Salmos 35 - Mam Huehuetenango New Ortography

In qanin David onb'il te Qman tuj tna'j DiosB'itz tu'n David

1Nman, q'ojina kyuk'il qeju in che q'ojin wi'je; tok tzoqpaja kyi'j qeju in che ok tzoqpaj wi'je.

2Tzyuma aju tmaqb'ila in ajb'en tuj q'oj ex ttzaja onil weye;

3tzyuma tlansa ex we'kuya kywitz qeju lepcho'k wi'je tu'n nkub'e kyu'n; q'mantza qa aya klol weye.

4E kyel oq tu'n kych'ixwi qeju kyaj tu'n nkub' b'yo'ne kyu'n, ex kyuk'ix qeju kyaj tu'n kyb'inchante jun mya b'a'n wi'je.

5Ikwit che ok ik tza'n ttxa triw in xi tiqan kyq'iq', ok kyex lajo'n tu'n t-anjel Qman.

6Tz'okwit kyb'e te qlolj ex sjilin tuj, ok kyex lajo'n tu'n t-anjel Qman.

7Minti' jun mya b'a'n o nb'inchaye kyi'j, ex kub' kyq'o'n jun k'ob'il wi'je ex ku'x kylaku'n jun jul tu'ntzun nxi tz'aqe tuj.

8Noqwit minab'en tzaj jun mya b'a'n kyi'j. Axwit qe che'x tz'aq tuj k'ob'il in kub' kyq'o'n. Ex b'a'nwt kykub' tz'aq tuj jun mya b'a'n.

9Ok chin tzalajele ti'j Qman porke tu'n ok chin kletele.

10Tu'n tkyaqil wanmiye kxel nma'ne: ¿Alkye juntl ik tza'n teya Nman? In che tklo'na qe meb'a ex qeju minti' kyipun kywitz qe xjal mas nim kyipun kywitz, ex kywitz qeju nne'l kyelq'a'n aju at kye.

11In che jaw we' qe xjal mya b'a'n te testiw wi'je, ex in chin oke tuj xjel kyu'n ti'j ju minti' b'a'n wu'ne.

12Tzaj kyq'o'n mya b'a'n weye te t-xel ju b'a'n o nb'inchaye kye, ex tu'n tlaj jlu in tzaj nim nb'ise.

13Tej kyyab't qe tzaj nb'ise kyi'j, ok nq'o'ne nxb'alune ch'i'x twitz ex kub' nyo'ne we'yaj, ex minti' xi nkoline tu'n nna'ne Dios kyi'j tuj wanmiye.

14O chin b'isune nim kyi'j, mer ik tza'n ti'j ntxu'ye, mer ik tza'n ti'j jun wamiwoye ex mer ik tza'n ti'j jun wermaniye.

15Tejtzun ttzaj mya b'a'n wi'je kykyaqil e jaw tze'n; mer ik tza'n junxitl xjal qe ex minti' ojtzqi'n qe wu'ne, minti' xi kykolin tu'n kyyasun wi'je.

16In b'aj yajla'ne kyu'n ex e ok ten xmayil wi'je, tu'n kyq'oj jaw qitx'itx'in t-xe kye' wi'je.

17Nman, ¿kukxpetzun kxe'l tu'na, noq in tzaj tke'yina jlu wi'je? Chin tkloma kywitz qeju in che tzanun wi'je mer ik tza'n b'alun.

18Jaku txi nq'o'ne chjonte teya kywitz nimku xjal kychmon kyib'; jaku jaw nnimsa'ne kywitz tnam xjal nimxix kyajlal.

19Miwt che jaw tzalaj qe aj q'oj wi'je; mi'n taq'a amb'il tu'n kyxmayin wi'je aqeju in chin el ik'une kyu'n ex minti' jun mya b'a'n o nb'inchaye.

20Aqeju xjal lu minti' in che yolin ti'j tu'n kyten xjal tuj txub'txaj, noq o'kx in che si'min yol kyi'j qe xjal b'a'n kymod, aqeju najl kyxol;

21in che jaw tze'n wi'je ex in kyma'n: Ma qil tu'n qwitz aju ma tzaj ti'j.

22Nman, ma tila aju in kyb'incha'n qe xjal lu. Mi'n kyaj tena tu'n mi tq'ajta. Mi'n tz'el laq'e'ya wi'je.

23We'ktza Nman Dios, q'i'mel twatla. B'inchantza wi'je ex kolina wi'je.

24Nman Dios, b'inchantza wi'je porke aya tz'aqlxix. Mi'n taq'a amb'il tu'n kytze'n qe aj q'oj wi'je.

25Mi'n taq'a amb'il tu'n kymante ex tu'n tkub' kyximan kyja': Atzun jlu qaj, b'i'x ma naj qu'n.

26E ttzaj kych'ixwi ex e ttzpet kynab'l qeju in che tzalaj ti'j ju mya b'a'n ma tzaj wi'je; e ttzaj nimxix kych'ixwi ex e tnaj kynab'l qeju nno'k kyq'on kyib' mas ma' kyxilen nwitze.

27E kyjaw tzalaj ex e kyjaw sch'in tu'n tzalajb'il qeju kyaj tu'n kyke'yinte weye otoq chin kamb'ane; ex kok'x tu'n kymante kyja': Ma'xix toklen Qman ex in tzalaj tu'nju b'a'n ta' tmajen.

28Ok chin yolile ti'j ju in b'ant tu'na tuj tumelxix, ex tkyaqil q'ij kjawil nnimsa'ne.