1 Corinto 16 - Mam Huehuetenango New Ortography

Aju oyaj jaw chmet tu'n t-xi q'o'n kye okslal

1Kxel nma'ne kyeye ti'j ju oyaj tu'n t-xi q'ot kye okslal. Ik tza'n xi nma'ne kye okslal ate' tuj junjun tnam tuj tx'otx' Galacia, ikxtzun kyeye kyb'inchame.

2Tkyaqil domink, teyle junjun kyeye b'a'n tu'n tel tpa'n ch'in, nik'pun ok tkamb'a' tuj jun seman, tu'n t-xi tk'u'n, tu'ntzun mya tzajx tu'n tjaw chmet oyaj ok npone kyuk'ile.

3Oktzun npone, alkye qeju b'a'n tuj kywitze, aqetzunju che xel nsama'ne, tuk'ix u'j kxel kyi'n, tu'ntzun t-xi kyi'n aju oyaj kxel kyq'o'ne tu'n tpon kye okslal tuj Jerusalén.

4Ax ikx weye qa b'a'n tuj kywitze tu'n nxi'ye, che xeltzun wuk'ine.

Kub' t-ximan Pablo tu'n tpon kyuk'il okslal tuj Corinto

5Ok chin pole kyuk'ile wik'lenxiye tuj tx'otx' Macedonia, ex il ti'j tu'n wik'e tuj Macedonia.

6Ex mya yajku chin kyaj tene kyuk'ile ex qa ax tu'n ntene kyuk'ile tuj jb'alil, tu'ntzun ttzaj kyq'o'ne ch'in onb'il weye tu'n tajb'en tuj nb'eye jatum chin xe'le.

7Porke mi'n waje tu'n wik' aje kyuk'ile ja'lo noq te ik'el b'e qine; atzun waje tu'n ntene kyuk'ile nim q'ij, qa ik tajb'il Qajaw.

8Ex ax chin tele tzalu tuj tnam Efeso. Okxi tb'aj ninq'ij Pentecostés, maxitzun chin xe'le.

9Porke ma tzaj q'o'n amb'il weye tu'n waq'nane nimxix tuj taq'un Qajaw, maske nimku in che q'ojin wi'je.

10Ex qa ma pon Timoteo, kykwentime tu'n tten kyuk'ile tuj txub'txaj, porke in tb'incha'n taq'un Qajaw ikx tza'n weye.

11Kyja'tzun, mi'n tz'ok kyq'o'ne qa minti' toklen, noq o'kx tu'n ttzaj kyq'o'ne ch'in onb'il te tu'ntzun tb'et tuj txub'txaj, tu'ntzun tul wuk'ile; porke in chin ayone ti'j tzalu, kyuk'ix erman.

12Atzunju erman Apolos nimxix o chin kub'sane twitz tu'n t-xi kyuk'ile kyuk'ix qe erman, ex minti' in tajb'e'n tu'n t-xi' ja'lo; maxitzun kxe'l ok tamet ti'j.

Mancbil q'olb'eb'l tu'n Pablo kye okslal

13Che xq'uqine ex che we'xixe tuj okslab'l; che okxe xinaq ex kyq'o'nk kyipune.

14Tkyaqilju ok kyb'incha'ye, b'ant-xwit kyu'ne tu'n kyk'ujlalile.

15Erman b'i'n kyu'ne, kykyaqil qeju ate' tuj tja Estéfanas, tnejel okslal qe tuj tx'otx' Acaya, ex ma kyaq' kyib' tu'n kyajb'en kye okslal.

16Chin kub'sale kywitze tu'n tkub' kyb'i'ne kykawb'il qeju in che ajb'en ik tza'n jlu, ex tu'n tkub' kyb'i'ne kykyaqil qeju in che onin ex in che aq'nan tuj taq'un Qajaw.

17In chin tzalaje tu'nju ma che ul Estéfanas tuk'ix Fortunato ex tuk'ix Acaico, porke ma che ul wuk'ile te kyxele.

18Porke ma qe' nk'u'je kyu'n, ax ikx kyeye ma qe' kyk'u'je kyu'n; tz'elxtzun kynik'e kyi'j qa at kyoklen jlu.

19In che'x q'olb'e'ne kyu'n qe okslal ate' tuj junjun tnam tuj tx'otx' Asia. Ax ikx Aquila tuk'ix Priscila, kyuk'ix qe okslal nno'k kychmon kyib' tuj kyja, nimxix in che'x q'olb'e'ne kyu'n tuj tb'i Qajaw.

20In che'x q'olb'e'ne kyu'n kykyaqil erman. Kyq'olb'em kyib'e kyxolxe, ex kytz'ub'an el kywitze tuk'il tkyaqil kyk'ujlalile.

21Aqine Pablo in xi ntz'ib'ane jun q'olb'eb'l lu, ma kub' ntz'ib'ane tu'nx nq'ab'e.

22Qa at jun minti' tk'ujlalil ti'j Qajaw Jesucrist, b'a'n tu'n tkub' t-sentens tu'n t-xi' tuj najen. Ate Qajaw tzul.

23Aju t-xtalb'il Qajaw Jesucrist tenwt kyuk'ile.

24At nk'ujlalile kyi'je kykyaqile, tu'nju okslal qeye ti'j Jesucrist. Ikxwitju.