Eclesiastés 5 - Mam Huehuetenango New Ortography

Japunx tu'na aju in xi ttziyana

1Ok t-xi'ya tuj tja Dios, ten tkwenta ti'ja, tu'ntzun tb'inteya tyol; a jlu mas ma' toklen twitzju chojb'il in xi kyq'o'n xjal minti' kynab'l, porke minti' nne'l kynik' ti'j qa in kyb'incha'n mya b'a'n.

2Mi'n jaw tlajon tib'a, mi tu'n ttzi'ya ex mi kyu'n qe t-ximb'etza, tu'n t-xi ttziyana jun yol te Dios; ate Dios at tuj kya'j ex atzun teya twitz tx'otx' ta'ya. Kyja'tzun mi'n yolina ti'j nim yol,

3porke tu'nju nim in che ximan xjal in che kub' xq'umsa'n, ex tu'nju nim yol in che yolin ti'j jaku kyma yol minti' tajb'en.

4Ok t-xi ttziyana jun yol te Dios japunx naj tu'na, porke ate Dios minti' in tzalaj kyi'j qe xjal minti' kynab'l. Japunx tu'na aju in xi ttziyana;

5mas b'a'n tu'n mi'n t-xi ttziyana twitzju tu'n t-xi ttziyana ex mi'n japun tu'na.

6Mi'n taq'a amb'il tu'n tb'inchanteya il tu'n ttzi'ya, ex mi'n txi tma'na teju xjal sama'n tu'n Dios qa noq xtzpeta ti'j. ¿Tiqu'n taja tu'n ttzaj tq'oj Dios ti'j ju in tma'na, ex te tib'ajxi tu'n tkub' xitun taq'unb'ena tu'n?

7Kyja'tzun, qa nim in witzky'an xjal ex qa nim in yolin, minti' tajb'en jlu, atzun teya xob'a twitz Dios.

Noqx gan ju kyq'inumab'l xjal

8Mi'n jaw lab'ina ti'j qa ma tila tuj jun tnam in che yajlanjtz qe xjal meb'a ex minti' in xi b'incha'n kyi'j tuj tumelxix, porke jun xjal ma' toklen in kyaj tjaq' tkawb'il juntl xjal mas ma' toklen twitz, ex kykab'il qe jlu in che kyaj tjaq' tkawb'il juntl mas ma' toklen kywitz.

9Maske ikju, aju in tzaj tuj kojb'il jaku tz'ajb'en kye kykyaqil qa ma taq' tib' jun rey tu'n tonin.

10Aju xjal tok tk'u'j ti'j pwaq kukx taj txqantl; aju xjal tok tk'u'j ti'j q'inumab'l, tuj twitz qa nim at tuk'il. Ax ikx noqx gan te jlu,

11ex qa nim at tuk'il xjal, ax ikx nim in b'aj tnajsa'n. ¿Ex ti tganar ti'j tu'n tten nim tq'inumab'l? O'kx ch'in tganar ti'j tu'n tok tke'yin.

12Aju xjal in aq'nan, qa nim twa in b'aj ex qa mi'n, ex txub'txaj in tan; atzunju xjal q'inun, tu'n tq'inumab'l minti' nno'kx watl tuj twitz.

13At jun mya b'a'n b'isb'ajilxix wen ma wile twitz tx'otx'; aju tq'inumab'l xjal in b'aj tchmo'n nno'k te jun mya b'a'n te te,

14ex qa at jun trat mya b'a'n ma tz'el, jaku b'ant txi b'aj tkyaqil tq'inumab'l ti'j; ex qa at jun tky'ajal, ya te tib'ajxi minti' ch'in kyjel tq'o'n te.

15Ex ik tza'nx tej tul itz'j tzalu twitz tx'otx', ax ikxtzun k'ajel juntl maj: sqi't ti'j tej tul itz'j, ex ok tkyim minti' ch'in kxel ti'n ti'j taq'unb'en.

16Ax tok b'isb'ajilxix te jlu: Ik tza'nx tej tul itz'j te xjal twitz tx'otx', ax ikxtzun k'ajel juntl maj. ¿Titzun ma tkamb'a tu'nju ma tz'aq'nan wen ex noqx gan taq'unb'en?

17Mya o'kx jlu, ax ikx, noq jte' q'ij ok ktel tzalu twitz tx'otx' ktel tuj b'is ex tuj yajb'il, tuk'il k'ixk'oj ex q'oj.

18Ma tz'el nnik'e ti'j: Aju mas b'a'n tu'n tb'inchante xjal, b'a'n tu'n twa'n ex tu'n tk'an, ex tu'n tachin ti'j taq'unb'en, aju nim otoq tzaj tq'o'n Dios, atzun te jlu aju at toklen xjal ti'j.

19Ax ikxtzun qe xjal in tzaj tq'o'n Dios kyq'inumab'l, ax ikx in xi tq'o'n kyoklen tu'n kywa'n ti'j, ex tu'n t-xi kyk'mo'n aju at kyoklen ti'j, porke aju tu'n kytzalaj ti'j kyaq'unb'en, a jlu jun oyaj tu'n Dios.

20Ate Dios knojsalte tanmi xjal tu'n tzalajb'il, kyja'tzun mlay tzaj b'aj tk'u'j ti'j tchwinqlal ok tten tzalu twitz tx'otx'.