Daniel 9 - Mam Huehuetenango New Ortography

In na'n Daniel Dios kyi'j qe t-xjalil

1Ate Darío aju tky'ajal Asuero ex kyiyjil aj Media in kawintoq kyib'aj aj Babilonia.

2Tuj tnejel ab'q'i ttzyetlen tkawin Darío, aqine Daniel in chin xnaq'tzantoqe tuj kyu'jil t-sanjel Dios, ex el nnik'e ti'j aju otoq tma Qman te Jeremías, qa il ti'j tu'n tjapun b'aj 70 ab'q'i tkub'len xitj tnam Jerusalén.

3In ok tene na'l Dios, in kub'sane twitz, kub' nyo'ne we'yaj, ok nq'o'ne nxb'alune ch'i'x twitz ex in kub' qe'ye tuj tza'j.

4In kub'sane twitz Qman aju Ndiose, ex xi nma'ne te aju il otoq qb'inchaye, nchiye kyja':

Nman Dios, ma'xix toklena ex xob'ajilxixa, in japun tu'na tkyaqilju yol in tzaj ttziyana, ex in tzaj q'aq'an tk'u'ja kyi'j qeju in che k'ujlan teya ex in che japun qe tmandamyenta kyu'n:

5Ma qo b'inchane il, ma qb'inchaye mya b'a'n, ma qb'inchaye aju puro ploj, ma tz'el qpa'n qib'e ti'ja, minti' ma txi qnimane tmandamyenta ex tleya.

6Minti' ma txi qnimane kyyol qe tmajena aqeju t-sanjela, aqeju e tzaj t-sama'na tu'n kyyolin kye qe qreye, kye qe nejenel qeye, kye qe qxe'chele ex kye kykyaqil tnam xjal aj Israel.

7Aya Nman tz'aqlxixa, atzun qeye, aqo'ye aj Israel, ma tzaj qch'ixwiye ja'lo, tza'nx qe aj Judá ex qeju najlqe tuj Jerusalén, ax ikx kykyaqil aj Israel, aqeju ate' niqayin ex aqeju ate' najchaq kyuj qe txqantl nasyon jatum o che pon tq'o'na tu'n tlaj il o kyb'incha twitza.

8Atzun qeye Nman, ma tzaj qch'ixwiye, ax ikx qe qreye, qe nejenel qxole ex qe qxe'chele, tu'nju ma qo b'inchane il twitza.

9Atzun teya Nman Dios, at nim tq'aq'b'il tk'u'ja ex in kub' tnajsa'na qile maske ma tz'el qpa'n qib'e ti'ja,

10minti' ma txi qb'i'ne tyola Nman Dios, ex minti' ma txi qnimane tleya, aju tzaj kyma'n qe tmajena aqeju t-sanjela.

11Kykyaqil aj Israel ma che ik' tib'aj tleya ex minti' ma txi kyniman tyola; kyja'tzun ma tzaj castiw lu qib'aje, porke ma japun aju yol axix tok tzaj tma'na, aju tz'ib'an tuj tley Moisés aju tmajena, porke ma qo b'inchane il twitza.

12Tej ttzaj t-sama'na nimxix mya b'a'n qib'aje, atzun ma japun aju tyola tzaj tma'na qi'je ex kyi'j qeju e kawin qib'aje; b'ajx tzaj jun castiw ma'xix twitz tx'otx' ik tza'n jlu, ik tza'n ju ma tzaj tib'aj tnam Jerusalén.

13Tkyaqilju mya b'a'n ma tzaj qib'aje lu, ma japun ik tza'nx tz'ib'an tuj tley Moisés, ex na'nx qok tene jyolte onb'il tuk'ila tu'n tel qnik'e ti'j tyola axix tok, ex na'nx tkyaj qkoline tu'n qb'inchane mya b'a'n.

14Kyja'tzun Nman Dios, ma tzaj t-sama'na castiw lu qib'aje, porke teya tz'aqlxixa tuj tkyaqilju in b'ant tu'na, atzun qeye minti' ma txi qnimane tyola.

15Nman Dios, o txi tyek'una tipumala ma'xix tej kyetz ti'na qe xjal tuj Egipto, aqeju etzan tu'na, ex b'i'x kyaj b'ant ojtxi tu'n kyyolin xjal b'a'n ti'ja ex kukx ja'lo, atzun qeye ma qo b'inchane il ex ma b'ant ju mya b'a'n qu'ne.

16Nman, b'a'n qu'ne at xtalb'il tuk'ila, kyja'tzun mi'n kukx tq'ojina ex mi'n kukx ttzaj ttx'u'jila ti'j tnam Jerusalén, porke aju tnam lu etzan tu'na ex teya aju witz xjan. Kykyaqil xjal najlqe kyuj qe tnam niqayin ate' in che xmayin ti'j tnam Jerusalén ex kyi'j qe xjal etzan tu'na, tu'n tlaj qile ex tu'n tlaj kyil qe qxe'chele.

17Ja'lotzun Qman Dios, b'intza nyole ex nqanb'etze aqine tmajena, ke'yintza tjaya puro b'isb'ajilxix ta', ex q'aq'antz tk'u'ja ti'j, tu'ntzun tjaw nimsa'n tb'iya.

18Nman Dios, txalb'antz twi'ya ex b'intza, ke'yintza aju xitb'il ma tzaj qi'je ex ti'j ju tnam etzan tu'na. Minti' in qo kub'sane twitza tu'nju b'a'n qo'ye, noq o'kx tu'nju at nim tq'aq'b'il tk'u'ja.

19Qo tb'intza Nman ex najsama qile. B'inchama qi'je Nman ex tzaja onil qeye tu'ntzun tjaw nimsan tb'iya; mi'n ayona mastl q'ij Nman, porke teya aju tnam lu kyuk'ix tnam xjal etzan tu'na.

Aju yol tzaj q'ma'n ti'j 70 seman

20Tej kukxtoq nna'ne Dios, ex tej kukxtoq tjatz npa'n wile, ex tej kukxtoq t-xi nma'ne te Dios aju il otoq kyb'incha qe nxjalile aj Israel, ex tej kukxtoq nkub'sane twitz Qman aju Ndiose ti'j ju witz xjan etzan tu'n,

21ex tej matoq in chin na'ne Dios, aju anjel Gabriel tb'i, aju otoq kub' tyek'un tib' nwitze nej ik tza'n tuj witzik', ul lipan jatum atine tej ch'ixtoq tpon or tu'n t-xi q'ot ju chojb'il te Dios, aju in xi q'ot tkyaqil qale,

22ex tzaj tchik'b'a'n weye, chi kyja':

—Daniel, lu qine ma chin ule tuk'ila q'ol tnab'la ex tojtzqib'la.

23Tej xqe' tna'na Dios, ate Dios ma tzaj tzaq'wente teya. Ma chin tzaje q'malte teya aju taj Dios tu'n tb'inteya, porke k'ujla'nxixa tu'n. Ja'lotzun cheb'axix b'intza aju kxel nma'ne teya, tu'ntzun tel tnik'a ti'j aju ma tzaj yek'un teya ik tza'n tuj witzik'.

24O b'ant ti'j tu'n tjapun 70 seman kyib'aj qe t-xjalila ex tib'aj ttanmiya xjan, tu'ntzun tnaj aju mya b'a'n ex il, tu'n tb'aj chjet il ex tu'n t-xe't jun kawb'il tuj tumelxix te jumajx, tu'ntzun tjapun aju o q'manjtz kyu'n qe t-sanjel Dios ex tu'n tok q'o'n toklen aju Xjal Mas Xjanxix.

25Il ti'j tu'n tb'inteya jlu ex tu'n tel tnik'a ti'j: Okxi tetz orden tu'n tjaw b'inchet juntl maj tnam Jerusalén, ex maxi ok tul ju Nejenel aju ktzajel q'o'n toklen, k'elel wuq seman tuk'ix juntl 62 seman. Che b'ajel b'inchet juntl maj qe cay ex ju muro, pero tuj tq'ijlalil mya b'a'n.

26Tb'ajlenxitzun 62 seman, kb'el b'yo'n aju nejenel otoq tz'ok q'o'n toklen ex mi jun kkolil ti'j. Atzunju tnam Jerusalén tuk'ix tja Dios che b'el xitun kyu'n t-soldad jun rey tzul; jurat kb'ajel naj tnam tu'n, ik tza'n nnu'l tilj jun nima, ex kukx ktel q'oj max te mankb'il ex kukx ktel xitb'il ik tza'n b'animaj ti'j.

27Ex ok ttzyet juntl seman, kb'antel ti'j jun tyol rey kyuk'il nimku xjal, ex tuj tmijil seman kmayetel tu'n, tu'n mi'n t-xi q'ot chojb'il ex oyaj. Ex ax tuj tja Dios k'okex tq'o'n jun tilb'ilal ik'b'ilxix. Aju xjal lu kukx kb'inchal mya b'a'n maxi ok tnaj, ik tza'n b'animaj ti'j.