Jeremías 16 - Mam Huehuetenango New Ortography

Tzaj tma'n Qman te Jeremías alkye tu'n tb'inchante

1Tzaj yolin Qman wuk'ile ex tma kyja':

2Mi'n txi tjyo'n t-xu'jila ex mi'n tzaj tk'wa'la tuj tx'otx' lu,

3ex kxel nma'ne teya alkye kb'ajel kyi'j qe k'wa'l che ul itz'j tuj tx'otx' lu, ex alkye kb'ajel kyi'j kytxu' ex kyman.

4Che kymel tu'n yab'il xob'ajilxix ex mi jun k-oq'el kyi'j ex mi jun kb'elex maqunte kye; kukx che kyjel pale' twitz tx'otx' ik tza'n kytxa' alumaj. Che b'el b'yo'n tu'n spad ex che kymel tu'n we'yaj, kxel chyo'n kyximlal kyu'n qe jil in che lipan twitz kya'j ex qe txkup te tjaq' k'ul.

5Ax ikx tzaj tma'n Qman weye: Mi'n tz'okxa tuj jun ja jatum in che b'isun xjal ti'j jun kyimni, mi'n oq'a kyuk'il ex mi'n txi tq'uqb'a'na kyk'u'j, porke ma tz'el nlaq'b'a'ne nxtalb'ile, nk'ujlalile ex tq'aq'b'il nk'u'je kyi'j qe xjal lu. Aqine Dios in chin q'mante jlu.

6Che kymel qe tij xjal ex qe k'wa'l tuj tx'otx' lu, mi jun kb'elex maqunte kye, mi jun k-oq'el kyi'j, mi jun kb'ajel tqesin t-ximlal ex mi jun k'elel tk'o'ẍin ti'j twi' tu'n tlaj tb'is kyi'j.

7Mi jun kxel q'inte wab'j mi k'ab'j kye qeju at kyxilen tuk'il qtzan kyimni tu'n tq'uqb'anjtz kyk'u'j, maske a qtzan kyman ex qa qtzan kytxu' otoq kyim.

8Ax ikx mi'n tz'okxa tuj jun ja jatum nno'k jun nintz wa'n, mi'n kub' qe'ya wa'l ex k'al kyuk'il.

9Porke aqine Dios, aju Tajaw Tkyaqil ex Kydios aj Israel, kxel nma'ne jlu: Che b'el naj qe b'itz te ninq'ij wu'ne tuj tnam lu, ex b'itz te tzalajb'il ex qe b'itz te mejeb'le'n; a jlu kb'antel wu'ne itz'x qeye, ex axqeye che ke'yilte.

10Ok t-xi tma'na tqanil lu kye tnam xjal, tzul kyqanin teya: ¿Tiqu'n ma tzaj tma'n Qman tu'n ttzaj mya b'a'n matijxix lu qib'aje? ¿Alkyetzun mya b'a'n ma qb'inchaye? ¿Alkye il o qb'inchaye twitz Qman aju Qdios? Che chilo teya.

11Atzun teya kxel ttzaq'we'na: Chi Qman: Tu'nju in kyaj koline kyu'n qtzan kyxe'chele, e ok lpe' kyi'j qe tilb'ilal, e k'ulun kywitz ex e ajb'en kye, atzun weye in kyaj koline kyu'n ex minti' japun nleye kyu'n.

12Atzun kyeye masxix ma tzik' kyb'inchb'ene mya b'a'n kywitz qtzan kyxe'chele, ex teyle junjun kyeye ma tz'ok lpe' ti'j ju mya b'a'n in tma'n tanmi ex minti' in chinx kynimane.

13Kyja'tzun che elex nlajo'ne tuj tx'otx' lu, ex che xel nlajo'ne tuj jun tnam minti' ojtzqi'n kyu'ne ex mi kyu'n qtzan kyxe'chele; atzun che ajb'ele q'ijl ex qonik'an kye txqantl dios ex mlayx tzaj q'aq'an nk'u'je kyi'je.

14Aqine Dios in chin q'mante jlu: Tzul tq'ijlalil tu'n mi'n kymatl kyja': Kxel qtziyan jun yol axix tok twitz Qman aju etz q'inte kye aj Israel tuj Egipto, che chiwt,

15noq o'kx kxel kyma'n kyja': Kxel qtziyan jun yol axix tok twitz Qman aju etz q'inte kye aj Israel tuj tx'otx' tuj tb'anq'ab' q'ij, ex kyuj kykyaqil txqantl tnam jatum otoq che b'aj t-sputun, che chilo. Che ajetz meltz'aj wu'ne tu'n kyul tuj kytx'otx' aju xi nq'o'ne kye qtzan kyxe'chel ojtxi.

16Aqine Dios in chin q'mante jlu: Che xel nsama'ne nim xjal tu'ntzun kytzyet aj Israel kyu'n ik tza'n in che tzyet kyiẍ. Ax ikx che xel nsama'ne nim xjal tu'ntzun kytzyet aj Israel kyu'n ik tza'n in che tzyet jil kyu'n kamb'al, ex che tzyetel kyu'n kywi' kykyaqil nmaq witz ex kywi' kykyaqil tal witz, ax ikxpe tuj tpaxil pik jatum kyewan kyib'.

17Porke in wile tkyaqil kyb'inchb'en; minti' jun in kyaj ten tuj ewaj nwitze, ax ikx ju kyil mlayx b'ant txi kyewan nwitze.

18Kb'el nq'o'ne kycastiw ik tza'nx kyb'inchb'en mya b'a'n ex ik tza'nx kyil, porke ma b'aj kytz'ilsa'n twitz ntx'otx'e kyu'n qe tilb'ilal kydios kyimni qe, ex ma kyb'incha nimku mya b'a'n ik'un wu'ne tuj tkyaqil tx'otx' etzan wu'ne.

Ok ten Jeremías kub'sal twitz Qman

19Aya Nman, aya q'ol wipune ex aya klol weye, ti'ja nno'k nklon wib'e tuj tq'ijlalil xob'ajil; max ttxa'npun tx'otx' che tzajel qe nasyon tu'n kyul tuk'ila ex ok kyma teya kyja': Minti' kyajb'en qe dios o che k'ulun qtzan qxe'chele kywitz ex minti' kyipun, noq o'kx sb'ul qe.

20¿Jakupe b'ant kydios xjal kyu'nx? Jaku, ex mya ax tok Dios qe, chi Jeremías.

Tzaq'web'l tu'n Qman

21Kyja'tzun, ja'lo kxel nyek'une wipumale kye ex k'eleltzun kynik' ti'j qa aqine Dios.