1Ti'j kya'j in tyek'un tib' tajwalil Dios, ex ti'j twitz kya'j in yek'unjtz taq'unb'en tq'ab'.
2Aju yol in tma'n jun q'ij, ax in yolin juntl q'ij ti'j; ex aju yol in tma'n jun qonik'an, ax in yolin juntl qonik'an ti'j, in che yolin ti'j tnab'l Dios.
3Maske minti' q'ajq'aj qe yol ex minti' in b'injtz jun tq'ajq'ajel wib'aj,
4pero aju tqanil in xi' tuj tkyaqil twitz tx'otx' ex max in pon b'aj kyyol ttxa'npun tx'otx', max jatum ta' tnajb'il q'ij.
5Ik tten q'ij ik tza'n jun ku'xun at tipun tu'n tqelan, ex ik tza'n jun chmilb'aj nne'tz tuj tja k'itzqe toklen moje'.
6Nne'tz q'ij tuj jun pak' t-xe kya'j ex in pon b'aj tuj juntl pak', mi a'l jun jaku tz'el oq twitz tkyaqal.
7Aju tley Qman Dios tz'aqlxixte porke in tq'o'n ak'aj qipumal; qe tmandamyent axix tok qe ex aju xjal minti' ch'in b'a'n tu'n nno'k tnab'l kyu'n.
8Qe t-xnaq'tzb'il Qman Dios tz'aqlxix qe ex in kytzalajsa'n qanmi. Qe tmandamyent mya smo'n kyten ex in kyspik'b'a'n tuj qwitz.
9Aju tu'n qxob' twitz Qman Dios ex tu'n qniman te, minti' tpaltil ex kukx ktel te jumajx. Qe tmandamyent axix tok qe, ex kykyaqil tz'aqlxix.
10Mas tb'anilxix qe twitz q'an pwaq ex mas chi' qe twitz ta'l kab'.
11In kyq'o'n nnab'le, aqine tmajena; qa ma che japun wu'ne, nim b'a'n in kyb'incha'n weye.
12¿Alkye jun jaku tz'el tnik' ti'j tpaltil? Nman, najsama aju npaltile minti' nne'l nnik'e ti'j.
13Chin tkwentin oka tu'n mi tjaw nniman wib'e, mi'n taq'a amb'il tu'n tkub' wi'je tu'n nnimb'il wib'e. Kyja'tzun chin okele te tz'aqlxix ex mlay chin ik'e tib'aj tleya.
14B'a'nwt tz'ela nyole ex nximb'etze tuj twitza, aya Nman klol weye ex tzoqpil weye.
Who We AreWhat We EelieveWhat We Do
2025 by iamachristian.org,Inc All rights reserved.
