Apocalipsis 14 - Mam Huehuetenango New Ortography

Qe xjal in che b'itzan, 144 mil kyajlal

1Ax ikx o wile ju Tal Ẍne'l wa'ltoq twi witz Sión; ex at 144 mil xjal tuk'il, tok tb'i Tal Ẍne'l tib'aj kywitz tuk'ix tb'i Tman.

2Ex o nb'iye jun tq'ajq'ajel tzaj tuj kya'j ik tza'n tq'ajq'ajel nimku a' in jululun wen ex ik tza'n tq'ajq'ajel jun q'ankyoq kyuwxix; ex aju tq'ajq'ajel o nb'iye ik tza'n qe xjal in che chimb'an ti'j arpa.

3Ex in che b'itzan ti'j jun ak'aj b'itz twitz tq'uqb'il Dios ex kywitz qe kyaje querubín ex kywitz qe tij xjal. Mi jun xjal b'ant tb'itzan ti'j b'itz, noq o'kx qeju 144 mil xjal otoq che kolpet kyxol xjal twitz tx'otx'.

4Atzun qe jlu minti' b'aj kytz'ilsan kyib' kyuk'il xu'j, porke minti' e moje' kyuk'il xu'j. Atzun qe jlu in che ok lpe' ti'j Tal Ẍne'l noq ja'xjatum in xi'. Atzun qe jlu e kolpet kyxol xjal tu'n kyok te jun oyaj te Dios ex teju Tal Ẍne'l, ik tza'n tnejel twitz awal in xi q'ot te Dios.

5Ex minti' jun maj o che yolin nik'aj yol, porke minti' kypaltil twitz Dios.

Aju kyyol qeju ox anjel

6Ex o wile juntl anjel in lipan tuj tmijil twitz kya'j q'i'n tqanil kolb'il tu'n, aju kolb'il te jumajx, tu'n t-xi tpakb'a'n kye xjal najl twitz tx'otx', kye kykyaqil nasyon, ex kye kykyaqil kyiyjil xjal, ex kye kykyaqil k'loj xjal junxilchaq kyyol, ex kye kykyaqil tnam.

7Ex jaw tq'ajq'ajel twi' anjel kyuw, ex tma:

—Che xob'e twitz Dios, ex kyq'onxe nimb'il te, porke ma pon tq'ijlalil tu'n tkub' kysentens xjal tu'n; kyja'tzun, che k'ulune twitz ju b'inchal kya'j, tuk'ix tx'otx', tuk'ix mar ex kyuk'ix qe twi a'.

8Ex ok lpe' juntl anjel ti'j in tma'n:

—Ma naj, ma naj aju nintz tnam Babilonia, ex kykyaqil nasyon ma che ok k'al q'e'n tu'n Babilonia tu'nju vin xi tq'o'n kye; aju vin atzun in yolin ti'j ju kyk'ulb'il aj Babilonia kywitz qe tilb'ilal.

9Ex juntl toxin anjel ok lpe' kyi'j, jaw tq'ajq'ajel twi' kyuwxix ex tma:

—Qa at jun xjal in k'ulun twitz ju txkup ex qa twitz tilb'ilal, ex qa ma tk'am ju techal tib'aj twitz ex qa ti'j tq'ab',

10ax ikx te xjal lu at juntl vin kxel tk'a'n, aju tq'oj Dios, aju vin lu mya t-sem tib' ma ku'x tqo'n Dios tuj vas, aju vas in yolin ti'j tq'oj Dios ex tu'n tkub' kycastiw xjal; ex ok kk'ixb'isetel xjal tu'n q'aq' ex tu'n azufre kywitz qe anjel xjan ex twitz ju Tal Ẍne'l.

11Ex aju t-sib'el k'ixb'isab'l kye in jaw tuj tkyaqil tab'q'iyil te jumajx, ex qeju in che k'ulun twitz txkup ex twitz tilb'ilal minti' ch'in ojlab'l kye q'ijl ex qonik'an, ax ikx qeju in kyk'mo'n techal tb'i, minti' ojlab'l kye.

12Kyja'tzun, il ti'j tu'n tten kypasens okslal, aqeju in che japun qe tmandamyent Dios kyu'n ex kukx tten kyokslab'l ti'j Jesús.

13Ex o nb'iye jun tq'ajq'ajel tzaj tuj kya'j, tzaj tma'n weye:

—Tz'ib'ankuya jlu: At tzalajb'il kye qeju che kymel okslal qe ti'j Qajaw. Ax tok, chi Xewb'aj Xjan, che ojlal, mlay che aq'nantl, porke aju kyaq'unb'en lepchix kyi'j.

Jaw chmo'n twitz awal twitz tx'otx'

14Ex o wile jun muj saq; ex at jun q'uql tib'aj muj, ik ke'yin ik tza'n jun xjal, tjax jun corona q'an pwaq ttx'otx'il tuj twi', ex tzyu'n jun job'l triw tu'n, b'anin ttzi'.

15Ex at juntl anjel etz tuj tja Dios, jaw tq'ajq'ajel twi' kyuw, xi tma'n teju q'uql tib'aj muj:

—Nuqpinx tq'ab'a tuk'ix job'l triw tu'n tjaw chmet twitz awal; porke ma pon tq'ijlalil tu'n tjaw chmet twitz awal, porke ma tzqij twitz awal twitz tx'otx'.

16Ex aju q'uqltoq tib'aj muj tzaj tnuqpi'n tq'ab' twitz tx'otx' tuk'ix job'l triw ex jaw ju awal twitz tx'otx'.

17Ex etz juntl anjel tuj tja Dios at tuj kya'j, ax ikx te tzyu'n jun job'l uva tu'n, b'anin ttzi'.

18Ex etz juntl anjel twitz altar, aju at toklen tu'n ttzaj t-sama'n q'aq', ex jaw tq'ajq'ajel twi' kyuwxix, xi tma'n teju anjel tzyu'n job'l uva tu'n, b'anin ttzi':

—Nuqpinx tq'ab'a tuk'ix job'l uva b'anin ttzi' tu'n tel b'aj tjo'na qe pnujin uva twitz tx'otx', porke ma che q'anax qe uva, chi anjel.

19Ex jaw tjo'n anjel twitz tx'otx' tu'n job'l uva, ex el tjo'n twitz uva tuj tkyaqil twitz tx'otx', ex xi t-xo'n qe uva tuj putz'b'il te ma'xix, atzun in tma'n jlu, ktzajel tq'oj Dios kyi'j xjal, ex ktzajel jun kycastiw ma'xix tu'n.

20Ex b'aj wab'an twitz uva tuj putz'b'il te ti'jxi tnam, etztzun chik' tuj putz'b'il te uva, japun t-xe' jatum tok kypren chej, ex 300 kilómetro jatum pon b'aj.