1Nman Dios b'intza aju nna'j Diose; mi'n noq tzaj tb'i'na nkub'sb'ile twitza.
2Chin tb'intza ex chin ttzaq'wentza; ma b'aj nk'u'je tu'nju b'is in tzaj wi'je.
3In chin jaw lu'lune tu'n tq'ajq'ajel kywi' aj q'oj wi'je ex tu'nju yajb'il weye kyu'n qe xjal mya b'a'n. Kyu'n ma tzaj yajb'il wi'je; in che ok tzoqpaj wi'je tuk'il kytx'u'jil.
4In putin wanmiye ttzi nxu'ke; ma tzaj t-xob'il kamik wi'je.
5Ma tzaj nimxix t-xob'il wi'je; in chin lu'lune tu'n nxob'ile.
6Ex in nma'ne kyja': Noqwit at nxik'e ik tza'n jun paloma, jakulo chin el putine ex jakulo chin ojlane.
7Jakulo chinx oqe najchaq wen; jakulo chin kyaj tene najal tuj lugar minti' kynajb'il xjal tuj.
8Juratlo jaku chinxe klol wib'e ok ttzaj xob'ajil tu'n kyq'iq' jb'al.
9Xitun kub'a qe Nman, tzpet-san b'aja kyyol, porke o'kx in wile k'ixb'isab'l ex ik'b'il tuj tnam,
10q'ijtl ex qonik'an txolin kyten ti'jele tnam. O'kx mya b'a'n ex yajb'il at tuj;
11nojni qe cay kyu'n qe xjal k'ixb'isal ex sb'ul.
12Noqwit jun aj q'oj ma b'inchante mya b'a'n wi'je, mawtlo tzik'x wu'ne; ex noqwit jaw ti'n tib' wi'je aju nne'l ik'unte weye, mawtlo tz'el wewan wib'e twitz.
13Ex aju ma jaw ti'n tib' wi'je, akuya aju wuk'ile ex mejorxix wamiwoye,
14tuk'ila ok njunin wib'e tuj tja Dios tu'ntzun qyolin qamiwxix qib', ex tuk'ila o chin b'ete kyxol nimku xjal.
15Kuchiwt minab'en che kyim qe aj q'oj wi'je. Itz'xwit qe ok kyku'pun tuj kynajb'il kyimni, porke o'kx mya b'a'n at tuj kyanmi.
16Atzun weye ok chin kub'sale twitz Qman Dios; ate kklolte weye.
17Te prim, te qale ex te qonik'an, chin jawil ayayane ex chin jawil oq'e, ex ktzajel tb'i'n tq'ajq'ajel nwi'ye,
18chin kletele tu'n ok tok q'oj wi'je; maske at nim aj q'oj wi'je chin kletele tu'n.
19Ate Dios aju in kawin te jumajx, chin tzajel b'i'ne tu'n ex kb'el kyi'j qe aj q'oj wi'je tu'n, porke minti' in b'aj kych'expu'n kymod, ex minti' in che xob' twitz Dios.
20In jaw kyi'n kyib' kyi'j qe kyamiw; minti' in japun kyu'n aju yol in xi kytziyan te kymojb'ab'l kyib'.
21Tb'anilxix kyb'inx qe yol in che ajb'en kyu'n, atzunju kyximb'etz o'kx kyaj tu'n kyq'ojin. Tb'anilxix kyb'inx qe yol in che ajb'en kyu'n, ex ik kyten ik tza'n spad b'anin ttzi'.
22Q'onkja qe tb'isa tuj tq'ab' Qman, ate ktzajel q'onte tipuna tu'n tik'x tu'na, mlayx taq' amb'il tu'n tkub' tz'aq aju xjal b'a'n niman te.
23Nman Dios, tu'na che pol tz'aq qe b'yol xjal ex qe nik'al yol max t-xe'pun kynajb'il kyimni, mlay taq'a amb'il kye tu'n kyanq'in nim q'ij. Atzun weye q'uql nk'u'je ti'ja.
Who We AreWhat We EelieveWhat We Do
2025 by iamachristian.org,Inc All rights reserved.
