1Nman Dios, kukx chin b'itzale ti'j tk'ujlalila ex kukx kxel ntx'olb'a'ne qa in japunxix ju tyola tu'na.
2Kxel nq'o'ne tqanil qa te jumajx ju tk'ujlalila, in japunxix ju tyola ex minti' in ch'expet; ik tza'n te kya'j minti' in ch'expet, ikxtzunju tyola minti' in ch'expet.
3Kyaj b'ant ti'j jun tyola tuk'il David ex xi ttziyana te tmajena sk'o'maj tu'na, chiya kyja':
4Qe tiyjila che ul te tib'ajxi che okel nq'o'ne te kawil te jumajx te t-xela.
5Nman Dios, kykyaqil qeju ate' tuj kya'j in kyq'o'n chjonte teya tu'nju in japunxix tyola, ex tu'nju tb'inchb'ena ma'xix t-xilen.
6Mi jun anjel mi qe txqantl ate' tuj kya'j in pon ik tza'n teya Nman.
7Porke ma' t-xilena Dios, ex xob'ajilxixa, txolin ti'ja kyu'n qeju ate' tuj kya'j.
8Nman Dios aya Tajaw Tkyaqil, at nim tipumala ex tzyu'n aju yol axix tok tu'na; minti' juntl jaku pon ik tza'n teya.
9In kawina tib'aj mar ok in tzaj pulin kyuw wen ex in q'ajen tu'na.
10B'i'x kub' tpach'u'na ju nintz jil tuj mar, ex b'i'x kub' tb'yo'na; ex e b'aj t-sputuna qe aj q'oj ti'ja tu'n tipumal tq'ab'a.
11Teya kya'j ex tx'otx'; tu'na o b'ant twitz tx'otx' ex kykyaqil qeju ate' twitz.
12Tu'na o b'ant enter twitz tx'otx', tza'nx jun pak' ikx juntl pak'; qe witz Tabor ex Hermón in che b'itzan tu'n tzalajb'il ti'j tb'iya.
13At nim tipumala ex in kub' ti'j tkyaqil tu'na tu'nju tipumala.
14Kyuw tten tq'uqb'ila porke atzun in b'inchet ju tz'aqlxix tu'na, ex in tb'incha'na tkyaqil tuj tumel; in tzaj tyek'una tk'ujlalila ex aju tyola axix tok tu'n tkyaqilju in tb'incha'na.
15Nman Dios, at tzalajb'il kye qe xjal b'a'n che q'on chjonte teya ex in che b'et tuj t-spik'umala,
16in che tzalaj ti'ja tkyaqil q'ij ex in che tzalaj tu'nju tz'aqlxixa.
17Ax tok aya q'ol qipumale tb'anilxix, ex tu'n t-xtalb'ila kyja' tok mastl qipune.
18Ate Qman klol qe, aju Dios Xjan kye aj Israel, atzun qreyju.
19Tuj tq'ijlalil ojtxi mer ik tza'n tuj witzik' o yolina kye qe tmajena in che nimanxix teya, ex tzaj tma'na kye kyja': Kyxol qe xjal etzan wu'ne ma jaw nsk'o'ne jun minti' in b'aj tk'u'j, ma tz'ok nq'o'ne toklen ma'xix ex ma txi nq'o'ne onb'il te.
20Ma knet David wu'ne tu'n tok te nmajene. Ex ma jax nq'o'ne aseyt xjan tuj twi' tu'n tk'monte toklen te rey.
21Kukx chin onile ti'j ex k'okel tipun wu'ne tu'n wipumale;
22mlay che ok tzoqpaj qe aj q'oj ti'j ex mlay kub' ti'j kyu'n qe b'inchal mya b'a'n.
23Twitz che b'el npach'u'ne qe aj q'oj ti'j; ex che b'el nk'ixb'isa'ne qeju in che ik'un te.
24K'okel nk'ujla'ne ex kjapunel nyole tuk'il; wu'ne k'okel mas tipun.
25Kxel nq'o'ne toklen ex ktzyetelx tkawb'il max ttzi Nintz mar tu'n tpon b'aj ttzi nima Éufrates.
26Ktzajel tma'n weye: Aya Nmane ex Ndiose, aya kolol wi'je ex klol weye.
27Kxel nq'o'ne toklen ik tza'n tnejel nky'ajale, tu'ntzun mas ma' toklen kywitz txqantl rey twitz tx'otx'.
28Kukx ktel nk'ujlalile ti'j te jumajx, ex mlay ch'expet nyole kyjel b'ant ti'j tuk'il.
29Qe tiyjil che ul itz'j te tib'ajxi che kawil te jumajx te t-xel, akux atxku kya'j.
30Qatzun ma tz'el kypa'n kyib' ti'j nxnaq'tzb'ile ex qa minti' ma che b'et ik tza'nx in xi nma'ne,
31qa ma che ik' tib'aj nleye ex qa mi'n ma che japun qe nmandamyente kyu'n,
32kb'el nq'o'ne kycastiw tu'n tlaj mib'an che b'in ex tu'n tlaj ju mya b'a'n in kyb'incha'n; ex che b'ajel npeq'ane tu'n tze';
33ex mlay b'aj nk'ujlalile ti'j David, ex mlay b'ant tu'n mi'n tjapun aju xi ntziyane te.
34Mlay kub' nq'uchine aju yol kyaj b'ant ti'j wu'ne tuk'il, ex mlay b'aj nch'expu'ne aju yol o txi ntziyane te.
35Te jumajx o txi ntziyane aju yol te David, tu'nju xjan qine, ex mlay chin nik'ane yol te.
36Qe tiyjil che ul itz'j te tib'ajxi che okel te kawil te jumajx te t-xel, akux kukx at q'ij.
37Kukx ktel kykawb'il te jumajx ik tza'n ju xjaw, ex kukx ktel kykawb'il te jumajx akux atx kya'j, chitzuna tmaya.
38Atzun ja'lo ma tz'el tik'una aju rey jaw t-sk'o'na ex ma tzaj tq'oja ti'j.
39Ma kub' tq'uchina aju yol kyaj b'ant ti'j tu'na tuk'il tmajena; ma tz'el tik'una ex ma tz'el ti'na toklen.
40Ma kub' t-xituna ju muro tok ti'j ttanmi, ex ma che kub' t-xituna qe cuartel jatum in tklon tib'.
41Kykyaqil xjal in che ik' tuj lugar lu in xi kyelq'a'n tkyaqilju at te, ex qe tvesin rey in che xmayin ti'j.
42Ma txi tq'o'na kyipumal aj q'oj tu'n tkub' ti'j kyu'n, ex ma txi tq'o'na tzalajb'il kye qeju in che q'ojin ti'j.
43Ma b'aj naj ttzi t-spad tu'na ex minti' ma tz'onina ti'j tuj q'oj.
44Ma tz'el ti'na tajwalil; ma tz'el tik'una ex ma tz'el ti'na tipumal tkawb'il;
45ma tijin naj tu'na, ex ma kub' tq'o'na nim tch'ixwi.
46Nman Dios, ¿jtoj txi tkolina tu'n t-xi tewan tib'a? ¿Kukxpe ktzajel tq'oja mer ik tza'n q'aq' in k'ant?
47Nman, na'ntza qa noq ch'in tuj wab'q'iyile; ex qe xjal e b'ant tu'na noq ch'in in che ten twitz tx'otx'.
48Mi jun xjal kyjel ten te jumajx ex qa mi'n kyim; ex mi jun xjal jaku b'ant tklonte tib' tu'n mi'n tkyim ex tu'n mi'n tpon tuj kynajb'il kyimni.
49Nman Dios, ¿jatum ta' tk'ujlalila aju attoq nej, aju xi ttziyana te David axix tok tu'n tjapun tu'na?
50Nman, na'ntza ma che el ik'un qe tmajena kyu'n nimku xjal ex ma pon ta'w tuj wanmiye tu'nju in che ok ik'le'n.
51Nman Dios, kyja'tzun tten ma qo el ik'une kyu'n qe aj q'oj ti'ja; ex kyja'tzun tten ma tz'el ik'un ju xjal sk'o'maj tu'na ex in che xmayin ti'j tkyaqil maj.
52Nimanxwit tb'i Qman te jumajx. Ikxwitju.
LIBRO IVSALMOS 90-106Who We AreWhat We EelieveWhat We Do
2025 by iamachristian.org,Inc All rights reserved.
