in che ik'e tib'aj tmandamyent Dios noq tu'nju in che ok lpe'ye ti'j ju yol kyaj b'ant ti'j kyu'n kytijil xjal ojtxi?

4Porke kyaj tq'o'n Dios jun mandamyent chi kyja': Kynimanxe kymane ex kytxuye; ax ikx in tma'n: Alkye ma yasun ti'j tman ex qa ti'j ttxu', il ti'j tu'n tkub' b'yet, chi tuj ley.

5Atzun kyeye in kyma'ne: B'a'n qa at jun xjal ma txi tma'n te tman ex qa te ttxu': Mlay b'ant txi nq'o'ne ch'in onb'il teya, ex tkyaqilju at weye jun oyaj te Dios.

6Qa ma txi tma'n xjal ikju, tu'n jlu mya il ti'j tu'n t-xi tq'o'n onb'il te tman ex qa te ttxu', che chiye. Kyja'tzun ma tz'el kyi'ne tipun tmandamyent Dios tu'n tlaj in che ok lpe'ye ti'j ju yol kyaj b'ant ti'j kyu'n kytijil xjal ojtxi.

7Xmletz' qeye. Ax tok tyol Isaías aju t-sanjel Dios kyaj ttz'ib'an kyi'je, chi kyja':

8Qe xjal lu noq tu'n kytzi' in chin nimanjtze kyu'n, atzun ju kyanmi najchaq ta' wi'je.

9Noqx gan in che k'ulun nwitze, porke aju xnaq'tzb'il in kyq'o'n, kye xjal kymandamyent, chi Isaías.

10E tzajtzun ttxko'n Jesús qe xjal ex xi tma'n kye:

—Kyb'intze nyole, ex tz'elx kynik'e ti'j:

11Aju in xi' tu'n xjal, minti' in tz'ilix xjal tu'n, noq o'kx in tz'ilix xjal tu'nju tyol nne'tz tuj ttzi'.

12E pontzun laq'e' t-xnaq'tzb'en Jesús ttxlaj ex xi kyma'n te:

—¿Mape tb'iya, aju tyola ma txi tma'na mya b'a'n ma tz'ela tuj kywi fariseo? Che chi.

13Xi ttzaq'we'n Jesús:

—Tkyaqil awal aju mya tu'n Nmane at tuj kya'j ku'x tawa'n, kjawitz b'aqet.

14E kyten xjal lu; porke moẍ qe, ex ẍaqlul moẍ qe; qa ma tz'ok ten jun moẍ ẍaqlulte juntl moẍ, kykab'il che xel tz'aq tuj jul, chi Jesús.

15Xi ttzaq'we'n Pedro:

—Chik'b'antza ju techal lu qeye.

16Xi tma'n Jesús:

—¿Maj ikx kyeye minti' nne'l kynik'e ti'j?

17¿Maj minti' nne'l kynik'e ti'j jlu? Tkyaqilju in xi' tu'n xjal, in ku'pun tuj tk'u'j ex nne'x tk'u'jin.

18Ex aju tyol xjal nne'tz tuj ttzi', tuj tanmi xjal in jatz; atzunju in tz'ilix xjal tu'n.

19Porke tuj kyanmi xjal in tzaj kyximb'etz mya b'a'n, ex tu'n tkub' jun xjal kyu'n, ex tu'n kyb'inchante aj pajil, ex tu'n kyyaẍin, ex tu'n kyelq'an, ex tu'n kynik'an yol kyi'j kyuk'il, ex tu'n kysi'min yol.

20Tkyaqil jlu in tz'ilix xjal tu'n; ex ok tok jun xjal wa'l ex qa minti' ma tz'el ttx'jo'n tq'ab', mlay tz'ilix xjal tu'n.

Jun xu'j stranjer xjal xi toksla'n tyol Jesús Marcos 7.24-30

21Tejtzun tetz Jesús tuj lugar lu, xi' tuj tx'otx' jatum ta' tnam Tiro tuk'ix tnam Sidón.

22At jun xu'j aj Canaán ax najl tuj lugar lu, ul tuk'il Jesús in sch'in ex in tma'n:

—Tat, aya Tk'wa'l David, q'aq'antz tk'u'ja wi'je. Aju wale txin nimxix in yajlanjtz tu'n ju'ẍ, chi xu'j.

23Atzunte Jesús minti' xi ttzaq'we'n. E pontzun laq'e' qe t-xnaq'tzb'en ttxlaj e kub'san twitz ex kyma':

—Q'manxa te xu'j tu'n taj, porke lepchix qi'j in sch'in, che chi.

24Xi ttzaq'we'n Jesús:

—Minti' ma chin tzaj sama'ne tu'n Dios kyuk'il txqantl xjal, noq o'kx kyuk'il aj Israel, aqeju ik kyten ik tza'n ẍne'l tzpetni qe, chi Jesús.

25Ultzun te xu'j, kub' ẍmeje' twitz Jesús ex tma:

—Tat, chin tonintza, chi xu'j.

26Xi ttzaq'we'n Jesús:

—Mya b'a'n tu'n tel q'it kywa k'wa'l ex tu'n t-xi q'ot kye tal tx'yan, chi Jesús.

27Xitzun tma'n xu'j:

—Ax tok, Tat; pero qe tal tx'yan in xi kywa'n tb'uchil wab'j nne'l tz'aq ttxa'n kymes kyajaw.

28Xitzun ttzaq'we'n Jesús:

—Aya xu'j, nimxix tokslab'la at. Kb'inchetel teya aju tajb'ila, chi Jesús.

Ax or lu b'i'x b'anix ju tal.

Nim yab' e b'anix tu'n Jesús

29Ik'tzun Jesús tuj lugar lu, pon ttzi laguna te Galilea; jax twi witz ex axtzun kub' qe'.

30E pontzun nim xjal tuk'il, q'i'n qe kox kyu'n, qe moẍ, qe men, qe xjal tzkaj kyten, kyuk'ix nimku yab'; ex e kub' kyq'o'n t-xe tqan Jesús, ex e b'anix tu'n.

31Tu'ntzun jlu nim e lab'in xjal tej kylonte b'ant kyyolin qe men, ex qe xjal tzkaj kyten e b'ant, ex qe kox b'ant kyb'et, ex qe moẍ b'ant kyke'yin. Ex xi kyq'o'n xjal chjonte te Dios, aju Kydios aj Israel.

Xi tq'o'n Jesús kywa kyaje mil xinaq Marcos 8.1-10

32E tzajtzun ttxko'n Jesús qe t-xnaq'tzb'en ex xi tma'n kye:

—In tz'e'y nk'u'je kyi'j xjal, porke ma b'ant ox q'ij ate' wuk'ile ex minti' ch'in kywa. Mi'n waje tu'n t-xi nma'ne kye tu'n kyaj ex na'nxtoq t-xi' ch'in kywa, mya yajku che kub' numj tuj b'e, chi Jesús kye.

33Xitzun kyma'n qe t-xnaq'tzb'en:

—¿Jatum b'an ttzaj nim wab'j qu'ne tu'n kynoj kykyaqil xjal lu, porke ato' tuj jun lugar minti' kynajb'il xjal tuj? Che chi.

34Xi tqanin Jesús kye:

—¿Jte' wab'j at kyuk'ile?

—At wuq wab'j, tuk'ix junjun tal kyiẍ, che chi.

35Xi tma'n Jesús kye xjal tu'n kykub' qe' twitz tx'otx'.

36Tzajtzun ttzyu'n Jesús aju wuq wab'j kyuk'ix qe kyiẍ, xi tq'o'n chjonte te Dios, kub'tzun tpiẍk'u'n ex xi tq'o'n kye t-xnaq'tzb'en, atzun kye t-xnaq'tzb'en xi kysipan kye xjal.

37Ex e b'aj wa'n kykyaqil ex e noj. Ex jaw kychmo'n wuq chi'l ttx'aqan wab'j aju kyaj ten.

38Aju kyajlal xjal e wa'n, kyaje mil xinaq, ex part qe xu'j ex qe k'wa'l.

39Xitzun tma'n Jesús kye xjal tu'n kyaj, atzunte Jesús jax tuj barc, pon tuj tx'otx' Magdala.