1Ok qe' nk'u'je ti'j Qman, atzun te kub' ten b'ilte nyole tej nkub'sane te.
2In jatz q'i'ne tu'n tuj jun jul xob'ajilxix ex in klete tu'n, in kolpete tu'n tu'n mi'n nxi'ye tuj sob'an. Kub' tq'o'n nqane twi pik ex e tkyuwsa tu'n nb'ete.
3Tzaj t-xnaq'tza'n jun ak'aj b'itz weye, jun b'itz te aq'b'il chjonte te Qman Dios. Tej kyke'yinte nimku xjal, tzaj tchi kyi'j ex ok qe' kyk'u'j ti'j Qman.
4At nim tzalajb'il teju xjal in qe' tk'u'j ti'j Qman ex minti' in jaw tuk'in tib' kyuk'il qeju jawni kywitz, ex mi kyuk'il qeju in che k'ulun te jun dios mya ax tok.
5Nman Dios, nimku tb'inchb'ena tb'anilxix ma b'ant, aju t-ximb'etza qi'je puro b'a'n, mi a'l juntl jaku pon ik tza'n teya. Jaku wajb'eye tu'n t-xi nchik'b'a'ne tkyaqil jlu ex tu'n nyoline kyi'j, pero noq ch'in jaku chik'b'et wu'ne, porke nim jlu.
6Minti' in tzalaja kyi'j qe alumaj in che'x q'o'n te chojb'il, ex mi kyi'j qe oyaj ti'j twitz awal; minti' ma tqaniya tu'n kykub' patit qe alumaj tib'aj altar ex mi jun oyaj tu'n tchjet il. Atzun weye ma jaqet nẍkyine tu'na tu'n nb'inteye tyola.
7Kyja'tzun ma txi nma'ne teya: Lu qine lu ik tza'n in tma'n wi'je tuj tu'jil.
8Nman Dios, in chin tzalaje tu'n tb'ant tajb'ila; aju t-xnaq'tzb'ila k'u'n wu'ne tuj wanmiye.
9Ma txi nchik'b'a'ne kye xjal kyb'uyin kyib' nim kyajlal qa aya tz'aqlxix. Tzqi'n tu'na Nman, minti' ma chin q'ajene tu'n nyoline.
10Minti' ma chin q'ajene tu'n t-xi nma'ne qa aya tz'aqlxix, kukx in chin yoline ti'j qa in japun tyola tu'na ex ti'j ju kolb'il tu'na; minti' ma kub' wewane tk'ujlalila ex ju tyola axix tok kywitz nimku xjal etzan tu'na.
11Atzun teya Nman, mi'n kub' t-xk'ayina tq'aq'b'il tk'u'ja. Kukxwit chin klete tu'na tu'nju tk'ujlalila ex tu'nju tyola axix tok.
12Nim ma tzik'x wu'ne ex mlayx kanun tu'n tb'aj nma'ne tkyaqil. Axju nb'inchb'ene mya b'a'n ma kub' tz'aq wib'aje; ex b'i'x ma che naj tb'aq' nwitze. Mas nim tajlal nb'inchb'ene mya b'a'n ik tza'n ttzmal nwi'ye, ex b'i'x ma tzaj b'aj nk'u'je.
13Nman, b'inchama xtalb'il, chin tkloma. Nman, tzaj naja onil weye.
14B'i'xwit naj kynab'l tu'n tel kych'ixwi qeju in che ximan ti'j tu'n nnaje kyu'n. B'i'xwit che el oq, tu'n tel kych'ixwi qeju kyaj tu'n ttzaj mya b'a'n wi'je.
15B'i'xwit che el oq tu'n tel kych'ixwi qeju in che xmayin wi'je.
16Atzun qeju in che jyon ti'ja che tzalajxwit nim wen; qeju in che tzalaj ti'j kolb'il tu'na kukxwit txi kyma'n: Nimanxwit tb'i Qman.
17Ik tza'n weye puro meb'a qine ex in chin b'isune, mi'n tzik' nna'le tu'na Nman. Aya onil weye ex klol weye, mi'n kub' tyo'na nim, Nman Dios.
Who We AreWhat We EelieveWhat We Do
2025 by iamachristian.org,Inc All rights reserved.
