1 Corinto 1 - Mam Huehuetenango New Ortography

Xi ttz'ib'an apostol Pablo jun u'j kye okslal tuj tnam Corinto

1Aqine Pablo, txko'maj qine tu'n woke apostol te Jesucrist noq tu'n tajb'il Dios, ex tuk'ix erman Sóstenes at wuk'ile.

2In xi ntz'ib'ane kyeye, aqeye okslal ate'ye tuj tnam Corinto, etzan qeye tu'n Dios tu'nju kymojb'ab'l kyib'e tuk'il Jesucrist ex txko'maj qeye o'kx tu'n kyajb'ene te Dios, kyuk'ix kykyaqil qeju in che kub'san twitz Qajaw Jesucrist noq jachaq, ate Jesucrist Qajaw ex Kyajaw.

3Awt Qman Dios tuk'ix Qajaw Jesucrist che tzaj q'onte xtalb'il kyeye ex tu'n tqe'xix kyk'u'je.

In qk'mo'n t-xtalb'il Dios noq tu'n Crist

4Kukx in xi nq'o'ne chjonte te Dios kyi'je tu'nju t-xtalb'il Dios tzaj q'o'n kyeye tu'nju kymojb'ab'l kyib'e tuk'il Jesucrist.

5Porke ma che oke q'inun tuj tkyaqil tu'n Crist, ma tz'aqet-xix kynab'le, ex ma b'ant kypakb'ane ti'j tyol Dios.

6Kyja'tzun ma kyuwsanjtz ju yol kyu'ne, aju yol ax tok xi nchik'b'a'ne ti'j Crist.

7Kyja'tzun ma kyk'ame tkyaqil kyoklene, minti' jun atx taj kyeye, in che ayone ti'j tq'ijlalil tulel Qajaw Jesucrist;

8ex axte kkyuwsal kyeye tu'n kywe'xixe max te b'ajsb'il, tu'ntzun kytene minti' kypaltile tuj tq'ijlalil ok tul Qajaw Jesucrist.

9Ate Dios in japunxix tyol ex mlay tzik'x ti'j, axte ma txkon kyeye tu'n kymojb'ante kyib'e tuk'il Tk'wa'l aju Qajaw Jesucrist.

Kub' ten pab'l tib' kyxol okslal

10Erman, tu'nju woklene ma tzaj tq'o'n Qajaw Jesucrist, chin kub'sale kywitze, junxwit kyyole kykyaqile ex tu'n mi'n tten jun pab'l tib' kyxole, noq o'kx tu'n kymojb'ante kyib'e junx kynab'le ex junx kyximb'etze.

11Tu'nju at jun tqanil ma nb'iye kyi'je erman kyu'n qeju ate' tuj tja Cloé, at jun q'oj kyxole, che chi.

12Atzun jlu in xi nma'ne kyeye porke mya junx ta' kyyole. At junjun in tma'n: Te Pablo qine, ex junjuntl in tma'n: Te Apolos qine, ex junjuntl in tma'n: Te Pedro qine, ex junjuntl in tma'n: Te Crist qine.

13¿Baqa tpa'n tib' Crist? ¿Apelo Pablo jaw q'o'n twitz crus tu'n kyklete? ¿Ex baqa tuj tb'i Pablo o che b'yane tuj a'?

14Kxel nq'o'ne chjonte te Dios, mi jun kyeye o b'yan wu'ne, noq o'kx Crispo tuk'ix Gayo.

15Kyja'tzun, mi jun kyeye tu'n tmante qa tuj nb'iye o b'yan.

16Ax ikx wu'ne o che b'yan qeju ate' tuj tja Estéfanas, ex minti' na'n wu'ne qa at juntl o b'yan wu'ne kyxol txqantl.

17Porke minti' ma chin tzaj sama'ne tu'n Crist tu'n kyb'yan xjal wu'ne, noq o'kx tu'n t-xi npakb'a'ne tqanil kolb'il, ex mya tu'n nmaq yol ma txi nma'ne, tu'ntzun mi'n tel wi'ne tipumal yol in xi nma'ne ti'j tkyimlen Crist twitz crus.

Ate Crist tipumal Dios ex tnab'l Dios

18Porke aju yol in xi nma'ne ti'j tkyimlen Crist twitz crus, minti' ttxolil yol lu nne'l tuj kywitz xjal in che'x tuj najen; atzun qe tuj qwitz, aqo' ma qo klet, aju yol lu tipumal Dios te,

19porke in tma'n tuj Tu'jil:

Knajel aju nab'l kye aj nab'l wu'ne, ex k'elel wi'ne kynab'l qeju sak' kynab'l, chi Tu'jil.

20¿Jatumtzun ta' ju aj nab'l? ¿Jatumtzun ta' ju xnaq'tzal ti'j ley? ¿Jatumtzun ta' ju xjal at nim tnab'l in yolin ti'j ju at tuj tq'ijlalil ja'lo? ¿Myapetzun ma tz'ok kynab'l xjal te tzkaj tu'n Dios?

21Porke nim te Dios tnab'l, kyja'tzun kub' t-ximan Dios tu'n mi'n tel kynik' xjal ti'j tu'n kyex kynab'l; kyja'tzun mas b'a'n ela tuj twitz Dios tu'n kyklet qe okslal tu'nju yol in pakb'anjtz, maske minti' ttxolil nne'l tuj kywitz txqantl xjal.

22Porke qe xjal judiy in kyqanin tu'n kyb'ant qe señ, ex qe xjal griego in che jyon kynab'l;

23atzun qeye in xi qpakb'a'ne tb'i Crist aju jaw q'o'n twitz crus. Qe xjal judiy mya b'a'n nne'la ju yol lu tuj kywitz, atzun qe txqantl xjal mya judiy qe, minti' ttxolil yol lu nne'la tuj kywitz;

24atzun tuj kywitz qeju txko'maj qe tu'n Dios, qe xjal judiy ax ikx qe xjal griego, ate Crist tipumal Dios ex tnab'l Dios.

25Porke aju kub' t-ximan Dios mas at tnab'l twitz kynab'l xjal, maske in kyma'n xjal qa minti' ttxolil yol; pero aju tb'incha Dios at mas tipun kywitz xjal, maske in kyma'n xjal qa minti' tipun.

26Ex kyximankuye erman, tej kytxkonjtze mya nim at kyxole at kynab'l ik tza'n in kyma'n xjal, ex mya nim at kyxole at kyipun, ex mya nim at kyxole kyk'wa'l xjal ma' kyoklen;

27noq o'kx e jaw t-sk'o'n Dios qeju minti' kynab'l tuj kywitz xjal tu'ntzun ttzaj kych'ixwi qeju at kynab'l; ex e jaw t-sk'o'n Dios qeju minti' kyipun tuj kywitz xjal tu'ntzun ttzaj kych'ixwi qeju at kyipun.

28Ex e jaw t-sk'o'n Dios qe tal meb'a xjal ex qeju ik'un qe ex minti' kyajb'en tuj kywitz xjal, tu'ntzun kyex xo'n qeju at kyoklen tuj kywitz,

29tu'ntzun mi a'l jun xjal tu'n tjaw tniman tib' twitz Dios.

30Tu'n Dios ma che ok mojb'a'ne tuk'il Jesucrist, ex ma tzaj q'o'n tnab'l Crist qe tu'n Dios, ex noq tu'n Crist ma qo ok q'o'n te tz'aqlxix tu'n Dios, ex ma qo el tpa'n tu'n qajb'en o'kx te, ex ma qo kolpet tu'n.

31Kyja'tzun: Alkye taj tu'n tjaw tniman tib', mas b'a'n tu'n tjaw tnimsa'n tb'i Qajaw, ik tza'n in tma'n tuj Tu'jil.