1Tuj tq'ijlalil lu minti'toq rey kyxol aj Israel. Ax ikx tuj tq'ijlalil lu na'nxtoq kyk'monte qe tiyjil Dan jun piẍ kytx'otx', kyja'tzun in che jyontoq jatum tu'n kykub' ten najal.
2Kyja'tzun, aqeju tiyjil Dan e tzaj kysama'n jwe' xinaq kyuwxix kyk'u'j tuj q'oj aj Zora ex aj Estaol qe, ke'yilte tza'n tten tx'otx', ex b'ajtzun kyke'yin aju tten tx'otx'. Ex otoq txi kyma'n kye: Kyxi'ye ke'yilte tx'otx'. Aqeju jwe' xinaq lu e pon tuj tiwitz tx'otx' kye aj Efraín jatum ta' tja Micaía, ex axtzun e kyaj ten tu'n tex aq'b'il kye.
3Ex tej ch'ixtoq kypon tja Micaía, el kynik' ti'j tq'ajq'ajel twi' ku'xun aj Leví, ex e okxtzun qanilte te:
—¿Alkye ul q'inte teya tzalu? ¿Ti nb'aj teya tuj lugar lu? ¿Ti in tjyo'na tzalu? Che chi.
4Atzunte aj Leví xi tma'n kye aju trat otoq tb'incha Micaía tuk'il, ex tza'n tten otoq b'ant ti'j tu'n Micaía tu'n tok te tpal.
5Xitzun kyma'n te aj Leví:
—Qaninxa te Dios tu'n tel qnik'e ti'j qa b'a'n k'elel qb'eye lajo'n.
6Atzunte pal aj Leví xi ttzaq'we'n:
—Kyxi'ye tuk'il tzalajb'il, ate Qman k'okel kwentinte kyeye tuj kyb'eye.
7E ik'tzun qe jwe' xinaq ex e je'x tuj tnam Lais. Qe xjal ate' tuj tnam lu in che anq'intoq tuj txub'txaj, ex minti'toq in b'aj kyk'u'j ik tza'nx kycostumr qe xjal aj Sidón; mi a'ltoq jun in lab't kyi'j ex minti' jun atx taj kye. Najchaq kyelsa'n kyi'j aj Sidón, ex minti'toq kymojb'ab'l kyuk'il qe txqantl tnam ate' niqayin.
8Tejtzun kypon meltz'aj jwe' xinaq tuj tnam Zora ex Estaol, xi kyqanin qe kyuk'il kye:
—¿Alkye tqanil q'i'n kyu'ne?
Atzun kye xi kytzaq'we'n:
9—Ma b'aj qb'etine tkyaqil tx'otx' ma chixin ex aju tx'otx' ma qile tb'anilxix wen. Chux qeye, che we'ktze. Qo'qe tu'n qok tzoqpaj kyi'j. Mi'n ax che kyaj tene noq kukx tu'n tex kyq'ije. Qo'qe tzyulte tx'otx' lu.
10Ok kypone ma chixin, che knetel qe xjal kyu'ne minti' in b'aj kyk'u'j, at nim kytx'otx' ex minti' juntl atx taj kye. Ktzajel tq'o'n Dios tx'otx' lu te kyetzb'ile, che chi.
11Qaq syent xinaq tiyjil Dan e etz tuj tnam Zora ex Estaol, b'anin kyten tuk'il kymakb'il in che ajb'en tuj q'oj,
12ex e pon tuj kytx'otx' aj Judá, ex atzun e kub' ten tuj telex q'ij te tnam Quiriat-jearim, kyja'tzun ok tb'i lugar lu, Campament te Dan, ex ax tb'i tok ja'lo.
13Te tib'ajxi e je'x tu'n kypon tuj tiwitz tx'otx' kye aj Efraín ex e pon tja Micaía.
14Atzun qeju jwe' xinaq otoq che'x aj ke'yilte tx'otx' te tnam Lais xi kyma'n kye kyuk'il:
—Kyb'intze, tuj ja lu at jun kapiẍay in ajb'en kyu'n pal, ex at qe tilb'ilal nno'k kydiosin xjal tuj kyja, tuk'ix jun tilb'ilal lo'tzimaj ti'j tu'n saq pwaq. Kyke'yinxe alkye kb'antel kyu'ne.
15Kyja'tzun aqeju xinaq otoq che'x aj ke'yilte tx'otx' el kypa'n kyib' kyi'j qe kyuk'il, ex e je'x tja Micaía jatum ta' tja ku'xun aj Leví, ex xi kyq'olb'e'n.
16Atzun qe qaq syent soldad tiyjil Dan, b'anin kyten tuk'il kymakb'il in che ajb'en tuj q'oj ax e kyaj ten ttzi tlamel muro tok ti'j ja.
17Atzun qeju jwe' xinaq otoq che'x aj ke'yilte tx'otx' e okx naj tuj ja, ex etz kyi'n tilb'ilal lo'tzin ti'j tu'n saq pwaq, tuk'ix ju kapiẍay ex kyuk'ix txqantl tilb'ilal nno'k kydiosin xjal tuj kyja, atzunte pal attoq ttzi tlamel muro tok ti'j ja kyuk'il qe qaq syent soldad.
18Tej ttil pal qe jwe' xinaq otoq che okx tuj tja Micaía ex otoq tz'etz kyi'n tilb'ilal lo'tzin ti'j tu'n saq pwaq, tuk'ix kapiẍay ex kyuk'ix junjun tilb'ilal nno'k kydiosin xjal, xi tma'n kye:
—¿Ti nb'aj kyeye?
19Atzun kye xi kytzaq'we'n:
—Mi'n q'ajta, tzaja quk'ile. Qajb'ile tu'n toka te qpale ex tu'n toka ik tza'n jun mamb'aj te qeye. ¿Myape mas b'a'n tuj twitza tu'n toka te pal te kye jun k'loj tiyjil Israel twitzju tu'n tajb'ena te jun ja xjal?
20B'a'n e'la jlu tuj twitz pal, tzaj ti'n tilb'ilal, tuk'ix ju kapiẍay, kyuk'ix junjun tilb'ilal nno'k kydiosin xjal tuj kyja, ex xi'tzun kyuk'il qe tiyjil Dan.
21Tzyettzun kyb'e juntl maj; ex aqe k'wa'l, qe wakẍ ex tkyaqilju at kye, e kub' nej kyu'n.
22Otoq che laq'e' tej tb'aj kychmon kyib' Micaía kyuk'il qe tvesin, ex e je'xtzun lpe' kyi'j.
23Tejtzun kyb'inte qe tiyjil Dan aju sich' in jaw kyu'n qe xjal lepchix kyxi' kyi'j, ajtztzun kyke'yin ex xi kyqanin te Micaía:
—¿Ti ma b'aj ti'ja? ¿Tiqu'n ma che tzaj tchmo'na xjal q'ojlel qi'je?
24Atzunte Micaía xi ttzaq'we'n:
—Ma tzaj kyi'ne qe ndiose, aqeju wu'ne e b'ant, ax ikx ma tzaj kyi'ne npale, ex ma chin kyaj kyq'o'ne minti' at weye. ¿Tza'ntzun tten in tzaj kyqanine weye: Ti ma b'aj ti'ja?
25Atzun kye tiyjil Dan xi kytzaq'we'n:
—Mi'n q'ajta qi'je, mya yajku at junjun qeye b'aj kypasens ex jaku che ok tzoqpaj kyi'je, ex jaku naja kyu'n, kyuk'ix qeju at kyxilen tuk'ila.
26Qe tiyjil Dan xi kyi'ntl kyb'e, ex tej tke'yinte Micaía nimku kyb'aj, aj meltz'aj tja.
27Aqeju tiyjil Dan q'i'ntoq qe ti'xti kyu'n, aqeju otoq che b'aj tb'incha'n Micaía, tuk'ix tpal Micaía uk'in kyu'n, e pon max tuj tnam Lais. Qe xjal ate' ma chixin in che anq'in tuj txub'txaj ex minti' in b'aj kyk'u'j, kyja'tzun e kub' b'yo'n kykyaqil tu'n spad kyu'n qe tiyjil Dan, ex ok kyq'o'n tq'aq'al tnam.
28Aju tnam lu najchaq telsa'n ti'j tnam Sidón, ex minti'toq kymojb'ab'l kyib' xjal aj Lais kyuk'il qe txqantl tnam ate' niqayin; kyja'tzun mi a'l jun o kolon kyi'j. Atzun ta' tnam lu tuj chq'ajlaj niqayin ttxlaj lugar Bet-rehob. Te tib'ajxi jaw kyb'incha'n tiyjil Dan juntl maj tnam, ex axtzun e kyaj ten najal tuj.
29Aju tb'i tnam toktoq nej Lais, ex atzun kye ok kyq'o'n tb'i Dan te jun nimb'il tb'i qtzan kyxe'chel, aju tky'ajal Israel.
30Kub' kyq'o'n qe tiyjil Dan aju tilb'ilal lo'tzin ti'j tu'n saq pwaq, tu'ntzun kyk'ulun twitz, ex ate Jonatán ok te kypal, aju tky'ajal Gersón ex tal tchman Moisés. Ex te tib'ajxi ax qe tiyjil Jonatán e ok te kypal qe tiyjil Dan, tejxi kyxi q'i'n pres.
31Aju tilb'ilal kub' tb'incha'n Micaía ax o ten kyxol tiyjil Dan tuj tkyaqil tyemp tej tten tja Dios tuj Silo.
Who We AreWhat We EelieveWhat We Do
2025 by iamachristian.org,Inc All rights reserved.
