Apocalipsis 1 - Mam Huehuetenango New Ortography

Aju in tzaj tyek'un Jesucrist

1Aju tz'ib'an tuj u'j lu, atzunju tzaj tchik'b'a'n Jesucrist. Tkyaqil jlu tzaj tma'n Dios te tu'n t-xi tchik'b'a'n kye tmajen tkyaqilju at tu'n tul naj. Ex tzaj t-sama'n Jesucrist t-anjel, ex tu'nju anjel tzaj tchik'b'a'n weye, aqine Juan, tmajen Dios qine.

2Ma txi nchik'b'a'ne tkyaqilju ma wile, ex ma chin oke testiw ti'j tyol Dios ex ti'j ju yol axix tok tzaj tchik'b'a'n Jesucrist.

3At tzalajb'il kye xjal in che sch'in kyi'j qe yol tuj tu'jil lu, ex at tzalajb'il kye qeju in che b'in ti'j tyol Dios ex in japun kyu'n aju tz'ib'an tuj; porke aju tq'ijlalil in laqe'x ttzaj.

Xi ttz'ib'an Juan u'j lu kye okslal ate' kyuj wuq tnam

4Aqine Juan in xi ntz'ib'ane kyeye, okslal qeye ate'ye kyuj wuq tnam tuj tx'otx' Asia: Tzajwit q'o'n xtalb'il kyeye ex tu'n tqe'xix kyk'u'je tu'n Dios aju at ja'lo ex at ojtxi ex tzul, ex kyu'n qe wuq Xewb'aj ate' twitz tq'uqb'il jatum in kawin,

5ex tu'n Jesucrist aju testiw axix tok tyol, ex aju tnejel jatz anq'in kyxol kyimni, ex ate kawil kyib'aj rey ate' twitz tx'otx'. Ate Crist k'ujlal qe, ex ma qo tzoqpet tu'n tuj qil tu'nju tchk'el,

6ex ma qo ok tq'o'n te rey ex ma qo ok te pal tu'n qajb'en te Dios aju Tman. O'kxwit te tu'n tnimanjtz ex tu'n tkawin tuj tkyaqil tab'q'iyil te jumajx. Ikxwitju.

7Lu tzul Crist tuj muj. Kykyaqil xjal ok kyila', ax ikx qeju e ok xayunte te ok kyila'; ex kykyaqil tnam twitz tx'otx' che oq'el tu'n kyxob'il tu'n tlaj. Kb'antel ikju. Ikxwitju.

8Aqine atine t-xe tnejel ex kukx chin tele ok tjapun b'aj mankb'il tq'ijlalil, ik tza'n ju letr A ex Z, chi Qman Dios aju at ja'lo, ex at ojtxi, ex tzul, ex at tipumal tu'n tb'ant tkyaqil tu'n.

O ilwaj Jesucrist tu'n Juan ik tza'n tuj witzik'

9Aqine Juan kyermaniye, ex ax yajb'il nnik'x wu'ne ik tza'n kyeye nnik'x kyu'ne, ex junx qoklen kyuk'ile tuj tkawb'il Dios, ex at qpasens tu'n tik'x qu'n tu'n tipumal Jesucrist. Presintoq qine tuj ju tal tx'otx' tmijil mar Patmos tb'i. Presintoq qine tu'n tlaj in xi npakb'a'ne tyol Dios ex tu'n tlaj in xi nchik'b'a'ne aju yol ti'j Jesucrist.

10Tuj tq'ij Qajaw kub' ten tipumal Xewb'aj Xjan wib'aje, ex o nb'iye jun tq'ajq'ajel ma'xix wi'jxiye, ik tza'n tq'ajq'ajel chun,

11in tma'n:

[—Aqine atine t-xe tnejel ex kukx chin tele ok tjapun b'aj mankb'il tq'ijlalil, ik tza'n ju letr A ex Z.] Aju k'okel tke'yina, tz'ib'an ku'xa tuj jun libro, ex samanxa kye okslal ate' tuj wuq tnam tuj tx'otx' Asia: Tuj Efeso, tuj Esmirna, tuj Pérgamo, tuj Tiatira, tuj Sardis, tuj Filadelfia, ex tuj Laodicea, chi weye.

12Ajtzun nke'yine tu'n nlonteye alkyeju in yolintoq wuk'ile; ex tej taj nke'yine, o wile wuq kandil q'an pwaq kytx'otx'il,

13ex kyxol qe wuq kandil, o wile jun ik ke'yin ik tza'n jun xinaq tok t-xb'alun ẍjo'w, ex tok jun k'alb'il ttzi t-xu'k, q'an pwaq ttx'otx'il.

14Aju twi' ex ju ttzmal twi' saq ke'yin ik tza'n saq lan, puro saq ik tza'n ttxa che'w; qe tb'aq' twitz in che qoptz'aj ik tza'n tqan q'aq'.

15Ex qe tqan in che qoptz'aj ik tza'n q'an k'uxb'il in qoptz'aj tokx tuj q'aq'; ex ju tq'ajq'ajel twi' ik tza'n tq'ajq'ajel nimku a' in jululun.

16Ex tkub' wuq che'w tuj tb'anq'ab', ex nne'tz jun spad tuj ttzi', b'anin ttzi' wen te kykab'il pak'; ex ik ke'yin twitz ik tza'n t-spik'umal q'ij in qoptz'ajxix wen.

17Tej nlonteye, in kub' tz'aqe t-xe tqan, ik tza'n kyimni in oke. Atzun te kub' tq'o'n tb'anq'ab' wib'aje, ex tma weye:

—Mi'n xob'a; aqine tnejel ex mankb'il,

18ex itz' qine; in kyime, pero ja'lo itz' qine te jumajx; ex tuj nq'ab'e ate' qe tal ja te kamik ex te kynajb'il kyimni.

19Tz'ib'an ku'xtzuna tkyaqilju ma tila, kyuk'ix qeju ate' ja'lo ex qeju ok tila'ya yajxi.

20Aqeju wuq che'w ma tila tuj nb'anq'ab'e ex qeju wuq kandil q'an pwaq kytx'otx'il, atzun kyxilen jlu: Qeju wuq che'w, atzun qe anjel ate' kyxol okslal kyuj wuq tnam, ex qeju wuq kandil, atzun qe okslal ate' kyuj wuq tnam.