Génesis 49 - Mam Huehuetenango New Ortography

Qe mankb'il tyol Jacob

1E tzajtzun ttxko'n Jacob qe tky'ajal ex xi tma'n kye kyja': Che laq'etze ex kxel nma'ne kyeye aju kb'ajel kyi'je tuj tq'ijlalil tzul.

2Aqeye nky'ajal, che laq'etze tu'n kyb'inteye, aqine Jacob. Kyb'intze nyole, aqine Israel aju kymane.

3Rubén, aya nej nk'wa'le; aya wipumale ex tnejel nk'wa'le tej q'i'ntoq wipune. Mas nimb'il teya ex mas tipumala.

4Ik ttena ik tza'n a' in xpulq'in wen; mya aya ktel nim toklen tu'nju tb'inchaya mya b'a'n twi nwatb'ile, aqine tmana. Kub' tana tuk'il nxu'jile.

5Simeón ex Leví kyerman kyib', jatz kyi'n naj kyspad tu'n kyq'ojin tu'n ttx'u'jil kywi'.

6Mlayx chin tene kyuk'il ok tok kychmon kyib' tu'n tb'ant ti'j jun kyyol, tu'nju e kub' kyb'yo'n xjal tu'n kytx'u'jil ex noq tu'n kychkinib'il b'i'x e kyaj koxe' tor kyu'n.

7Tzajwit mya b'a'n kyib'aj tu'n tlaj kytx'u'jil kyuwxix wen ex tlo'ch kyk'u'j nimxix wen. Che elel sputj wu'ne kyxol aj Israel.

8Judá kjawil nimsa'na kyu'n qe termaniya. Ktzyetel ti'j kyqul aj q'oj ti'ja tu'na, ex che nimal qe termaniya twitza.

9Judá, aya mer ik tza'n tal b'alun. Nky'ajal, ma tz'oka ik tza'n jun b'alun tb'ajlenxi chyo'n ti'j tkanb'. Ma kub' wut'e' ex ma kub' b'une' twitz tx'otx' ik tza'n jun b'alun matij. ¿Alkye k'okex yonte te?

10Mi jun k'elel q'inte oklenb'aj te Judá, mi aju tvar rey tuj tq'ab' max ok tul Siloh, twitztzun che nimal qe nasyon.

11K'okel tk'alo'n tbur ti'j tqan uva, atzun tal bur k'okel tk'alo'n ti'j tqan uva tb'anilxix. K'elel ttx'jo'n t-xb'alun tuj ta'l twitz uva.

12Qe tb'aq' twitz mas q'eq che ke'yin twitz ta'l twitz uva; ex qe twitz te' mas saq che ke'yin twitz lech.

13Knajal Zabulón ttzi mar jatum in che pon barc, ex kpol tmojonil ttx'otx' max tuj Sidón.

14Ik tten Isacar ik tza'n jun bur iqal iqtz in ojlan tuj tja.

15Tej tlonte tx'otx' b'a'nxix ex txub'txaj tu'n tojlan, b'ant tten ttzal ti'j tu'n t-xi ti'n iqtz ex minti' kub' t-xk'ayin tib' tu'n tok te majen.

16Kkawil Dan kyib'aj qe t-xjalil, ik tza'n juntl k'loj tiyjil Israel.

17K'okel Dan ik tza'n jun lob'aj in kub' ten ttxlaj b'e, nne'l ttzak'pu'n t-xe tqan chej ex in tzaj tz'aq aju xjal tjax tib'aj tu'n.

18Ay Nman, in chin ayone tu'n nklete tu'na.

19Che okel ten soldad q'ojlel ti'j Gad; ex te tib'ajxi che lajetel tu'n.

20Tb'anilxix twa Aser ktel, ik tza'n kywa rey.

21K'okel Neftalí ik tza'n jun ttxu masat in b'et tzoqpi'n, ex k-yolil ti'j yol tb'anilxix.

22K'okel José ik tza'n jun awal tkub' ttzi a' in tq'o'n nimxix twitz, ex che japunel qe tq'ab' tib'aj tapya.

23Tzaj tlo'ch kyk'u'j qe xol plech ti'j, xi kyxo'n plech ti'j ex e ok tzoqpaj ti'j;

24atzunte José, kyuw e ten qe tq'ab', ex kyuw tzyet xob'l tplech tu'nte Tdios Jacob aju at tipumal, tu'nte Kypastor qe aj Israel ex Kolol kyi'j,

25tu'nte Tdios tmana aju k'onil teya, ex tu'nte Dios aju kky'iwlalte teya ex at tipumal tu'n tb'ant tkyaqil tu'n. Ok tk'ma'ya ky'iwb'il tzajni twitz kya'j, ok tk'ma'ya ky'iwb'il tu'n a' in jatz jlet max t-xe'pun tx'otx', ex ok tk'ma'ya ky'iwb'il tu'n kypoq'l xjal ex alumaj, ex tu'n kych'iy.

26Mas ma' qe ky'iwb'il o nk'ame kywitz qe ky'iwb'il o kyk'am qe nmane ex qe nchmane. Ma'xix ky'iwb'il che b'el ten tib'aj José, ex che pol b'aj max kywi witz minti' b'ajsb'il kye. Qe ky'iwb'il lu che b'el ten tib'aj José aju el pa'n kyxol qe txqantl terman.

27K'okel Benjamín ik tza'n jun xo'j in tzyun tkanb'; te prim kxel tchyo'n ex te qale kxel t-sipan aju otoq tz'el ti'n tuj q'oj, chi Jacob.

28Atzun qe kab'laj k'loj tiyjil Israel jlu, ex atzun yol lu xi tma'n kyman kye tej t-xi tq'o'n ky'iwb'il te teyle te junjun.

Kyim Jacob

29Ax ikx xi tma'n kye tky'ajal kyja': Ch'ix tpon or tu'n nkyime. Chin kymaqun okxe junx kyuk'il qe nxe'chele tuj toy' pik aju at tuj ttx'otx' Efrón aju aj Heteo.

30Aju toy' pik lu, atzun ta' tuj kojb'il Macpela tb'i, twitz Mamre, max tuj tx'otx' Canaán. O tz'el tlaq'o'n Abraham te Efrón junx tuk'il tx'otx', tu'n tajb'en te muqb'il.

31Atzun okx maqu'n Abraham tuk'ix Sara aju t-xu'jil; ax ikx okx maqu'n Isaac tuk'ix Rebeca aju t-xu'jil; ax ikx atzun okx nmaqu'ne Lea.

32El laq'o'n aju tx'otx' tuk'ix toy' pik, kyuk'il qe aj Heteo, chi Jacob.

33Tej tb'aj tma'n Jacob qe yol lu kye tky'ajal, xi tb'incha'n tten twi twatb'il, jaw b'aj t-xew ex kyim.

Kyja'tzun tten pon kyxol qe t-xe'chel.