Éxodo 18 - Mam Huehuetenango New Ortography

Ul Jetro visistaril te Moisés

1Ate Jetro aju pal kye aj Madián ex tji' Moisés, o tb'i tkyaqilju b'a'n otoq tb'incha Dios ti'j Moisés ex kyi'j aj Israel, ex tza'n tten otoq che etz ti'n Qman tuj Egipto.

2Otoq tz'aj sama'n Séfora tu'n Moisés aju tchmil, ex otoq k'monjtz tu'n Jetro aju tman,

3kyuk'ix qe kab'e tal. Gersón tb'i jun, tu'nju otoq tma Moisés: Stranjer xjal qine tuj tx'otx' lu.

4Eliezer tb'i juntl, tu'nju otoq tma Moisés: Ul Tdios Nmane onil weye, ex o chin klete tu'n twitz t-spad Faraón.

5Ate Jetro aju tji' Moisés, kyuk'ix qe kab'e tky'ajal Moisés ex t-xu'jil, e ul tuk'il Moisés jatum otoq kub' ten tuj tzqij tx'otx', ttxlaj witz te Dios.

6Xi t-sama'n tqanil te Moisés kyja': Aqine Jetro aju tji'ya ma chin ule ke'yilte teya, junx tuk'il t-xu'jila ex kyuk'ix qe kab'e tky'ajala.

7Etztzun Moisés k'molte tji', kub' mok'e' twitz ex el ttz'ub'an twitz. B'aj kyqanin kyxolx tza'n ate'toq ex e okx tuj ja xb'alun te Moisés.

8Xitzun ttx'olb'a'n Moisés te tji' tkyaqilju otoq tb'incha Qman ti'j Faraón ex kyi'j aj Egipto, noq tu'n tk'u'jlalil kyi'j aj Israel; ax ikx xi ttx'olb'a'n ti'j tkyaqil mya b'a'n otoq tzaj kyi'j tuj b'e, ex tza'n tten otoq che klet tu'n Qman.

9Jaw tzalaj Jetro ti'j t-xtalb'il Qman otoq tb'incha kye aj Israel tej kyklet tu'n tuj kyq'ab' aj Egipto,

10ex tma:

—Nimanxwit tb'i Qman aju o che klete tu'n tuj kyq'ab' aj Egipto, tuj tq'ab' Faraón, ex tjaq' k'ixb'isab'l kyu'n aj Egipto.

11Ja'lo ma tz'el nnik'e ti'j, ate Qman mas ma' toklen kywitz kykyaqil qe kydios xjal, tu'nju o kamb'an kyi'j aj Egipto tej kyok jawni kyi'j aj Israel, chi Jetro.

12Tzaj ti'n Jetro jun alumaj tu'n tkub' patit twitz Qman, ax ikx tzaj ti'n txqantl oyaj te Dios. Atzunte Aarón kyuk'ix kykyaqil tij xjal kyxol aj Israel, e ul wa'l tuk'il tji' Moisés twitz Dios.

Tej tok kyoklen txqan xjal te jwes tu'n Moisés Deuteronomio 1.9-18

13Tuj juntl q'ij kub' qe' Moisés tu'n t-xi b'inchet kyi'j xjal. E ultzun xjal twitz b'i'x te prim ex tejxi tok qax.

14Tej tke'yinte tji' aju in tb'incha'ntoq kyi'j xjal, xi tma'n te kyja':

—¿Ti in tb'incha'na kyi'j xjal? ¿Tiqu'n o'kx teya in kub' qe', ex kukx ate' kykyaqil xjal twitza b'i'x te prim ex okxi tok qax? Chi Jetro.

15Xi ttzaq'we'n Moisés te tji':

—Tu'nju in che ul xjal wuk'ile tu'n t-xi kyqanin kyxjel te Dios.

16Qa at jun q'oj kyxol, in che ul wuk'ile, in che ok tuj xjel wu'ne tu'n tel nnik'e ti'j alkye at til, ex in che'x nma'ne qe tley Dios kye ex qe t-xnaq'tzb'il, chi Moisés.

17Xitzun tma'n tji' te kyja':

—Mya b'a'n aju in tb'incha'na.

18Ksiktela ex che siktel qe xjal ate' tuk'ila, tu'nju alxix aq'untl lu te teya. Mlay b'ant jlu tu'na tjunala.

19B'intza. Kxel nq'o'ne jun tconseja ex awt ktel Dios tuk'ila. Toka te yolil kyi'j xjal twitz Dios, ex q'manxa kyxjel xjal te.

20Q'onxa xnaq'tzb'il kye kyi'j qe ley ex qe xnaq'tzb'il, ex q'manxa kye tza'n tten tu'n kyanq'in ex alkye tu'n kyb'inchante.

21Ax ikx sk'o'n jawa kyxol xjal qe xinaq at kynab'l, aqeju in che xob' twitz Dios, axix tok che yolin, ex minti' in che jyon kamb'ab'l mya tuj tumel. Q'onxa jun mil xjal tuj tkwent junjun, jun syent tuj tkwent junjuntl, 50 tuj tkwent junjuntl ex laj tuj tkwent junjuntl.

22Atzun qe jlu che xel b'inchante kyi'j xjal tkyaqil tyemp. Qe yol kyuw tu'n kyb'ant kyi'j che ul kyi'n tuk'ila; atzun qeju mya kyuw tu'n kyb'ant kyi'j, kyu'n che xel b'incha'n kyi'j. Kyja'tzun k'elel iqtz alxix tkub' tib'aja ex che oniltzun teya.

23Qa ma tb'inchaya jlu ex qa ma tma Dios teya tu'n tb'inchanteya ikju, oktzun tipaya ex tuj tzalajb'il che ajel meltz'aj xjal tuj kyja, chi Jetro.

24Xi tniman Moisés tyol tji' ex tb'incha tkyaqilju o tma te.

25E jaw t-sk'o'n xinaq at kynab'l kyxol aj Israel, ex xi tq'o'n jun mil xjal tuj tkwent junjun, jun syent tuj tkwent junjuntl, 50 tuj tkwent junjuntl ex laj tuj tkwent junjuntl.

26Atzun qe e je'x b'inchante kyi'j xjal tkyaqil tyemp. Qe yol kyuw tu'n tb'ant kyi'j xi kyi'n tuk'il Moisés; atzun kykyaqil qe yol mya kyuw tu'n tb'ant kyi'j, kyu'nx xi kyb'incha'n kyi'j.

27Te tib'ajxi, b'aj tq'olb'en tib' Moisés tuk'il tji', ex aj meltz'aj tji' tuj ttx'otx'.