1B'animaj ti'j tu'n tjapun aju orden otoq tz'ex tu'n rey tuj oxlaj tajlal tkab'lajin xjaw, aju xjaw Adar tb'i, ex ax q'ij lu in che ayontoq aj q'oj kyi'j qe xjal Judiy tu'n kykub' qe xjal Judiy kyu'n; ex tkyaqil jlu minti' o b'ant ikju, ex aqe xjal Judiy e kamb'an kyi'j.
2Ok kychmon kyib' qe xjal Judiy kyuj qe tnam jatum najlqe kyuj kykyaqil partament ate' tjaq' tkawb'il rey Asuero, tu'n kyok tzoqpaj kyi'j qe xjal in che ximantoq ti'j tu'n kyb'inchante mya b'a'n kyi'j, ex mi jun kub' twab'an tib' kywitz, tu'nju otoq tzaj nim t-xob'il kyi'j xjal ate' kyuj kykyaqil tnam.
3Kykyaqil xjal at kyoklen kyuj qe partament, qe xjal at kyoklen ttxlaj rey, qe gobernador ate' kyuj kykyaqil partament ex qe xjal ma'xix kyoklen tuj tkawb'il rey, e onin kyi'j qe xjal Judiy tu'nju otoq tzaj tchi Mardoqueo kyi'j,
4porke ate Mardoqueo otoq tz'ok toklen ma'xix tuj tja rey, ex aju tqanil ti'j otoq pon b'aj kyuj kykyaqil partament, ex teyle junjun q'ij nno'k mas tipun.
5Kub' kyb'yo'n xjal Judiy tu'n spad qe aj q'oj kyi'j; e naj kyu'n te jumajx ex o kyb'incha noq alkye kyajb'il kyi'j aj q'oj kyi'j.
6O'kxpe tuj tnam Susa kub' kyb'yo'n jwe' syent xinaq;
7ax ikx e kub' kyb'yo'n qe xjal lu: Parsandata, Dalfón, Aspata,
8Porata, Adalía, Aridata,
9Parmasta, Arisai, Aridai ex Vaizata,
10atzun qe laj tky'ajal Amán jlu, aju aj q'oj kyi'j xjal Judiy, ex minti' el kyi'n aju kyq'inumab'l.
11Tujx q'ij lu, tej tb'inte rey aju kyajlal qe xjal otoq che kub' b'yo'n tuj tnam Susa,
12xi tma'n te Ester kyja':
—Tuj tnam Susa ma kub' kyb'yo'n xjal Judiy jwe' syent xinaq kyuk'ix qe laj tky'ajal Amán. Pyortzunlo kyuj qe txqantl partament ate' tjaq' nkawb'ile. Q'mantza weye alkye txqantl taja ex jaku txi nq'o'ne teya, chi rey Asuero.
13Atzunte Ester xi ttzaq'we'n:
—Qa b'a'n tuj twitza Tat Rey, e t-xi q'ot amb'il kye xjal Judiy, aqeju najlqe tuj tnam Susa, tu'n kyb'inchante nchi'j kyi'j aj q'oj kyi'j ik tza'nx ma kyb'incha ja'lo kyi'j aj q'oj kyi'j, ex ik tza'nx in tma'n ju orden; ax ikx e tjaw yob'it ti'j tze' kyximlal qe laj tky'ajal Amán, chi Ester.
14Xitzun tma'n rey tu'n tb'ant ikju. Aju orden ex q'ma'n tuj tnam Susa, ex e jawtzun yob'in kyximlal qe laj tky'ajal Amán.
15Qe xjal Judiy najlqe tuj tnam Susa ok kychmon kyib' juntl maj tuj tkyajlajin tajlal xjaw Adar ex ax tuj tnam Susa kub' kyb'yo'n juntl ox syent xinaq, ex minti' el kyi'n kyq'inumab'l.
16Qe xjal Judiy najlqe kyuj txqantl partament ok kychmon kyib' tu'n kyklonte kyib' ex tu'n kyq'ojin kyi'j qe xjal aj q'oj kyi'j, ex kub' kyb'yo'n 75 mil xjal aj q'oj kyi'j, ex minti' el kyi'n kyq'inumab'l.
17Atzun jlu o b'aj tuj oxlaj tajlal xjaw Adar, ex tuj tkyajlajin tajlal ax xjaw e ojlan, ex ok nintz wa'n kyu'n tuk'il tzalajb'il.
18Atzun qe xjal Judiy najl tuj tnam Susa, tu'nju otoq tz'ok kychmon kyib' tuj oxlaj ex kyajlaj tajlal xjaw, kyja'tzun maxi e ojlan tuj olaj tajlal xjaw, ex ok nintz wa'n kyu'n tuk'il tzalajb'il.
19Kyja'tzun, qe xjal Judiy najlqe kyuj qe aldey ex kyuj qe tnam minti' muro tok kyi'j, in kub' kyik'sa'n ninq'ij tuk'il nim tzalajb'il tuj tkyajlajin tajlal xjaw Adar, ex teyle junjun in xi tq'o'n oyaj te juntl.
Aju ninq'ij Purim tb'i20Kub' ttz'ib'an Mardoqueo tkyaqilju otoq b'aj ex e je'x t-sama'n qe u'j kye kykyaqil xjal Judiy, aqeju najlqe kyuj qe partament ate' tjaq' tkawb'il rey Asuero, tza'nx qe partament niqayin ate' ax ikx qeju najchaq ate'.
21Xi tma'n tuj u'j: Tkyaqil ab'q'i tu'n tkub' ik'set ninq'ij lu tuj kyajlaj ex olaj tajlal xjaw Adar,
22tu'nju atzun q'ij lu e klet qe xjal Judiy tuj kyq'ab' qe aj q'oj kyi'j, ex tu'nju atzun xjaw lu ch'expet kyb'is tu'n tok te tzalajb'il ex aju kyoq'el ok te ninq'ij. Ax ikx xi tma'n tu'n tkub' kyik'sa'n ninq'ij lu tuk'il nintz wa'n ex tzalajb'il, tu'n t-xi kyq'o'n kyoyaj jun te juntl ex tu'n t-xi kyq'o'n kykotz qe meb'a.
23A jlu ok kyq'o'n xjal Judiy te jun costumr ik tza'n otoq tzaj tma'n Mardoqueo kye tuj u'j.
24Porke ate Amán aju aj q'oj kyi'j kykyaqil xjal Judiy, otoq jaw ti'n swert tu'nju otoq kub' t-ximan tu'n kykub' tb'yo'n ex tu'n kynaj kykyaqil xjal Judiy tu'n. Ate Amán tky'ajal Hamedata ex tiyjil Agag.
25Tejtzun tokx Ester yolil twitz rey, kub' ttz'ib'an rey jun orden tu'n ax tu'n tkub' tz'aq tkyaqil mya b'a'n tib'ajx Amán, aju otoq kub' t-ximan tu'n tb'inchante kyi'j xjal Judiy. Kyja'tzun ate Amán kyuk'ix qe tky'ajal e jaw yob'in ti'j tze'.
26Kyja'tzun, aqeju q'ij lu ok kyb'i Purim, ex atzun t-xilen yol lu, swert.
Ik tza'nx in tma'n tuj u'j otoq txi t-sama'n Mardoqueo, ex ik tza'nxju otoq kyil ex otoq b'aj kyi'j,
27ok kyq'o'n xjal Judiy jlu te jun kycostumr, ex tu'n tkyaj kyma'n kye qe kyiyjil che ul itz'j te tib'ajxi ex kye kykyaqil xjal nno'k kyq'on kyib' te Judiy; tkyaqil ab'q'i tu'n tkub' kyik'sa'n kab' q'ij ninq'ij lu aju b'animaj ti'j, ik tza'nx otoq txi q'ma'n kye, ex minti' tu'n tik'x ti'j.
28Qe q'ij Purim kukx tu'n kytzaj na't ex tu'n tkub' kyik'sa'n, ex wiqinwiq tu'n tkyaj kyma'n teyle junjun k'loj kyiyjil kye kyk'wa'l kyuj kykyaqil partament ex tnam, tu'ntzun mi'n tkub' naj jlu kyxol qe xjal Judiy ex kyxol qe kyiyjil che ul itz'j te tib'ajxi.
29Ok q'o'n toklen Ester aju t-xu'jil rey ex tme'jel Abihail, tuk'ix Mardoqueo aju xjal Judiy, tu'n tkub' kytz'ib'an tkab'in u'j ti'j ninq'ij Purim, tu'ntzun tkyuwset-xix tnejel u'j otoq txi t-sama'n Mardoqueo.
30Ex xi kysama'n kye kykyaqil xjal Judiy ate' tuj 127 partament ate' tjaq' tkawb'il rey Asuero. Aju yol tz'ib'an kyuj u'j, axix tok ex te q'uqb'ab'l kyk'u'j,
31tu'n tkyuwset tu'n tkub' ik'set ninq'ij Purim tb'i tuj tajlal xjaw b'animaj ti'j, ik tza'nx ju orden otoq txi tma'n Mardoqueo tuk'ix Ester aju t-xu'jil rey. Ax ikx qe xjal Judiy otoq b'ant ti'j kyu'n tu'n tkub' kyik'sa'n ex tu'n tkyaj kyma'n kye qe kyiyjil che ul itz'j te tib'ajxi. Ex kub' kyq'o'n juntl orden kyxolx tu'n tkub' kyyo'n we'yaj ex tu'n kyok ten oq'el,
32ex tu'nju orden tu'n Ester o kyuwset tza'n tten tu'n tkub' ik'set tq'ijlalil Purim. Tkyaqil jlu ku'x tz'ib'an tuj jun libro.
Who We AreWhat We EelieveWhat We Do
2025 by iamachristian.org,Inc All rights reserved.
