Jeremías 23 - Mam Huehuetenango New Ortography

Che b'el ky'iwla'n aj Israel te tib'ajxi

1A Qman in q'mante jlu: Ay b'ek'b'il kywitz qe pastor ma che kyaj kyq'o'n qe nẍne'le tu'n kyxi naj ex tu'n kyb'aj sputj.

2Chi Qman aju Kydios aj Israel kye qe pastor in che kawin kyib'aj qe xjal etzan tu'n: Kyu'ne ma che b'aj sputj qe nẍne'le ex kyu'ne ma che b'je'l oq, porke minti' ma tz'ok kykwentine. Tu'ntzun jlu, ikx weye ktel nkwente ti'j tu'n tkub' kycastiwoye wu'ne tu'n tlaj kyb'inchb'ene mya b'a'n. Aqine Dios in chin q'mante jlu.

3Ex ax qine chin ajetz q'inte ch'intl kytx'aqan nẍne'le ate'x kyuj qe nasyon jatum e pon nlajo'ne; che ajetz wi'ne tu'n kyul juntl maj tuj kywab'l, ex kch'iyil kyb'aj ex kchmetel kyb'et.

4Che okel nq'o'ne pastor te kwentil kye, tu'ntzun mi'n kyxob' ex tu'n mi'n kyjaw sek'paj, ex tu'n mi jun t-xi tzpet. Aqine Dios in chin q'mante jlu.

5Chi Qman kyja': Tzul tq'ijlalil tu'n tjaw nsk'o'ne jun tiyjil David tz'aqlxix tu'n tok te rey. Atzunte kkawil tuk'il nab'l, ex kxel tb'incha'n kyi'j xjal tuj tumelxix tuj tnam lu.

6Tuj tq'ijlalil tkawb'il che kletel qe aj Judá, ex qe aj Israel che anq'il tuj txub'txaj. Aju tb'i k'okel atzun jlu: Ate Qman Kolol ex b'inchal qi'j tuj tumelxix.

7Chi Qman kyja': Tzul tq'ijlalil tu'n mi'n kymante xjal: Kxel qma'n jun yol axix tok twitz Qman aju etz q'inte kye aj Israel tuj Egipto,

8noq o'kx ok kyma': Kxel qma'n jun yol axix tok twitz Qman aju etz q'inte kye kyiyjil aj Israel tuj tx'otx' tuj tb'anq'ab' q'ij, ex kyuj kykyaqil txqantl tx'otx' jatum otoq che pon sputun tu'n. Ex che najal tuj kyex kytx'otx'.

Tqanil kyi'j qeju nno'k kyq'on kyib' te t-sanjel Dios

9Ma tzaj ta'w tuj wanmiye tu'n kylaj qeju nno'k kyq'on kyib' te t-sanjel Dios, ex tkyaqil nximlale ma tzaj lu'lun; mer ik tza'n k'al q'e'n ma chin oke ex ik tza'n jun xjal in chyo'n twi' tu'n vin, noq tu'n tlaj Qman ex tu'n tlaj tyol xjan.

10Qe xjal tuj tx'otx' lu, kykyaqil ma che ok te aj pajil ex ma tz'el kypa'n kyib' ti'j Dios. O'kx in kyb'incha'n mya b'a'n, ex aqeju at kyoklen minti' in xi kyb'incha'n kyi'j xjal tuj tumelxix, ex tu'ntzun jlu aju tx'otx' ma tzqij, ex b'i'x ma tzqij kywab'l alumaj tuj kojb'il, chi Jeremías.

11Chi Qman kyja': Qeju nno'k kyq'on kyib' te nsanjele ex qe pal, minti' in che niman weye, ex tujxpe njaye o che knet wu'ne in che b'inchan mya b'a'n.

12Kyja'tzun, aju kyb'e k'okel te qlolj ex jilin tuj, ex che xel lamo'n tu'n kykub' tz'aq tuj. Ok tjapun tq'ijlalil tu'n tkub' kycastiw, ktzajel nsama'ne mya b'a'n kyib'aj. Aqine Dios in chin q'mante jlu.

13O che wile qeju nno'k kyq'on kyib' te nsanjele, aqeju ate' tuj tnam Samaria, in kyb'incha'n aju minti' in kub' tuj nwitze, in che pakb'an ti'j Baal, ex kyu'n ma che el tzpet qe aj Israel aqeju etzan wu'ne.

14Ax ikx o che wile qeju nno'k kyq'on kyib' te nsanjele tuj Jerusalén, in kyb'incha'n aju plojxix wen, in che yaẍin, in che nik'an yol, ex in che kyuwsan kynab'l xjal jumajx mya b'a'n qe tu'n mi'n tkyaj kykolin aju mya b'a'n in kyb'incha'n. Kykyaqil jlu ik kyten te weye ik tza'n tnam Sodoma ex tnam Gomorra.

15Kyja'tzun aqine Dios Tajaw Tkyaqil in xi nma'ne jlu kyi'j qeju nno'k kyq'on kyib' te nsanjele: Kxel nq'o'ne kywa puro k'a ex kxel nq'o'ne kyk'a' xi'yni venen tuj, porke noq kyu'n qeju nno'k kyq'on kyib' te nsanjele, aqeju ate' tuj Jerusalén, ma ch'iy mya b'a'n tuj tkyaqil nasyon lu.

16Chi Qman aju Tajaw Tkyaqil: Aqeye aj Israel, mi'n txi kyq'o'n kywi'ye ti'j ju in kyma'n qeju nno'k kyq'on kyib' te nsanjele, porke noq nik'aj yol in kyma'n, in kyma'n aju kyu'nx in kub' kyximan, b'ajx txi nma'ne jun yol kye.

17In xi kyma'n kye qeju in che el ik'unte nyole: Tkyaqil k'elel b'a'n kyeye, chi Qman, che chi. Ex in xi kyma'n kye qeju chkyin kywi', aqeju in che ok lpe' ti'j kyex kyximb'etz: Minti' jun mya b'a'n tzul kyib'aje, che chi.

Jun tyol Jeremías

18Mi jun kye ojtzqi'n tnab'l Qman tu'n, mi jun kye o til ex qa o tb'i tyol Qman, mi jun kye o kub' tq'o'n twi' ti'j tyol Qman.

19Aju ttx'u'jil Qman ik tten ik tza'n txqan kyq'iq' jb'al, ex ik tza'n jun xkyaqinpaẍ kb'el tz'aq kyib'aj qe xjal mya b'a'n.

20Aju ttx'u'jil Qman mlay we', maxi kweb'il okxi tjapun aju ximamaj tu'n. Tzul tq'ijlalil clar k'elel kynik'e ti'j jlu.

Tqanil tu'n Qman kyi'j qeju nno'k kyq'on kyib' te t-sanjel

21Mya wu'ne e je'x nsama'n qe xjal lu, aqeju nno'k kyq'on kyib' te nsanjele, ex b'ajx chin yoline kyuk'il, atzun kye ma che ex ojqelan tu'n kyyolin kye xjal.

22Noqwit ma tz'el kynik' ti'j nximb'etze, mawtlo txi kyma'n nyole kye xjal etzan wu'ne, ex mawtlo che el kypa'n ti'j ju b'e mya b'a'n q'i'n kyu'n, ex ti'j ju mya b'a'n in b'ant kyu'n.

23Chi Qman: Qa najchaq ex qa niqayin, ax Dios we qin tuj tkyaqil part.

24¿Alkye jun jaku kub' tewan tib' nwitze? ¿Myapetzun atine tuj tkyaqil part tuj kya'j ex twitz tx'otx'? Aqine Dios in chin q'mante jlu.

25O nb'iye aju nik'aj yol in kyma'n qeju nno'k kyq'on kyib' te nsanjele, ex noq tten in kyma'n qa wu'ne sama'n qe ex qa in chin yoline kyuk'il tuj kywitzik'.

26¿Jtoj b'a'n t-xi kykolin qeju nno'k kyq'on kyib' te nsanjele tu'n t-xi kytx'olb'a'n yol te sb'ub'l, aju tuj kyex kynab'l in jaw jlet?

27Tu'nju witzik' in xi kytx'olb'a'n jun te juntl kyaj tu'n tik' nna'njtze kyu'n qe xjal etzan wu'ne, ik tza'n o kyb'incha qe kyxe'chel, ik' nna'njtze kyu'n tej kyok lpe' ti'j dios Baal.

28Qa ma tz'ok twitzik' jun xjal nno'k tq'on tib' te nsanjele, e t-xi tma'n qa noq jun witzik' jlu, ex qa ma tk'am nyole, b'a'n tu'n t-xi tpakb'a'n tuj tumel. Porke mya junx ta' ttxa' triw tuk'il triw.

29Aju nyole ik tten ik tza'n q'aq' ex ik tza'n jun martiy in b'aj b'uchj ab'j tu'n. Aqine Dios in chin q'mante jlu.

30Kyja'tzun mya b'a'n tuj nwitze aju in kyb'incha'n qeju nno'k kyq'on kyib' te nsanjele, aqeju nne'l kyelq'a'n yol jun te juntl ex in kyma'n qa wu'ne in xi nma'ne yol kye. Aqine Dios in chin q'mante jlu.

31Mya b'a'n nne'la tuj nwitze aju in kyb'incha'n qeju nno'k kyq'on kyib' te nsanjele, porke in kyma'n qa weye nyol in kypakb'a'n ex kyu'nx in jaw kynik'an.

32Minti' in chin tzalaje kyi'j qeju nno'k kyq'on kyib' te nsanjele in kyma'n witzik'b'aj mya ax tok, ex tu'nju nik'aj yol ex sb'ub'l in kyma'n, in che el tzpet qe xjal etzan wu'ne. Mya wu'ne in che'x nsama'ne qe, ex b'ajx txi nma'ne kye tu'n kyyolin, kyja'tzun minti' jun b'a'n ma kyb'incha kye qe xjal lu. Aqine Dios in chin q'mante jlu.

Kb'el kycastiw qeju nno'k kyq'on kyib' te t-sanjel Dios

33Qa ma tzaj kyqanin xjal teya, qa jun xjal nno'k tq'on tib' te nsanjele ex qa jun pal: ¿Alkye tyol Qman in tma'n? qa che chi, q'manxa kye kyja': Ate Qman in tkyuwsa'n qa aqeye jun iqtz te te ex che kyjel xo'ne tu'n.

34Qatzun at jun xjal nno'k tq'on tib' te nsanjele ex qa jun pal, ex qa noq alkye jun xjal ma tma: Atzun tyol Qman ma tzaj tma'n weye jlu, qa chi, kb'el tcastiw wu'ne kyuk'ix qeju ate' tuj tja.

35Teyle junjun b'a'n tu'n t-xi tqanin te tamiw ex qa te terman kyja': ¿Alkye tzaq'web'l tu'n Qman? ¿Chi tok tu'n?

36Ya mi'n txi kyma'ne juntl maj kyja': Atzun tyol Qman ma tzaj tma'n weye jlu, ex qa at jun ma yolin ikju, noq tex tyol in tma'n ex ma b'aj tch'expu'n tnab'l nyole, aqine Dios itz', ex aqine Kydiose aju Tajaw Tkyaqil.

37Qaninxa kye qeju nno'k kyq'on kyib' te nsanjele kyja': ¿Alkye tzaq'web'l tu'n Qman? ¿Alkye o tma?

38Qatzun ma kyma: A tyol Qman ma tzaj tma'n qeye jlu, qa che chi, tzaq'wenxa kye kyja': Chi Qman: Tu'nju kukx ma che yoline ti'j yol o txi nma'ne tu'n mi'n kyyoline ti'j,

39tu'ntzun jlu k'ik'el kyna'njtze wu'ne, ex che elex nxo'ne najchaq nwitze tuk'ix ju tnam xi nq'o'ne kyeye ex kye qe kyxe'chele.

40Wu'ne che elel ik'une, kb'el kych'ixwiye te jumajx ex mlay tzik' tna'njtz.