2 Reyes 19 - Mam Huehuetenango New Ortography

E klet aj Judá tuj tq'ab' Senaquerib 2 Crónicas 32.20-23; Isaías 37.1-38

1Tejtzun tb'inte rey Ezequías jlu, el t-sb'it'un t-xb'alun ti'j te jun techal ti'j tb'is, ok tq'o'n t-xb'alun ch'i'x twitz ex xi' tuj tja Dios.

2Xi t-sama'n Ezequías Eliacim, aju mayordom tuj tja, tuk'ix Sebna aju aj tz'ib'al, ex kyuk'ix qe pal mas tij xjal qe; kykyaqil qe jlu tok kyxb'alun ch'i'x twitz te jun techal ti'j kyb'is, e je'x sama'n tuk'il Isaías aju t-sanjel Dios, aju tky'ajal Amoz,

3tu'ntzun t-xi kyma'n te aju yol otoq txi tma'n Ezequías kye, ex kyma: Ato' tuj jun tq'ijlalil xob'ajil, te castiw, ex ma kub' qch'ixwi; ik qten ik tza'n jun xu'j minti' tipun tu'n tul itz'j tal.

4Kuchiwt ma tb'i Qman Dios tyol ju xjal ma' toklen saj sama'n tu'n tpatrón aju rey te Asiria, tu'n tyolin mya b'a'n ti'j ju Dios itz', ex kuchiwt kub' q'o'n tcastiw tu'n tlaj tkyaqil yol mya b'a'n ma tma, aju ax Qman Dios ma b'inte te. Chux na'na Dios kyi'j qeju ate'x tuj Jerusalén, chi rey Ezequías, che chikuye te Isaías.

5Qe xjal ma' kyoklen ate' ttxlaj rey Ezequías e je'xtzun tuk'il Isaías;

6atzunte Isaías tzaj tma'n kye tu'n t-xi kyma'n te kypatrón kyja': Chitzun Qman in tma'n: Mi'n xob'a kyu'n qe yol mya b'a'n ma q'manjtz wi'je kyu'n qe tmajen rey te Asiria.

7B'intza, ok nb'incha'ye tu'n tb'inte jun tqanil mya b'a'n ex tu'n jlu ktzajel t-xob'il ex k'ajel meltz'aj tuj ttanmi, ex ok nb'incha'ye tu'n tkub' b'yo'n tu'n spad ma chixin, chi Qman, chi Isaías.

8O tb'i ju xjal ma' toklen ttxlaj rey te Asiria, qa otoq tzik' rey te Asiria tuj tnam Laquis, ajtzun meltz'aj tu'n tpon tuk'il rey, ex o knet rey tu'n in q'ojintoq ti'j tnam Libna.

9Atzun o tb'i rey te Asiria qa otoq tz'etz rey Tirhaca, aju rey te Etiopía, kyuk'il txqan soldad nim kyb'et tu'n tq'ojin ti'j. Xitzun t-sama'n juntl maj rey te Asiria qe t-sanjel tu'n kyxi' max tuk'il rey Ezequías tuj Judá,

10tu'n t-xi kyma'n te kyja': Mi'n tz'ok qe' tk'u'ja ti'j Tdiosa, aju in tkyuwsa'n teya qa mlay kub' ti'j Jerusalén wu'ne; ex mi'n txi tq'on tib'a tu'n t-sb'unjtza tu'n.

11O tb'iya aju kyb'incha qe rey te Asiria kyi'j kykyaqil tnam o che b'aj naj kyu'n. ¿Yajtzun teya, maj oktzun kletela?

12¿Opetzun che klet txqantl tnam kyu'n qe kydios, aqeju tnam e b'aj naj kyu'n qe nxe'chele, ik tza'n qeju tnam Gozán, Harán, Resef, ex qe xjal aj Bet-edén aqeju najl tuj lugar Telasar?

13¿Jatum ate' qe rey te tnam Hamat, Arfad, Sefarvaim, Hena ex Iva? Chi rey te Asiria.

14Xitzun tk'mo'n Ezequías aju u'j xi q'o'n te kyu'n qe sanjel ex jaw t-sch'i'n. Tb'ajlenxi t-sch'i'n, xi' tuj tja Dios, kub' tlik'b'a'n ju u'j twitz Qman,

15ex ok ten na'l Dios kyja': Aya Qman aju Kydios aj Israel tkub'sa'n tq'uqb'ila kyib'aj qe querubín; o'kx aya Dios in kawina kyib'aj kykyaqil kawb'il at twitz tx'otx'; aya o b'inchante kya'j ex tx'otx'.

16Aya Qman, q'onka kwent ti'j ex b'intza; ke'yintza ex b'intza tkyaqil tyol Senaquerib ma tzul t-sama'n wuk'ile in yolin mya b'a'n ti'ja, aya Dios itz'.

17Ax tok Qman, e b'aj naj qe nasyon tuk'ix kytx'otx' kyu'n qe rey te Asiria,

18ex okx kypatun qe kydios xjal tuj q'aq', ex axix tok mya dios qe jlu, tze' qe, ex ab'j qe, b'inchamaj kyu'n xjal. Kyja'tzun e b'aj naj kyu'n.

19Ja'lotzun Qman, aya Qdiose, qo tkloma tuj tq'ab', tu'ntzun tel kynik' kykyaqil qe nasyon twitz tx'otx' ti'ja, qa aya Qmane, ex o'kxku aya jun Dios, chi Ezequías tma tuj tna'j Dios.

20Xitzun t-sama'n Isaías tqanil te Ezequías kyja': Atzun yol jlu ma tma Qman aju Kydios aj Israel: Ma nb'iye aju tna'j Diosa ti'j Senaquerib aju rey te Asiria.

21Atzun yol jlu ma tma Qman ti'j rey te Asiria:

Aju tnam Sión ik tten ik tza'n jun tal q'apoj in tze'n ti'ja, aya Senaquerib. Qe aj Jerusalén kxel kyyukun kywi' te xmayb'il ok tel oqa.

22¿Alkye ma tz'ok tik'le'na ex ma yolina mya b'a'n ti'j? ¿Al i'j xjaw tq'ajq'ajel twi'ya kyuw? ex ¿al i'j ma jaw tke'yin twitza te nimb'il tib'a? Ti'j Dios xjan kye aj Israel ma tb'inchaya jlu.

23Tzaj t-sama'na qe t-sanjela tu'n kyyolin mya b'a'n ti'j Dios. Chiya ma tmaya: Kyuk'il nim kyajlal ncarwaje in che ajb'en tuj q'oj in jaxe tuj tiwitz tx'otx' kywi' qe witz, ex in exe kyjaq' qe tze' kyuw tu'n qex kyxol twi witz Líbano. E jaw ntx'emine qe tze' wi'ten mas matij kywa'l, kyuk'ix qe tzaj tb'anilxix. In japune max kywi' qe nmaq witz tuj tiwitz tx'otx', ex in pone tjaq' txqan tze' pin t-xaq.

24Kyuj qe tx'otx' mi'n ojtzqi'n wu'ne ku'x nlaku'ne jul tu'n tknet a' ex in k'ane kyi'j qe a' lu. Kykyaqil qe nima tuj Egipto e b'aj tzqij tjaq' nqane, chitzuna.

25¿Na'nxpetzun tel tnik'a ti'j qa aqine Dios, ex aqine in b'inchante tkyaqil jlu? Atxix tuj tq'ijlalil ojtxi o b'aj nnak'u'ne ti'j, ex matzun in b'inchet wu'ne ja'lo; kyja'tzun in che kub' t-xituna qe tnam tok muro kyi'j ex noq ttx'aqan in che kyaj ten tuj b'yujin tu'na.

26Qe xjal najlqe kyuj minti' kyipun, tzaj nim kyxob'il ex kych'ixwi, ik e ok ik tza'n k'ul tuj kojb'il, ex ik tza'n cha'x k'ul, ex e ok ik tza'n k'ul in tzaj ch'iy tib'aj xk'o'n twi ja, in naj tu'n ta'w kyaq na'nxtoq tch'iy.

27B'a'n wu'ne tkyaqilju in b'ant tu'na ex tkyaqilju taja tu'n tb'ant, ex b'a'ntl wu'ne ma tzaj tq'oja wi'je.

28Tu'nju ma wile aju tq'oja ma tzaj ex ju tnimb'il tib'a, ja'lo k'okel nq'o'ne jun argoy twi ttxa'na, tuk'ix jun pren k'okex nq'o'ne tuj ttzi'ya, ex tu'ntzun jlu k'ajel meltz'aja wu'ne tuj tb'eya jatum otoq tzaja, chi Dios.

29Ax ikx xi tma'n Isaías te Ezequías:

Atzun jun techal jlu ti'j ju kb'ajel: Tuj ab'q'i lu ex tuj juntl, che wa'le ti'j triw aju tu'nx kjawil poq'l, tujtzun toxin ab'q'i che awale ex kjawil kychmo'ne twitz, che awale uva ex che lo'le ti'j twitz.

30Qe xjal aj Judá, aqeju che kyjel anq'in, ik che okel ik tza'n awal: kxe'l kylok' ex k'okel kywitz.

31Ex il ti'j che kyjel ten junjun xjal tuj Jerusalén; ax ikx twi witz Sión che kyjel anq'in junjuntl. A jlu ok tb'incha' Qman aju Tajaw Tkyaqil tu'nju at nimxix tk'ujlalil kyi'j.

32Atzun ti'j rey te Asiria ma tma Qman kyja':

Mlay tz'okx tuj Jerusalén, mlay txi t-xo'n jun plech tu'n xob'l, mlay tz'ok tzoqpaj tu'n tq'ojin tuk'il maqb'il in ajb'en tu'n tuj q'oj, ex mlay jaw tch'uqin tx'otx' ti'jele muro tu'n tokx tuj tnam.

33Tujx b'e jatum otoq tzaj, ax k'ajel meltz'aj juntl maj; mlay tz'oktz tuj tnam lu. Aqine Dios in chin q'mante jlu.

34Aqine chin kolol ti'j tnam lu ex kkletel wu'ne noq tu'n tlaj ju yol xi ntziyane te nmajene David, ex tu'n tjaw nimsa'n nb'iye, chi Dios.

35Tujx qonik'an lu, pon jun t-anjel Qman tuj kycampament qe t-soldad rey te Asiria, ex e kub' tb'yo'n jun syent tuk'il 85 mil xjal, ex kykyaqil qe jlu kyimniqe tej tjawil q'ij.

36Atzunte Senaquerib aju rey te Asiria kub' b'e tu'n, ex aj meltz'aj tu'n tpon tuj tnam Nínive.

37At jun q'ij tej matoq in k'ulun Senaquerib tuj tja tdios Nisroc tb'i, pon Adramelec tuk'ix Sarezer aqeju tky'ajal, ex kub' kyb'yo'n tu'n spad, ex atzun e pon oq t-xe witz Ararat. Te tib'ajxi jlu aju kyaj ten te rey te t-xel Senaquerib, atzun Esarhadón aju tky'ajalx.