Jueces 13 - Mam Huehuetenango New Ortography

Tej titz'j Sansón

1E oktzun ten juntl maj aj Israel b'inchal mya b'a'n twitz Qman; kyja'tzun e je'x tq'o'n Qman tuj kyq'ab' aj Filisteo tu'n kykawin kyib'aj 40 ab'q'i.

2Tuj tnam Zora kyxol qe tiyjil Dan, attoq jun xinaq Manoa tb'i, ex aju t-xu'jil minti'toq tal otoq tzaj tu'nju mib'antoq alin.

3Kub' tyek'un tib' jun t-anjel Qman twitz xu'j lu ex xi tma'n te: Aya xu'j mib'an alin kyja'tzun na'nx ttzaj jun tala, ex ja'lo k'okel ten jun tala ex tzul itz'j jun tala xinaq.

4Ex kwentin kub' tib'a tu'n mi'n t-xi tk'a'na vin ex mi q'e'n, ex mi'n txi tnik'b'e'na jun ti'xti mayo'n tu'n ley.

5Aju tala tzul itz'j, mi'n tz'el matzet ttxa'n twi', ex ok tul itz'j ya pa'nmajtl tu'n Qman tu'n tok te nazareo ex tu'n tajb'en te Dios, ex atzunte k'okel ten klolte kye aj Israel tuj kyq'ab' aj Filisteo.

6Xi'tzun xu'j tuk'il tchmil ex xi tma'n te: At jun xinaq t-sanjel Dios ma pon aj jatum atintoqe; nim ma chin lab'ine tu'n ex mer ik tza'n ax jun t-anjel Qman. Ex minti' xi nqanine te alkye ex jatum tzajni, ax ikx te minti' ma tzaj tma'n tb'i weye.

7Noq o'kx ma tzaj tma'n weye qa tzul itz'j jun wale xinaq, ex ma tma qa texju ja'lo tu'n mi'n t-xi nk'a'ne vin mi q'e'n, ex mi'n tu'n t-xi nnik'b'e'ne jun ti'xti mayo'n tu'n ley, porke aju tal ne' pa'nmaj tu'n Dios tu'n tok te nazareo ok tul itz'j ex okxi tkyim.

8Oktzun ten Manoa na'l Dios ex tma kyja': In chin kub'sane twitza Nman Dios, tu'n ttzaj tlajo'na juntl maj aju xinaq quk'ile, tu'ntzun ttzaj tma'n qeye tza'n tten tu'n tch'iset tal ne' ok tul itz'j.

9B'anttzun tu'n Dios ik tza'n otoq txi tqanin Manoa, ex kub' tyek'un tib' juntl maj t-anjel Qman twitz xu'j tuj kojb'il, ex mya ajuntoq Manoa tuk'il.

10Xi qelan naj xu'j q'malte te tchmil:

—B'intza, aju xinaq o wile k'itzqeyin ma kub' tyek'un tib' juntl maj nwitze.

11Jawtzun we' Manoa ex xi' tuk'il t-xu'jil jatum ta'toq xinaq, ex xi tma'n te:

—¿Apeya o yolin tuk'il nxu'jile k'itzqeyin?

Atzunte xinaq tzaj ttzaq'we'n:

—Aqine.

12Xitzun tma'n Manoa te:

—Ok tjapun aju ma tmaya qeye, ¿alkyetzun tumel kch'iyil tal ne' qu'ne? ex ¿ti kb'antel qu'ne ti'j tal ne'?

13Atzunte t-anjel Qman xi ttzaq'we'n:

—Il ti'j tu'n tb'inchante t-xu'jila ik tza'n o txi nma'ne te:

14Mi'n txi tk'a'n vin ex mi juntl wiq ta'l twitz uva ex mi'n txi tk'a'n q'e'n, ex mi'n txi tnik'b'e'n juntl ti'xti mayo'n tu'n ley. Noq o'kx tu'n tjapun tu'n ik tza'n o txi nma'ne te, chi anjel.

15-16Tu'nju minti'toq b'a'n tu'n Manoa qa aju xinaq lu jun t-anjel Qman, xi tma'n te:

—B'inchama xtalb'il, tenkja quk'ile tu'n tchyo'na ti'j jun tal chip kb'ajel qb'incha'ne.

Atzunte anjel xi ttzaq'we'n:

—Tipxlo qa ma chin kyaj tene, mlay chin chyo'ne ti'j kychi'ye. Ex b'a'n tu'n tkub' tpatuna tal chip te jun oyaj te Qman.

17Xitzun tma'n Manoa te t-anjel Qman:

—Noqna o'kx q'mantza qeye ti tb'iya tu'ntzun t-xi qq'o'ne chjonte teya ok tjapun aju ma tmaya.

18Ex xi ttzaq'we'n anjel:

—¿Ti tajb'en teya tu'n tb'inteya nb'iye? Porke aju nb'iye ma'xix t-xilen.

19Tzajtzun ti'n Manoa aju tal chip tuk'ix ch'in twitz awal, e kub' tq'o'n tib'aj jun pik ex kub' tpatun te jun oyaj te Qman. Tb'inchatzun Qman jun b'inchb'en ma'xix t-xilen twitz Manoa ex twitz t-xu'jil.

20Tej tjaw k'ant q'aq' tib'aj altar, o til Manoa tuk'ix t-xu'jil jax t-anjel Qman tuj tqan q'aq', ex xi' tuj kya'j. E kub'tzun ẍmeje' tejxi tpon takl tib'aj kywitz twitz tx'otx'.

21Eltzun tnik' Manoa ti'j qa ate xinaq lu t-anjel Qman. Minti'tl kub' tyek'un tib' juntl maj t-anjel Qman twitz Manoa ex mi twitz t-xu'jil.

22Xitzun tma'n Manoa te t-xu'jil:

—Axix tok qo kymel, porke ma tz'ok qke'yin Dios.

23Atzunte xu'j xi ttzaq'we'n:

—Noqwit taj Qman tu'n qkub' tb'yo'n, minti'wtlo xi tk'mo'n aju tal chip xkub' qpatun, ex twitz awal xi qq'o'n te oyaj, ex minti'wtlo ma qil tkyaqilju saj tyek'un qe. Ax ikx minti'wtlo saj tma'n tkyaqil jlu qe.

24Ultzun itz'j tal xu'j ex ok tq'o'n tb'i Sansón. In ch'iytoq tal ne' ex kub' ky'iwla'n tu'n Qman.

25Pon jun q'ij, lu Sansón ta'toq tuj kycampament jun k'loj tiyjil Dan, aju tkub' t-xol lugar Zora tuk'il lugar Estaol, ex oktzun ten T-xew Qman q'olte tipumal.