Mateo 23 - Mam Huehuetenango New Ortography

In tma'n Jesús mya b'a'n qe fariseo, ex qe xnaq'tzal ti'j ley Marcos 12.38-40; Lucas 11.37-54; 20.45-47

1Oktzun ten Jesús yolil kyuk'il xjal ex kyuk'il t-xnaq'tzb'en ex xi tma'n kye:

2—Qe xnaq'tzal ti'j ley ex qe fariseo nno'k kyq'on kyib' te xnaq'tzal tu'n kyq'onte xnaq'tzb'il ti'j tley Moisés.

3Kyja'tzun, tkyaqilju ktzajel kyma'n kyeye tu'n tjapun kyu'ne, japunx kyu'ne ex kyb'inchame; ex mi'n kyb'inchaye ik tza'n kye in kyb'incha'n, porke in kyma'n alkye tu'n tb'ant ex ax qe minti' in b'ant kyu'n.

4Porke in b'aj kyk'alo'n qe iqtz alxix, ex minti' in k'isj kyu'n xjal, ex in kyma'n tu'n tjaw kyiqan xjal; atzun kye mlay tz'ok kyq'o'n jun tal kyq'ab' ti'j iqtz tu'n tjaw lamo'n iqtz ti'j xjal.

5Tkyaqilju kyb'inchb'en in b'ant noq o'kx tu'n tok kyke'yin xjal. Porke in kub' kytz'ib'an tyol Dios twitz jun piẍ tz'u'm ma' twitz, nno'k kyk'alo'n ti'j kyq'ab' ex qa tib'aj kywitz, ex nno'k kyq'o'n kyxb'alun ẍjo'w ẍli'jin ttxa'n.

6Ex kyajb'il tu'n kykub' qe' tuj tnejel q'uqb'il tuj nintz wa'n, ex tu'n kykub' qe' tuj tnejel q'uqb'il kyuj ja te k'ulb'il.

7Ex kyajb'il tu'n kyok q'olb'e'n tuj plas ex tu'n tok q'o'n kyb'i xnaq'tzal kyu'n xjal.

8Atzun kyeye mi'n kub' tuj kywitze tu'n tok q'o'n kyb'iye xnaq'tzal, porke junx xnaq'tzal kyeye, aju Crist, atzun kyeye kyitz'in kyib'e kykyaqile.

9Ex mi'n tz'ok kyq'o'ne te kymane jun xjal tzalu twitz tx'otx'; porke junx Kymane at, aju at tuj kya'j.

10Ex mi'n tz'ok q'o'n kyb'iye nejenel kyu'n xjal, porke junx nejenel kyeye at, atzun qine aju Crist.

11Aju mas ma' toklen kyxole, atzunju k'okel te kymajene.

12Ex alkye ma jaw tniman tib' k'okel te ch'in; ex alkye ma tz'ok tq'on tib' te ch'in ok kjawil nimsa'n.

13Ex b'ek'b'il kywitze, aqeye xnaq'tzal ti'j ley ex aqeye fariseo xmletz' qeye, porke in xi kymayo'ne tu'n kyokx xjal tuj kawb'il in tzaj tuj kya'j; mi aqeye minti' in che okxe, ex mi'n kyaje tu'n kyokx qe xjal, aqeju kyajb'il tu'n kyokx.

14[Ay b'ek'b'il kywitze aqeye xnaq'tzal ti'j ley ex aqeye fariseo xmletz' qeye, porke nne'l kyi'ne kyja meb'a xu'j, ex in che na'ne Dios nim tuj tu'n tkub' ewat kyb'inchb'ene kywitz xjal. Tu'ntzunju kb'el jun kysentense mas kyuwxix.]

15Ay b'ek'b'il kywitze aqeye xnaq'tzal ti'j ley ex aqeye fariseo xmletz' qeye. In b'aj kyb'etine tib'aj mar ex twitz tx'otx' tu'n tok jun xjal te kyxnaq'tzb'ene; oktzun tok xjal te kyxnaq'tzb'ene, mas aj il nno'k kywitze, ex mas in xi' tuj il kyu'ne tu'n t-xi' tuj infierni.

16Ay b'ek'b'il kywitze, ẍaqlul xjal qeye ex moẍ qeye. In kyma'ne: Qa at jun xjal ma txi ttziyan jun yol ex qa ma tzaj tna'n tja Dios ti'j, mya il ti'j tu'n tjapun tyol; ex qa at jun xjal ma txi ttziyan jun yol ex qa ma tzaj tna'n q'an pwaq tokx tuj tja Dios ti'j tyol, il ti'j tu'n tjapun tyol, che chiye.

17Minti' kynab'le ex moẍ qeye. ¿Alkye mas at toklen, ape q'an pwaq, ex qa a tja Dios aju nno'k q'an pwaq te xjan tu'n?

18Ax ikx in kyma'ne: Qa at jun xjal ma txi ttziyan jun yol ex qa ma tzaj tna'n altar ti'j tyol, mya il ti'j tu'n tjapun tyol; ex qa at jun xjal ma txi ttziyan jun tyol ex qa ma tzaj tna'n oyaj ti'j, aju tkub' tib'aj altar, il ti'j tu'n tjapun tyol, che chiye.

19Minti' kynab'le ex moẍ qeye. ¿Alkye mas at toklen, apeju oyaj, ex qa a altar aju nno'k oyaj te xjan tu'n?

20Ex alkye jun xjal ma txi ttziyan jun yol ex qa ma tzaj tna'n altar ti'j tyol, ax ikx in tzaj tna'n ti'j tkyaqilju tkub' tib'aj altar.

21Ex alkye jun xjal ma txi ttziyan jun yol ex qa ma tzaj tna'n tja Dios ti'j tyol, ax ikx in tzaj tna'n Dios aju najl tuj.

22Ex alkye jun xjal ma txi ttziyan jun yol ex qa ma tzaj tna'n kya'j ti'j tyol, ax ikx in tzaj tna'n tq'uqb'il Dios jatum in kawin, ex in tzaj tna'n Dios aju q'uql tib'aj.

23Ay b'ek'b'il kywitze aqeye xnaq'tzal ti'j ley ex aqeye fariseo xmletz' qeye. In xi kyq'o'ne tlaji'n te Dios ti'j tal k'ul alwen tb'i, ex ti'j tal k'ul anís tb'i, ex ti'j tal k'ul comino tb'i, atzunju mas at toklen in tma'n tuj ley in kyaj kyq'o'ne; minti' in kyb'incha'ne aju tz'aqlxix, ex minti' in q'aq'an kyk'u'je kyi'j xjal, ex minti' in japun kyu'ne aju in xi kytziyane. Atzun jlu ilxix ti'j tu'n kyb'inchanteye, ax ikx tu'n t-xi kyq'o'ne tlaji'n.

24Aqeye ẍaqlul xjal qeye, ex moẍ qeye, in jatz kyi'ne jun tal us tuj kyk'a'ye, ex in xi kyb'alq'u'ne jun chej camey.

25Ay b'ek'b'il kywitze aqeye xnaq'tzal ti'j ley ex aqeye fariseo xmletz' qeye. Porke nne'l kytx'jo'ne ti'jtzi vas ex ti'jtzi laq, atzun tuj kyanmiye o'kx in che ximane ti'j tu'n kyelq'ane ex in pon kyk'u'je ti'j nimku.

26Aya fariseo moẍa. Nej tx'jo'mela tuj vas ex tuj laq, ax ikx tu'n t-saqix ti'jtzi.

27Ay b'ek'b'il kywitze aqeye xnaq'tzal ti'j ley ex aqeye fariseo xmletz' qeye. Porke ik kytene ik tza'n qe pantyón q'o'maj txun kyi'j, tb'anil che ke'yin ti'jtzi, atzunju kyujxi nojni tu'n kyb'aqil kyimni ex tu'n tkyaqil ttz'ilil.

28Ikxtzun kyeye, in kyyek'un kyib'e kywitz xjal mer ik tza'n tz'aqlxix qeye, atzun tuj kyanmiye nojni tu'n xmletz'il ex tu'n mya b'a'n.

29Ay b'ek'b'il kywitze aqeye xnaq'tzal ti'j ley ex aqeye fariseo xmletz' qeye. Porke in jaw kyb'incha'ne kypantyón qe t-sanjel Dios, ex in b'aj kyb'incha'ne kypantyón qe tz'aqlxix tu'n tkyaj tb'anil che ke'yin,

30ex in kyma'ne: Noqwit ato'ye tuj tq'ijlalil tej kyten qchmane ojtxi, miwtlo ok qq'on qib'e kyuk'il tu'n kykub' b'yet qe t-sanjel Dios, che chiye.

31Kyja'tzun nno'k kyq'on kyib'e testiw kyi'jxe, qa aqeye kyiyjil qeju e kub' b'yonte qe t-sanjel Dios.

32Japunxtzun kyu'ne aju kyaj yek'un kyeye kyu'n kychmane.

33Lob'aj qeye ex tiyjil q'anti' qeye ¿tza'ntzun tten tu'n kyko'pje tu'n mi'n tkub' kysentense tu'n kyxi'ye tuj infierni?

34Kyja'tzun kxel nsama'ne qe nsanjele kyuk'ile, kyuk'ix qeju at kynab'l, kyuk'ix qe xnaq'tzal; kyxoltzun jlu at junjun kb'el kyb'yo'ne ex kjawil kyq'o'ne twitz crus, ex junjuntl kb'ajel kyk'ixb'isa'ne tuj ja te kyk'ulb'ile, ex ok kyel oq kywitze che xel lpe'ye kyi'j tuj junjun tnam tu'n kyyajlanjtz kyu'ne;

35kyja'tzun ktzajel castiw kyib'aje tu'n kylaj qe xjal e kub' b'yo'n minti' kyil ex el kychk'el twitz tx'otx', tzajnix b'ant atxix ojtxi tej tkub' b'yo'n Abel, ate xjal lu tz'aqlxix, atzunju mankb'il kub' b'yo'n, atzun Zacarías tky'ajal Berequías, aju kub' kyb'yo'ne ti'jxi altar twitz tja Dios.

36Ax tok kxel nma'ne kyeye, tu'n tlaj tkyaqil jlu ktzajel castiw kyib'aj xjal ate' tuj tq'ijlalil ja'lo.

Jaw oq' Jesús ti'j tnam Jerusalén Lucas 13.34-35

37Aqeye aj Jerusalén in che kub' kyb'yo'ne qe t-sanjel Dios ex in che ok kyxo'ne tu'n ab'j qeju in che tzaj t-sama'n Dios kyuk'ile. Nimku maj o wajb'eye tu'n kyok nchmo'n qeye ik tza'n jun ttxu ek' in che ok tchmo'n qe tal tjaq' t-xik', ex minti' o kyajb'eye.

38Kyb'intze, aju tja Dios at kyxole kyjel kolin tu'n Dios.

39Ex kxel nma'ne kyeye, mlay chin ok kyke'yintle ja'lo, maxitzun chin okel kyke'yintle okxi kymanteye: Ky'iwla'n teju tzul, aju ktzajel sama'n tu'n Qman.