1Xi'tzun Roboam tuj Siquem, ex kykyaqil aj Israel otoq che pon ma chixin tu'n tok kyq'o'n te rey.
2Ex o tb'i Jeroboam aju tky'ajal Nabat, tej maxtoq ta' tuj Egipto jatum otoq pon tej tel oq twitz rey Salomón, ex ajtz meltz'aj tuj Egipto tu'n tul tuj ttanmi.
3Xitzun txokb'aj Jeroboam kyu'n aj Israel. Tejtzun tul, xi' kyuk'ix kykyaqil aj Israel yolil tuk'il Roboam ex xi kyma'n te kyja':
4—Puro kyuwxix tley qtzan tmana kub' tq'o'n qib'aje, atzun teya ja'lo mi'n kub' tq'o'na jun aq'untl kyuwxix qib'aje, q'i'n ela aju ley ponin ta'w wen kub' tq'o'n qtzan tmana qib'aje. Qatzun ma txi tnimana qyole oktzun qo ajb'ele teya.
5Atzunte Roboam xi ttzaq'we'n:
—B'ix che ule juntl maj wuk'ile tuj ox q'ij ja'lo.
E ajtzun kykyaqil xjal kyja.
6Atzunte rey Roboam ok ten qanil jun tumel kye qe tij xjal, aqeju otoq che ajb'en te rey Salomón aju qtzan tman tej itz'xtoq, ex xi tqanin kye:
—¿Alkye jun nconseje ktzajel kyq'o'ne tu'n t-xi nma'ne kye xjal lu?
7Atzun kye tij xjal xi kytzaq'we'n:
—Qa ma tb'inchaya b'a'n kye xjal lu, ex qa ma txi tnimana alkye kyajb'il, ex qa ma che'x ttzaq'we'na tuk'il jun yol puro b'a'n, kukxtzun che ajb'el qe xjal lu teya.
8Pero minti' xi tniman Roboam kyconsej qe tij xjal, noq o'kx xi' qanil tconsej kyuk'il qe ku'xun, aqeju junx e tzaj ch'iy tuk'il ex in che ajb'en te,
9ex xi tqanin kye:
—¿Alkye jun nconseje ktzajel kyq'o'ne tu'n t-xi nma'ne kye xjal lu, porke ma tzaj kyqanin weye tu'n mi'n tkub' nq'o'ntle aq'untl kyuwxix kyib'aj, ik tza'nju kub' tq'o'n qtzan nmane?
10Atzun kye ku'xun, aqeju junx e tzaj ch'iy tuk'il, xi kytzaq'we'n kyja':
—Qe xjal ma tzaj kyqanin teya tu'n mi'n tkub' tq'o'na aq'untl kyuwxix kyib'aj ik tza'n kub' tq'o'n qtzan tmana, atzun teya q'manxa kye kyja': Qa puro kyuwxix o kawin qtzan nmane kyib'aje, atzun weye k'ik'el mastl wu'ne ik tza'n te;
11qa kyuw tkawb'il qtzan nmane kub' tq'o'n kyib'aje, atzun weye k'ik'el mastl wu'ne, ex qa xi jato'n ti'j kyk'u'je tu'n asyal tu'n, atzun weye kxel njato'ne ti'j kyk'u'je tu'n tz'u'm xpotx'imaj tokx k'uxb'il ttxa'n; chikuya kye, che chi qe ku'xun.
12Tujtzun toxin q'ij xi' Jeroboam juntl maj kyuk'ix kykyaqil tnam xjal aj Israel tu'n kyyolin juntl maj tuk'il Roboam, ik tza'nx otoq tma kye.
13Atzunte rey Roboam kyuwxix o yolin wen kye tnam xjal; minti' xi tniman aju consej otoq tzaj kyq'o'n tij xjal te.
14Ex ax yol xi tma'n kye xjal ik tza'nju yol otoq tzaj kyma'n qe ku'xun te, xi tma'n: Qa kub' q'o'n jun aq'untl kyuwxix kyib'aje tu'n qtzan nmane, atzun weye k'ik'el mastl wu'ne ik tza'n te, ex qa xi jato'n ti'j kyk'u'je tu'n asyal tu'n qtzan nmane, atzun weye kxel njato'ne kyasyale tu'n tz'u'm xpotx'imaj tokx k'uxb'il ttxa'n, chi Roboam.
15Minti' xi tniman rey kyyol tnam xjal porke tu'n Qman b'ant jlu, tu'ntzun tjapun aju yol otoq txi ttziyan Qman te Jeroboam aju tky'ajal Nabat. Aju yol lu tu'n Ahías aju aj Silo otoq tzaj tma'n.
16Tejtzun kyke'yinte kykyaqil tnam xjal aj Israel minti' xi niman kyyol tu'n rey, xitzun kytzaq'we'n kyja':
Minti' qe qoklen ti'j tiyjil David, minti' qe qxilen tuk'il tky'ajal Isaí. Aqeye aj Israel, teylex te junjun ku taj tja, atzun kye tiyjil David e tok kykwentin qeju ate' tuj tja, che chi.
Textzunju or lu kykyaqil aj Israel e aj kyja.
17Atzun qe aj Israel, aqeju najlqe kyuj qe tnam ate' tuj Judá, kukx e kyaj ten tjaq' tkawb'il rey Roboam.
18Xi t-sama'n Roboam aju xjal Adoram tb'i, aju tok te nejenel ti'j aq'untl lajwers in b'ant, atzun kye aj Israel ok kyxo'n tu'n ab'j ex b'i'x kyim kyu'n. Atzunte rey Roboam jax naj tuj tcarwaj ex xi oq tuj tnam Jerusalén.
19Kyja'tzun tten e etz aj Israel tjaq' kykawb'il qe tiyjil David, ex kukx kyten ja'lo.
Who We AreWhat We EelieveWhat We Do
2025 by iamachristian.org,Inc All rights reserved.
